Lucas 1:54-72

⁵⁴Oquenpaliebejque ixenöchpelhua de tietlatequepano Israel, oquelnömejque de Israel ca icnuejtelestle.

⁵⁵Ejqueu oquechijque quiename oquemelfejque totötajua, quieme oqueprometierfejque Abraham hua ipejpelhua para nochepa.

⁵⁶Hua omocö María ca Elisabet quieme yeye mietztle. Sötiepa ohuöla pa ichö.

⁵⁷Hua oasec tunale para mixebes Elisabet. Oquemixe iconie.

⁵⁸Hua tli itlac chajchönteya hua igiente oquecajque que Deus quepilejque meyac icnuejtelestle, hua opajpöjque ca yaja.

⁵⁹Hua omochi que pan checuieye tunale ohuölajque para quenacayutequesque inu peltzintle. Hua quecuitiöya quieme itajtzi, Zacarías.

⁶⁰Yecuöquenu onöhuat inöntzi, oquejto: ―Amo, cache itucöyes Xohuö.

⁶¹Hua oquelfejque: ―¿Tli ipampa? Amo öque de mogiente mocuitea ejqueu.

⁶²Hua oquenutzque itajtzi peltzintle ca sieñas de inmöhua, quiene queneque quecuitis.

⁶³Hua yaja otlajtla ömatl, hua oquejcuelo ejqueyi: “Itucö Xohuö”. Innochtie quetietzöbejque.

⁶⁴Hua sa nima opajtec icamac hua inenepil Zacarías. Ye cuale otlajtlajto, hua otieteochi Deus.

⁶⁵Ohuöla majcömabelestle impa innochtie tli ompa chajchönteya intlac yejua. Hua ipa noche tepieme de estado de Judea omacheac de noche ini nönca sösantle tli opasöre.

⁶⁶Hua noche quiejquech quecaqueya quemalfiöya ipa inyulo, hua quejejtoöya: ―¿Öquenu iyes inu peltzintle? Pues Tlöcatzintle iloaya ca yaja hua ejqueu quepaliebiloöya.

⁶⁷Hua Zacarías itajtzi Xohuö iyulo otie de Espíritu Sönto. Otlayulepante, hua oquejto:

⁶⁸Ma tetieteochihuacö Tlöcatzintle Deus de Israel, que ohualiloac ca tiepuieblo, hua oquemöquextejque,

⁶⁹hua ocajcojque sente tiemöquextiöne para tejua, de ixenöchpelhua de David tietlatequepano.

⁷⁰Pues ejqueu oquejtojque por incamacopa de tietlayulepanhua yecteque tli oquepujque tietlajtultzi desde ca opie tlöltecpactle.

⁷¹Tiechmacaque nemöquextelestle de toenemigos, hua de innochtie tli tiechtlajyelejta.

⁷²Ejqueu quepeasque icnuejtelestle ca totötajua, hua quelnömequesque de inu acuierdo yectec tli oquechijque,