Lucas 1:54-72

⁵⁴Chube kwian israelita ulita gau lle boangale Chube alin, Chube kwian e chudabo. Unsuialin Chube gerudu kwian israelita enusulian nge oña ulita ole Chube be tai dage kwian israelita kada Abrahamge kaire Abraham oindalla ulitage, Chube gerudu Chube be kwian ene chudaboi diali chui ulita. Chube agedu ene ulia Chube gerudu kare, kaire Chube be age dare no gwangerugu.” María gerudu noare ene ulita Chube giti.

⁵⁶María chegu toi Elisabet ole dai gdamai gire María joni mo ullage.

⁵⁷Kirogwa chuia tigunga Elisabege gire kirogwa chku Elisabet kote, kirogwa onbre.

⁵⁸Geru chku uñale Elisabet bitalla ulitage kaire kwian na tanrege kle toi kodi Elisabet ullage, kwian ene ulitadi nga chegu suga no Elisabet kirolla giti, ama ulita gerudu modi: —Nga suga noare cha ulitadi Elisabet kirolla giti, ulia Chube taidu dage amage, Chube agedu noare ama alin.

⁵⁹Kirogwage chuiapake chku gire kwian e ulita jo Elisabet ngwadi kirogwa kwara tkangenga sidri chada gbe kare kwian israelita ulita kle age kare, kaire chui ege kirogwa ka gbere, kwian ulita tadu kirogwa ka gbe ñenua kadakle kare, Zacarías,

⁶⁰agwa Elisabet gerudu: —Kirogwa ka mi chege Zacarías, ama ka be chege Juan.

⁶¹Kwian gerudu Elisabet ole: —¿Mineade ba be kirogwa ka gbe Juan? Ni ba bitalla gdaite kada Juan.

⁶²Kwian gerudu ene Elisabet ole gire kwian ko alin ñachugu kirogwa ñenuage geru kade ñenuage ñenua takalin kirogwa ka chege mine.

⁶³Zacarías chada kadu kirogwa ka degagda, chada ketre Zacaríage gire Zacarías kirogwa ka degu ai kare: “Kirogwa ka be chege jwanle Juan.” Kwian ulita chada e batunga gire chegu tañachuge tanre mo tale e giti.

⁶⁴Zacarías kirogwa ka degu ene gire blike ama ñaduni geruleni nge kare, gire ama gerudu tanre no Chube giti Chube agedu no ulita ama alin giti.

⁶⁵Kwian ulita kle toi kodi Zacarías ullage gwagedu Zacaríadi boi ulita ene, kwian e ulita chegu tañachuge tanre Zacarías giti Zacarías kirolla giti, nga Judeage ulita kwian ulita geru tragu modi daba na ole e ulita boidu giti.

⁶⁶Kwian ulita geru keruchugu e giti, sugedu kwiange ulita kirogwa e me kirogwa ulita kare agwa ulia Chube kiralla kle kirogwa e ole, malen kwian ulita chegu tañachuge tanre boidu ulita giti, kwian geru kadu mo tale kirogwa giti: “¿Kirogwa e be joge juma be chege mine?”

⁶⁷Boidu ene ulita gire Chube Oña Juan ñenua Zacarías ta gbu gerule Chube be age giti kwian israelita ulita alin, Zacarías gerudu:

⁶⁸“Cha tale nga suga no no Chube giti, ama noare ulita, ama kwian israelita ulita Chugagwalla. Che kwian israelita ulita Chubenu, Chube be chie che chudaboi, be che ulita jwen siere ji chugege age me no gdale.

⁶⁹Chube be che jwannga siere kage che alin, ama kira molen, ama David oña oindalla, David che enusulian oña lle boanga Chube alin unsuialin.

⁷⁰Unsuialin Chube gerudu kwian Chube gerua ketanga ole, gire kwian e Chube gerua ketu daba na ulitage,

⁷¹Chube gerudu ama be che jwen siere kwian agenga me no che dollalege, kwian kle dole che ole kwian ta me no chedi, kwian ene ulitage Chube be che jwen siere.

⁷²Chube gerudu che enusulian oña nge ole Chube be tai dage che kwian israelita ulitage be age no che ulita alin. Chube be age ene ulia ama gerudu kare, mi geru e talla mlienga.