Rukaaso 1:54-72

⁵⁴Ari kua kutaivaa nnaaru ti taato nnaakukiaiya kiaa mmuuvaa iinno ari mmoori vareera gioonna kiaapu Isarairaiya tasipama varuduu iya yoketaama variravai.

⁵⁵Ivo Aaparahaamaaraata ari uru nnaakaraiyaraatama hama taunniravai. Iyara tupatupaa boo tiravaivee.

⁵⁶Mariaava itaa kua kiaa taika kioo Irisaveetaa tasipama varioonnonno taaravooma kuraaga taa kioo ari yoosinnara viravai.

⁵⁷Mariaava vuduu Irisaveeto nnaakara mmataanara suaivo vainima nnuduu mmaapuvai mmateeravai.

⁵⁸Mmata kiooduu mmuaa yoosinna varuuyaata ari seena tuanaiyaatama Anutuuqo innara kaayauma boo tuduu nnaakaraivaa mmata kioo kuaivaa rikiada inna tasipama sirigairavai.

⁵⁹Sirigama kiooduu varududuu suaivo yaaku saivai sainaidiri taaravooma suaivo nnuduu rikiada gioonna kiaapuuya nnaakaraivaa mmammaivaa hatokaara nnida ari koonna nnutuuvaa Sakariaaso innara kiaara uuduu

⁶⁰ari kaanoono ooqoo tioo tunoo: Sa itaa kua kiatee. Inna nnutuuvo Yuvuaanovee,

⁶¹tuduu rikiada inna tunoo: Hama i seena voovoono aa nnutu aavaa varaivaivee,

⁶²kiaa kiada iya ngiari yaakuuyauvaadiri koova inna nnutuuvaa kiaiveera mmata mmatairavai.

⁶³Mmata mmatauduu too Sakariaaso yanaivau fafaara raanaraivaara tuduu oro varada inna mmuduu fafaara roo tunoo: Inna nnutuuvo Yuvuaanovee, tuduu rikiada mmuakiaaya kaayauma nnikiarairavai.

⁶⁴Iya nnikiarau saivaata Sakariaasaa mmaakiriivo korooduu kava kua tioo Anutuuqaara kua yoketaivaa tiravai.

⁶⁵Tuduu inna seena mmuakiaaya nnikiaraida aatuuda variravai. Varuduu mmuakiaa gioonna kiaapu Yutayaa mmataivau kaayau taapi suvuauvaki varuuya ii mmayaaya ivaa rikiada kaayau kua tiravai.

⁶⁶Kua tida ngiari yaata tinniyaa vau kuaivaa yaata utida tunoo: Aa nnaakara aavo yokeenno fai dee mmoorivai iinarannee? kiaa kiada Udaanga Anutuuqo inna tasipama varuuvaa rikiada itaa kua tiravai.

⁶⁷Nnaakaraivaa koonna Sakariaasaa aakiaivaki Mmannasa Yoketaivo suvuai kiooduu iva nnaagiai varinaraivaara kuaivaa kiaa kookieema kioo tunoo:

⁶⁸Kii ta gioonna kiaapu Isarairaiya Udaanga Anutuuqaara kiaara: Yoketaavaivee, kiaaravee. Ivo ari gioonna kiaapuuya ti tasipama iinno ti mminnamminnaa maisaiyauvaa irisaivaa yapaivaara ta innara kiaara: Yoketaavaivee, kiaaravee.

⁶⁹Vaa ivo ari mmoori vareera vaidiivaa Davuitiinna oyaivakidiri vaidi voovai vita yapa kiaikio fai ivoono yaagueeqama varioo ti vitoo aataru yoketaivau ti yapaanaravai.

⁷⁰Ivaara Anutuuqo nnaaruaa vaidi forofetaa yoketaa tuanaiya ari kua kutaivaa kiaa mmioo tunoo:

⁷¹Na ngii nnammutuaiya yaataree mmuakiaa gioonna kiaapuuya hama ngiiiyara mmuduuya ruaiya yaataraanaravaivee,

⁷²kiaa kioo tunoo: Na ngii taato nnaakukiaiyara boo kiaivaara na kua kiaa teerama kiaivaa fai na iinaravaivee. Na kua yoketaa tuanaivaa yeena rau kioovaa iya kiaa mmuuvaa hama taunnukiaanaravaivee,