Luk 8:41-54

⁴¹Köuluk mirigö keu galöm kun qetŋi Jairus yaŋön kaba Jisösgö wösöŋe geba simin köla miriŋe kamapköra köuluköm waŋgiyök.

⁴²Moröurupŋi qahöpmö, böratŋi mukmorö mohok yambuŋi (yara) 12:gö dop mala kömumamgö ahök. Jisös köl öröm waŋgigetka aniga ambazip kambunöŋ likeplikep ölököba utal waŋgiget. Mewö.

⁴³Utal waŋgiba angetka miaŋgöreŋ sutŋine ambi kun malök. Yaŋön yambu (yara) 12 miaŋgö dop köiŋnöŋ ehiga nalö dop kawöl yöhöiga malök. Yaŋön sile galöm yeŋgö töwaŋini moneŋ inapŋi pakpak gil maliga sile galöm körekŋan mem ölöwakingö osiget.

⁴⁴Ambi miaŋön Jisösgö andöŋe anda malukuŋaŋgö kitip suŋi misiriiga miaŋgöreŋök sepŋi jöpköyök.

⁴⁵Jisösnöŋ qesiba jiyök, “Daŋön nömisiriza?” Mewö jiyökmö, ambazip körekŋan mi qaŋ kölgetka Pitönöŋ jiyök, “Ketaŋamni, ambazip kambunöŋ ölököba utal aŋguba kaba goseize.”

⁴⁶Jiiga Jisösnöŋ jiyök, “Qahö, kunŋan nömisiriiga ösumni kun ani mötzal.”

⁴⁷Mewö jiiga ambinöŋ “Könaŋamni lök asuhuza,” jiba jönömŋi unduiga kaba Jisösgö wösöŋe simin köla kawölŋaŋgö könaŋi aka misiriba miaŋgöreŋök ölöwahöhi, miaŋgö könaŋi aukŋe jiiga ambazip kambu körekŋan mötket.

⁴⁸Mötketka Jisösnöŋ kewö jii mörök, “Böratni, mötnaripkan mönö mem ölöwak gihiza. Ölöp urubönjöŋnöŋ anman.” Mewö.

⁴⁹Keu mewö jiba kiniga köuluk mirigö keu galömŋaŋgö mireyök kunŋan welen kaba Jairusgöra jiyök, “Böratkan kömuza! Miaŋgöra böhigö qakŋe lömböt toroqeba kude alman.”

⁵⁰Jiyökmö, Jisösnöŋ keu mi möta köuluk mirigö keu galömŋi kewö jii mörök, “Keŋgötki kude mötman! Mohok-kun akŋan. Mönö ni möt narim niŋginöŋga böratkan ölöwakŋa.”

⁵¹Mewö jiba yaŋgö mire anda ambazip tosatŋi eŋgömosöta Pitö, Jon, Jeims aka morö böratkö iwinamŋi iyök eŋguaŋgiri nanŋinök miri uruŋe öŋgöget.

⁵²Öŋgögetka ambazip körekŋan jiŋgeŋ köla sahöta amburereŋ megetmö, Jisösnöŋ jiyök, “Yaŋön qahö kömuzapmö, gaunök ahöza. Miaŋgöra mönö sahöt mosötme.”

⁵³Mewö jiiga gönahit ewö aiga “Mönö kömuza!” möta gön köl waŋgiget.

⁵⁴Gön köl waŋgigetmö, börat mi böröŋe memba qeta jiyök, “Böratni, mönö wahötnöŋ.”