Ruku 1:54-72

⁵⁴Kotiva nai kyauqu nriqiqaa vatero timwa tai quara vataqiro viqaro tiri Isareri nraaqiara kyaahaqa hirave. Mwiva haaru Evarahaamunranra tiqaro, Nte iaravata, i nraisi mwihuaravata, ekyaa enta ekyaa enta po tina kyuqemaqina virerave, tu quara hia taunru kyairave, tiro.

⁵⁶Mariaava mwitaa timwa kyero Irisavetikya variqiro viro taarampo tora vara kyero nrumu ntantero nai mwaatani vurama.

⁵⁷Irisavetiva nraaqiara mwataari entava nri ntovaro mwiva mwi entara qoraisi nraaqiara mwata kyora.

⁵⁸Mwata kyovata mwia nramwunaahuavata, mwi mwatanaahuavata, riovaro Kotiva Irisavetirara kyuqe huvata mwihua uro Irisavetiravata variqata nraaqiara mwianra qamwatarerata nrunra.

⁵⁹Mwihua nri ntovaro 8 enta nritarovaro mwi nraaqiarava qoraisi nraaqiara varuvatara tita, mwia mwamwanta toqarerata ntuvaantuama vita. Ntuvaantuama vita variqata mwihua mwia nrutu nteqata mwia qora nrutu Sekaraiaavave qiare tuvaro

⁶⁰mwia nrova qaqao tiro, Nte mwia nrutu Ionivave tirerave, tiro.

⁶¹Mwiva mwitaa tuvata mwihua tiqata, Hia i okyaraqi mwi nrutura vahirama e mwi nrutura ntaaro, tita.

⁶²Mwitaa timwa kyeta mwihua Sekaraiaaraqaa kyauqu piaateqa mwia kyapara hita, E ena mwaaqu nanra nrutuve mwinanrave? tuvaro

⁶³Sekaraiaava kyauqu piaateqaro pepaa vara mpiate tuvata pepaa vara mwuvaro Sekaraiaava mwataama kyero qara ntiro, Mwia nrutu Ionivave, tiro. Mwitaama qara ntumwa tovata mwihua nrihanrama vita.

⁶⁴Nrihanrama vuvaro qamwanrama Sekaraiaara nrovanto qatua vuvaro mwiva qio qua tiro. Mwiva qio qua tiqaroma Kotira nrutu tuaaherero.

⁶⁵Mwitaa ti varuvata mwia nramwunaahua mpoqama kyeta aatu hi varurama. Mwi quava ekyaa Iutiaani vuvata

⁶⁶nai timwa mwi nai timwa mwi hita tiqata, Mwi nraaqiarava nataa hiari vaisivave variananrove? tita. Mwihua taqovaro Kotiva kyaahaqa hi varuvaro mwi nraaqiarava varurama.

⁶⁷Kotira mwanraquravanto mwia qora Sekaraiaara kepukyaqama kyero kyaahaqa huvaro mwiva Kotira qua mwataama tiro:

⁶⁸Kotiva nronravanto tiri Isareriqaa ntaqikyi varivave. Nrivaqe mwia nrutu tuaaheraare. Mwiva tiri nai nraakye qora kyaahaqa hiro huvantu kyarero nriho.

⁶⁹Kotiva tiri haivaqara Ntevitira nraisi mpo vara mwaamwianrama taiharo mwi vaisiva kepukyavanto variqaro tiri huvantu kyairaqe qio variare.

⁷⁰Haaru Kotiva kyaahaqa huvata mwia kyaiqa vaisinramwu mwia qua qovarama kyeta nraakye qora timwa nyiqata

⁷¹Kotiva mwitaa tiho tura, Nkyi nramwutaahua nkyi ru kyevorave tinama, nte nkyi kyaahaqa hirerave. Nkyi uaqiama nyate varihua nkyiqa ntaqikyiqi vivorave tinama, nte nkyi huvantu kyarerave turave.

⁷²Kotiva tiri haivaqahuara tiqaro, nte nkyiara po timwa nyatena nte nkyivata variqana qua vataura hia taunru kyarerave, turave.