Luke 1:54-72

⁵⁴Ngkwey rang angerrepat Abraham Israel-areny map thwen alhelekarl-arteh, lakenh rang inenh mantj-mantj arntarnt-arentjekarl, inehenh peltj ingkern-penh map thwen. Rang kweteth nwernenh arntarnt-aretjart, nwernenh kangkentjel anyenetjart, angwerretj-kwenh. Rang kweteth nwernenh arntarnt-aretjenh.” Lakenh Mary rang kangkemel angkek.

⁵⁶Mary-emeh Elizabeth-el-arleng anyentj rrpwetjeh-atwetj kwet-irrek. Kwereng Mary mer kwerenh-warn angkep alpek.

⁵⁷Kel arrpenhel Elizabeth-henh kwer rrwey rang ngwerrm-irrekemeh.

⁵⁸Tjerrtj mer-areny mapel angketj awek, Elizabeth-henh peltj mapel thwen. Inang arrken angerr awelhek, Ngkart rang Elizabeth kwer ltarrp-irrekarl, renh kwer rrwey anthekarleng.

⁵⁹Rrwey rang arltang 8 anekarleng, peltj map petjek Zechariah Elizabeth kwer-atherrel-ayeng anetjeh, inang kwer rrwey renh artwang-iletjeh-anngernt. Moses-henh mpwareng-areng-angkwerr kwer rrwey renh arltang 8-eng artwang mpwaretjeh-anngernt. Peltj inang ahentj-anek, kwer rrwey Zechariah anewetjeh, arreny angey kwerenh-arteh.

⁶⁰Matj kwerenhelemeh inenh arnpakemel ilek, “Itja, renh arreny John anewetjeh.”

⁶¹Inang tjweker-irrek, renh arreny John anewetjeh. Inang angkek kwer, “Peltj ngkwengenh arrpenh itjemeh arreny alenh-akert anem.”

⁶²Inang Zechariah renh iltjem-iltjemel pawenhek, “Arreny wenheham ntwang ahentj-irrem, ler ngkwengenh anewetjeh?”

⁶³Zechariah iltjem-iltjemel inenh ilek, inang kwer arnang anthetjeh, rang angketj mpwaretjenh lwerenh-akertel. Arnang kwer-warn rang mpwarek, “Rang anem arreny John.” Inang nhenh aremel inang anwerlkek.

⁶⁴Kwereng Zechariah-henh aleny mwerremeh angkerl-anek. Zechariah rang angkek, Altjerr renh nakemel.

⁶⁵Tjerrtj kwerel-ayel anekarl map inang angerr anwerlkek, kwer-penh inang angketj nhenh-penh ilerl-apek mer arrpenh mapel. Tjerrtj ingkerrek inarl pwert-pwert Judea-angkwerr anetjart angketj nhenh-penh inang angkerrek.

⁶⁶Inang angketj nhenh-penh kwet iterretjam, inarrpemeh pawenherretjam, “Kwer nhenhemeh nthakenh irretjenh?” Inang alhengk-arek, Ngkartel renh karemeng.

⁶⁷Kwerrern Alngaltar rang Zechariah-warn irrpek. Zechariah rang inenh Altjerr-henh angketj ilek,

⁶⁸“Nwern Ngkart renh kangkemel naketjeh, rang tjerrtj Israel-areny map-henh Altjerr anem. Rang nwerneh-warn tjerrtj arlaltj kwerenh map-warn tangetjel petjek, nwernenh anetjeng rrkwetjeh.

⁶⁹Rang artwang Iteth-ilenh-ilenh nwerneh-warn lanthetjenharl, twer angerr-akert, nwernenh iteth-iletjenheng. Artwang nhenh rang David-henh peltj mapeng ingkern petjetjenharl.

⁷⁰Ngkweyeng-ntjel rang angketj angenh-angenh kwerenh mapel-arleng nwernenh alhelekarl wart,

⁷¹rang nwernenh tjerrtj ngkwantj-irrenh-irrenh mapeng rrkwetjenh.

⁷²Rang nheng angerrepat nwern-henh map alhelekarl, rang ineh ltarrp-irretjenharl. Lakenh rang ineh mernelhek. Rang nwerneh kweteth iterrerl-anem, rarl ngkwey alhelekarl wart.