Luka 1:54-72

⁵⁴Naio mila nam̃a berkario nua ban korobido nalo, binimei miija kito, kanano kulo Israel nalo. Maka rivitoviton ea Epraamo, tinienriia kiano bajulukuti nam̃ariga-o tobo to.”

⁵⁶Naina naruei Mere kiano iouano maaro ea vio na, mia naio jo bija Lesveti bano-o bokar siberio tolu, karina ban ea kanano vonuo bereio.

⁵⁷Naruei binimei monloglog bogo na mia Lesveti rudu kenerinio, mia naio barlar be sum̃ano.

⁵⁸Mia bogo napano Lesveti kiano m̃aratavo bija tomu na vaataro nalo amijogial vite nei, nalo ajaaro toru laka bija naio ka Atua kanano burum̃ara tinieiiano nei banio, ka beamu naio be jumolumu ga, mia vonganei naio barlar kenerinio motoru.

⁵⁹Mia bogo na kiritete nei naio bokar bogoti aluo, ana abinimei ka ala pakuveu ka naio. Ka bogo na, ajidom ka adu siano bunu, avio ka Sakaraia, tibe ka karam̃ano siano,

⁶⁰mia kiritete kenieno berbure, berinavo “Makanio, naio siano Jone.”

⁶¹Naruei nalo amil banio, aberinavo “?Venia na? !Maka lele garuei kanamo m̃aratavo tai napano adu sio na jibe na toa naio!”

⁶²Naruei amil ka ga jum̃alo ban kiritete nei karam̃ano, ka avika denio ka naio jidom ka adu sio na vabe toa kenerinio nene.

⁶³Ana na Sakaraia mil ka jum̃ano banlo, ber adu m̃esi tai rimei vanio, naruei naio bivitauia, berinavo “Siano, Jone.” Vite na naruei mila nalo na vio na amiilo toru laka kanio,

⁶⁴mia monloglog bogo na bunu, Sakaraia minano mijuo, naruei naio mijikia mil bereio, ana na miaia Atua.

⁶⁵Mia tomu nonovio nalo na tanobuku na, amijogial vite nei, amiilo va kanio, mia tukunuano nene mererako janea m̃arkomeli dolu nalo na tanobuku na suku nalo na vio Yutea.

⁶⁶Ana na nalo nam̃a amijogio, ajidom bijovijon toru laka kanio, bior abitilubar ka Atua jum̃ano jo bijaio, naruei nalo ajum̃a abivika denlo, aberinavo “?Kiritete lu nei mia naio tum̃abe?”

⁶⁷Naruei Niununo Lu binimei bujomagmago ea Sakaraia, kiritete telisu nei karam̃ano, ana naio berial jibe nei, ber

⁶⁸“Kito raiaia kanado Atua siano, Tubo re Israel, batove kean kito, bulular kito,

⁶⁹bitirilar kiano siyovo, miyotuba ea bajulukuti na kiano toro na im̃auano Teviti, ka mia rilarur kito.

⁷⁰Nina kiano verikariano nanua, naverialiano nalo aberialio, aber

⁷¹Naio mia rivuru bulag kito den kiado uolu nalo jum̃alo,

⁷²tiniene ribobogia re kanano virakariano bija korobido nalo, tinien miialo kia ga vo.