Rukas 1:54-72

⁵⁴Iwa Deus Sudeutsa mysitsumuẽhĩkĩ. Tatyryktsa mysitsumuẽhĩkĩ.

⁵⁵Tubabatu Deus harere mydiritsa ispirikze niy. Abaka wasani niy. Sibo nitsasoko: “Ikiahatsa humo kamypokzitsiarẽta” niy. Mydiritsa bo Abarão tsekokatsa bo iwa. Deus taharere humo ba zikspiriktsokda Iwa Maria Deus soho humo nikara.

⁵⁶Iwaze byzoje harakykbyihi zitsuze Maria Isabeu tuk niapykyk. Iwaze tawahoro bo ziksizo.

⁵⁷Iwaze Isabeu bykyhy nipuruk.

⁵⁸Itukytsa, iututsa pauktsitsa kino niwatihi sakurẽtsa niapykyryknaha. Isabeu tse humo sakurẽtsa. Ziwabynahaze Deus atatsa humo tsimypokzitsiarẽta, iwatsahi sakurẽtsa niyziknaha.

⁵⁹Niahatsahi izumukunaha. Iwatsahi ibykyhy tsibik pipiakzyknaha. Kyze ibykyhy tsibik mytsyhyrytsa asiba nisipykze kytsa izumunaha. Zinaro tsihikiknaha Sakarias ty izo naro ty zinaro tsihikiknaha.

⁶⁰Ije ispe niy: — Batu zik. Sakarias humo batu inaro tsihik. Inaro babaka Suão — niy.

⁶¹Iwaze ipe niaha: — Ikiatsaktsa zik anahumo ka batu atukytsa naro kok — nikaranaha.

⁶²Niahatsahi izo pe niaha. — Askyrywy sa tsipinaro — niaha. Sakarias niharerebyitahi iwaze kytsa ibo tahatsyhyrypetsa ty ziwatawykynaha zuba.

⁶³Niytahi Sakarias kino: — Kabo iwatahawy ty nynytynaha — niy. Hyỹ niaha. Iwaze ziwataha — Inaro ka Suão. — Aparakbaha paikpa iktsa nikaranaha sipybyrẽtsa nikaranaha.

⁶⁴Iwazebabatu Sakarias inataharerezo. Tsakurẽta. Iwaze nipamykysokozo. Deus pe niy: — O Deus ikiahi tsamysapyrẽta — niy. Iwa Deus bo nipamykysoko.

⁶⁵Iututsa pauktsitsa iwaha pokso hi sipybyrẽtsa nikaranaha. Nanabyitaba wasaniha Suão soho nitsasokonaha. Harakoso Sudeja eze tuze Suão soho ty nipamykysokonaha.

⁶⁶Ziwabynahaze mytsaty nikaranaha: — Hawa sa ibykyhy mozik Deus zikwy ituk mynapykyryk — nikaranaha.

⁶⁷Iwaze niytahi nipamykysoko. Deus hyrikoso ituk ziknapykyryk. Iwatahi nipamykysoko. Atahi:

⁶⁸— Ikiahatsa Deus bo tsimypamykysokonaha. “Ikia hi tsamysapyrẽta. Ikia zuba wasani tsimykara. Iwaze ikia soho humo myharereziurẽtsa tsimaha” niy. Kyze Isareu tsekokatsa, Sudeutsa Deus humo myspirikporẽtsa. Katsaktsa Deus humo myharereziurẽtsa. Deus tyryktsa tsimoziknaha. Ata kino tatyryktsa bo mymyoktyhyryk — niy.

⁶⁹Deus mymyoktyhyrykta mybo myzipeha. Mymyoktyhyrykta Dawi tsekokatsa iknykta. Dawi mydiri Deus tsumuẽhĩtsa.

⁷⁰Tubabatu Deus simysapyrẽtsa bo nitsasokonaha asahi Deus harere sohokotsa nitsasoko:

⁷¹— Deus ispirikze iharerebaba mymyoktyhyryk. Iwatahi mysukyrytsitsa ba zik mybanaha. Iwaze kytsa myhumo siakyriukrẽtsa ba zik mybanaha.

⁷²Deus mydiri humo tsimypokzitsiukrẽta. Katsa myhumo niwatihi tsimypokzitsiarẽta.