54Oe hamlogke baap-daada Aabraaham aur okar aulaad ke waada karies raha oesabke hardam ke lieje daaja kare ke. Ohie se oe Israel ke djaat ke sahaaita karies hai. Oesab to okar sewak logan hai.”
56Maria tien mahienna Eliesaabet hia rahie gail, tab aapan ghare laut gail.
57Tab djab Eliesaabet ke tem aai gail raha, tab oke ek beta paida bhail.
58Aur djab agal-bagal waalan aur palwaar soenies kie Parmeswar okare khaatien ketana barka daaja karies hai, tab oesab bahoet khoesie raha.
59Tab athwa rodj sabhan aail larka ke hakiekat kare aur maangat raha oke okar baap ke naam dharaawe.
60Bakie okar maai bolies: „Na, okar naam Johaanas rahie.”
61Tab oesab bolies: „Tor palwaar me ie naam koi ke na hai.”
62Aur oelog okar baap ke sankiaaike poetjhies kie: „Toe larka ke kaun naam dharaihe?”
63Tab baap koetjh maangies liekhe khaatien aur liekhies: „Okar naam Johaanas hai.” Tab sabhan bahoet atjambho hoi gail.
64Toerante baap batiaai paais aur Parmeswar ke goen gaawe lagal.
65Tab oe gaaw ke manai ghabaraai gail aur sab Joedea ke pahaar waala diehaat ke log ie tjiedj ke biese me batiaai lagal.
66Aur dje dje soenies, oesab sotje lagal kie: „Ie larka kaisan aadmie hoiga?” Oelog to samadjh gail kie Parmeswar ke saktie okare saath hai.
67Oe same par larka ke baap Pawietr Aatma se bhar gail aur aagam bataawe lagal.
68Bolies: „Israel ke Prabhoe Parmeswar ke aadar howe. Oe aail aapan djaatie ke batjaawe.
69Okar sewak Daawied ke aulaad me se oe hamlog khaatien ek maahaan batjaawe Waala ke djalmaais hai.
70Prabhoe pahiele aapan pawietr sanesia log dwaara waada karies raha
71kie oe hamlogke sab doesman ke saktie aur sab djarantoehan ke bas me se batjaaiga.
72Oe hamlogke baap-daada log ke daaja karies aur jaad kare hai kie oe kasam khaaike Aabraaham se kaun pawietr baat waada karies raha.
Loekaas 1
Loekaas 1:54-72