San Lucas 8:41-54

⁴¹Jairona mamecɨredɨmɨedɨ Jesús dɨne bite. Naimɨedɨ judíuaɨ rafue ofiraco sedaraɨma. Jesúmo duere jɨcanollena, ana bɨtadate. Naimɨe jofomo Jesús bɨllena duere jɨcanote.

⁴²Dañaiñode ie jisa. Doce años naiñaiñodɨ ite. Niadedɨ fiodaiacade. Ie jira Jesúmo jɨcanuaɨbite. Iena cacajano, naimɨe dɨga Jesús jaide. Ie llofueoicaigano jɨaɨ jaidɨmacɨ. Jesús jaillano, dɨga comɨnɨ naimɨemo ñaijisaide.

⁴³Baɨ jaillanona, duidɨñaiño Jesús jɨnafona jaide. Naiñaiño jeraimona doce años jaca dɨaide. Naiñaiñona jaca buna jillotanide.

⁴⁴Jɨnafo dɨnena billanona, Jesús ɨniroi fueda jetade. Iemona dɨailladɨ faɨnonocaide. Jillode.

⁴⁵Jesús dɨnena jɨcanote: —¿Bu cuena jetade? Naimɨe ecɨmo ite comɨnɨ uai otɨmacɨ: —Ona jetañedɨcaɨ. Ie nabaiñɨaɨ dɨga Pedro dɨnena raite: —Maestro, ailluena comɨnɨ o ecɨmo jaidɨmacɨ. Omo ñaijidɨmacɨ.

⁴⁶Jesús uai ote: —Damɨe cuena jetade. Cue abɨmona cue uai jaillamona, naimɨe jai jillode.

⁴⁷Jaive duidɨñaiñodɨ Jesús naiñaiñona uiñuana uiñote. Ie jira Jesús dɨne jacɨruicana bite. Naimɨe uicomo ana bɨtadajanona, nana comɨnɨ uicomo naimɨena jetaja rafuena llote. Naiñaiño ieconi jilluana llote.

⁴⁸Jesús dɨnena naiñaiñona raite: —Ñoo, cuena o ɨɨnua jira, jai jillodɨo. Mai jaillanona, uri o i.

⁴⁹Naiñaiño dɨga Jesús nia ñaɨtemo, Jairo jofomona damɨe bite. Jairomo llote: —O jisa jai fiodaite. Maestrona ñaɨdoñeno.

⁵⁰Iena Jesús cacajano raite: —O comecɨ jarire iñeno; ia cuena nia ɨɨno. Naiñaiño jilloite.

⁵¹Jairo jofomo naimacɨ rillano, ailluena comɨnɨ naimɨe dɨga fo jaillana rairuide. Danɨ dɨese fo jaillana jitaide: Pedro, Jacobo, Juan, nai jitaɨbɨcɨ moo, naiñaiño ei. Jaca dɨese fo illana jitaide.

⁵²Nana nainomo itɨno eecuinaidɨmacɨ. Faɨlliñaidɨmacɨ. Jesús dɨnena raite: —Omoɨ eeñeno. Cuemona naiñaiñodɨ fiodaiñedesa. Jamai ɨnɨde.

⁵³Jai fiodaitedɨ: “¿Bue ñellɨ ɨnɨde raitɨo?” raillanona jaisitɨmacɨ.

⁵⁴Jesús fo jailla mei, naiñaiño onollɨna llɨnocaida, raite: —Jitaɨbɨcɨ, mai naidacai.