Luk 1:54-72

⁵⁴Ghe sausila kapuna tau ngai nongonongo anna atoa ta Israeli etoa, poli eannaa alousiusiaane

⁵⁵ta Abraham me lo atoa tuvuna auena la lutu, nongina ghe auliaala ta tuvuita atoa.”

⁵⁶Meri ghe toka teela Elisabet ghe roola kotolu ulana me ghe vira mene kiriaa lao sio tanganuena.

⁵⁷Nauna Elisabet tani molenaa, me ghe molenaala aliki eteva taita ia.

⁵⁸Lo atoa taumattu tanganueira aitauaa me kapuna atoa, laghe nongola kiukiu vaalua Vau eteva aalousiusiaane ta Elisabet. Laghe masimasi eitauaa teeiela.

⁵⁹Aiaaghaoaluna (8) ateva nau, taumattu ngatoa laghe mae sio tani velu eitauaa tani iso aliki eteva, me laghe aloanna tani ase ararina ateae ta Sekaraea, poli ararina ia tamane.

⁶⁰Kinna aliki eteva ghe uela va, “Karika! Ararina ateae ta Jon.”

⁶¹Me laghe uela etana va, “Karika teva kapuimim ararina ia arari eteae ona.”

⁶²Me laghe aaimatoonga ta nimaira tani kolomi tamana aliki eteva va saa arari eteae eaaloannaia.

⁶³Sekaraea ghe aimatoongaala etaira va la ghaa taula teva aipitipiti me epiti inangarina. Inangarina ghe pitila ghe uela va, “Aliki eteva, ararina ateae ta Jon.” Taumattu ngatoa laghe soghiaala voto laghe tarala.

⁶⁴Arovaeaata ta God ghe otila paane ateva Sekaraea, me Sekaraea ghe samala, me ghe mene tiuaala tani sama me ghe tau saela ararina ateae God.

⁶⁵Me lo atoa masaliki kalakalangina ila laghe tarala isaa o voto ghe lutula, me ghe moilala, me kiukiu ghe kasu ekapa seela, me lo akapa atoa laghe tokatoka tale voto ateva oroi motouru etana eJiudia, laghe nongo akapala.

⁶⁶Lo akapa atoa taumattu laghe nongola, laghe nnaa sosso laala isaa o kiukiu, me laghe aaikolomieinila va, “Aliki eteva oia, aue saa taumattu nau enamuu?” Poli laghe tarala va sarasarakaniaane Vau eteva ghe toka aitauaa teeiela.

⁶⁷Spirit Manga ateva ghe pasula ta Sekaraea, tamane aliki eteva, me ghe aulia ngamuemua alokoila inangari tani ue va,

⁶⁸“Ita tau sae ararina ateae Vau eteva, kapuira Goto ia Israeli etoa, poli ghe mae sio tani sausi kapuna taumattu ngatoa me ghe poli aoghi teeilala.

⁶⁹Ghe tau mae sio kateva taumattu sarasarakanaaili ia tani sausita elome ta tuvuna atoa Deivit, kapuna tau ngai nongonongo anna ateva God.

⁷⁰Nongina ghe gheleila inangari nialokoi ta propete atoa manga ila me ila laghe auliaala emua arau,

⁷¹va aue easaangita ta tau ngai ssateeita atoa, me ta nimaira lo atoa esessaieiliila etaita.

⁷²Ta poli aalousiusiaane ghe sausila tuvuita atoa, me eannaa inangari manga emua arau ghe aulia ngalokoila