Luk 1:54-72

⁵⁴Aţënk bañaaŋ biki *Iŧrayel balemparul, ji kahoŋ ki abiiŋ ado başinun, aleş ţi mñaga mi nul, *Abraham na pntaali pi nul, te mnţo. »

⁵⁶Mariya aţo na Eliŧabet uko ji kli kwajanţ, abaa wugşa, aţiiş katohul.

⁵⁷Wi unuur wi Eliŧabet awooŋ i kabuk ubanuŋ, aţij napoţ ñiinţ.

⁵⁸Bakinţul na bayiţul, baŧiink kë Naşibaţi ayuuja mnñaga, aşë wo ţi mnlilan na a.

⁵⁹Unuur uţënk bakreŋ, babi pwalan napoţ *kaŧëmp, kaşë kaţu'a katim ki aşin : Ŧakariya.

⁶⁰Kë anin aşë pok, aji : « Naţu'ana katim ki *Yowan »

⁶¹Kë başë ŧeema aji : « Nin aloŋ ţi bayiţu aanwo wo katim ki Yowan. »

⁶²Kë başë du aşin, ahepara na iñen katim ki aŋaluŋ baţu abukul.

⁶³Ŧakariya ado kë baŧemana iko ipiiŧi, aşë piiŧ aji : « Awo katim ki Yowan. » Bañaaŋ kë başë ñoŋar bŧi.

⁶⁴Ţi dko mënţ mntum manhaabşa na a, pndemënt kë pafënşaa, kë aşë jun pţiini, abeeb Naşibaţi.

⁶⁵Bakinţul bŧi balënk, abot añoŋar. Kë iko inţëpuŋ yuŋ imeeţana, aniink uŧaak unwooŋ du inkuŋ du *Yuda bŧi.

⁶⁶Bañaaŋ bŧi bahank iko yi baŧiinkuŋ du ŋhaaş, aşë ji : « we wi napoţ i akluŋ kawo? » Mnhina mi Ajugun manwo na a na manjoonan.

⁶⁷Kë *Uhaaş wi Naşibaţi uşë bi, aneej aŧum ţi Ŧakariya aşin napoţ, kë awo ţi pţup ji *baţupar Naşibaţi aji :

⁶⁸« Najoh ŋdëman Ajugun, Naşibaţi i *Iŧrayel ţiki abi ţi nja, pbuuran bañaaŋ biki nul.

⁶⁹Anaţan pa un, ţi biki pşini pi *Dayiţ nalemparul Nabuuran i phina pweek,

⁷⁰Jibi abiiŋ aţup ţi mntum mi baţuparul bayimanaan bajon.

⁷¹Aji ankmbiiŋ, aluŋ kabuuranun ţi başooradun, aluŋ kapënanun ţi iñen yi bampokuŋ un bŧi.

⁷²Hënk, Naşibaţi adiiman mnñaga mi nul ţi bateemun aşë leş kahoŋ kayimanaan ki adoluŋ.