Luqaasa 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Yesusi bana kaallizayta “Asa dhuphidi nagaran yeggiza miishi yoonta aggenna; gido attin yaana dhuphezas gaaso gidizaddes aayye-ana!

²He addezi ha guuthatappe issas dhuphe gidanappe woxa shuchchi iza qoodhen qashetin abba gido izi yegetizakko izas lo7o gidana.

³Hessa gish inte hu7es naagetite. ‘Ne ishay nena qohikko hanqeta; izi ba mooro eridi simmikko maara.’

⁴Issi gallassan laapunto zaari zaari qohidi laapun tokka zaari zaari ‘Maara giikko maara’ ” gides.

⁵Hawaaretikka “Godo! Nuus ammano gujja” gida.

⁶Godaykka “Gaashe ayfe lagge ammanoy intes diikko hayssa ‘Eththa dhoqalleta baada abban gela tokketa’ inte giikko izi intes azazettana” gides.

⁷Qasseka Yesusi “Inte giddofe issi asas goshshanchay woykko dorsa heemiza ashkaray diikko izi goshshasoppe simmishin ‘Taas maana kawo giigissa; ta maada uyana gakkanaas gixetada taas ooththa; hessafe guye baggan maandassanne uyandassa’ gees attin ha7i quma maana ha aadhdha gizee?

⁹Histikko he ashkara goday izi iza azazo polida gish iza galati erizee?

¹⁰Hessa gish intenikka inte azazettidayssa wursi polida wode ‘Nuni go7ay baynda oosanchata nuus ooththanas bessizayssa poli ooththidos’ gite” gides.

¹¹Hessafe guye Yesusi Yerusalame bishe Samaariyaranne Galila achchara aadhdhides.

¹²Issi guta gelida wode inchiracha hargiza tammu asati iza demmida. Istika haahon eqqidi;

¹³ba qaala dhoqu histidi “Yesusa! Godo! Nuus mishetarki!” gida.

¹⁴Izikka ista beyidi “Biite! Intena Qeesetas bessite” gides. Istika buro bishe oge bolla paxida.

¹⁵Istafe issoy ba paxidayssa beyidi ba qaala dhoqu histidi Xoossa bonchishe simmides.

¹⁶Izaadeyka Yesusa toho bolla kundidi galattides; izikka Samaariya biitta asa.

¹⁷Yesusikka addeza “Paxidayti tamm as deettenee? Histin uddufunati awa bidoo?

¹⁸Hayssa dumma dere addezappe attin Xoossa galatizay baawa guussee?” giidi oychides.

¹⁹Addezakka zaaridi “Dendada ba! Nena ne ammanoy pathides” gides.

²⁰“Xoossa Kawotethi ayde yaanee?” giidi Farsaaweeti Yesusa oychida wode Yesusi “Xoossa kawotethi beettiza malatatan yuukku.

²¹Asay Xoossa kawotethi haan dawus woykko heen dawus gaanas dandayettenna; Xoossa kawotethi inte giddon dawus” giidi zaarides.

²²Bana kaallizaytaska “Asa Naa gallassatappe issi gallassayo beyanas inte amottana wodey yaana; gido attin inte beyekketa.

²³Asay intes ‘Haan dawus’ woykko ‘Heen dawus’ gaana shin inte ista kaallidi booppite.

²⁴Gaasoyka wolqanthi wolqamidi ha gaxappe he gaxa gakkanaas poo7isiza mala Asa Nay yiza gallas iza mala hanana.

²⁵Gido attin hayssi wuri hananappe koyro Asa Nay daro meto ekkanasinne hayssa ha yeletethan kadhettanas bessees.

²⁶“Nohe wode hanidayssa mala Asa Naa wodenka hessatho hanana.

²⁷Nohey markaben gelana gallas gakkanaas asay mishininne uyishin; ekkishininne gelishin dhaysiza haaththi yiidi wursikka dhayssides.

²⁸“Looxe wodekka iza mala hanides; asay meessinne uyees; bayizessinne shamees; tokkizaz tokkees; keeththika keexetes.

²⁹Gido attin Looxey Soddomeppe kezida gallas shuchinne mith qoronta diine tamay saloppe bukkidi wursi dhayssides.

³⁰“Asa Nay qonciza gallas hessatho hanana.

³¹He wode ba keeththa bolla dizaddey oonikka keeththa giddon diza miish ekkana giidi duge wodhdhofo; hessathoka goshsha soon diza asi guye so simmofo.

³²Looxe macho qoppite.

³³Ba de7o gam7isana koyizay wuri dhayssana; ba shempo aaththi immizaddey gam7isana.

³⁴Ta intes gizay he wode omars nam7u asi issi hiixan ichchana; issoneya ekettana; issoy attana.

³⁵Nam7u macasati issife gaaccishin issineya ekettana; hankoora attana.

³⁶Nam7u asi issife goshshason daana; issoy ekettana; issoy attana.

³⁷“Istika zaaridi ‘Godo! Isti awa ekettanee?’ gida. Izikka ahay dizason ankoti shiiqana” gides.