Ruk 1:54-72

⁵⁴Fu usuibe Eburam ga uifarif fuon vuak ma iji fu ifejdiakro kiainma iji fun ijekma aresredo fu bu ifejdiak. Regavo fum efuon Isrerko ijiebuon oifian abene mardiain. Ijefuon maiji fu Eburam ga uifarif fuon iji fu ifejdiakafa kiainma ijefuon fu buon oifian abene tavan uruvana bu mardiaknum ifejdiak.

⁵⁶Meri fu asam nokbek (3) Erisabetk fine fun una ai fuon ijia vain.

⁵⁷Ijegreare Erisabet fun tavan iji fu amfuon nafekfuon iji rokga fun am farif nafen.

⁵⁸Fu am iji nafega e ai samaij ijia karinva iji abevo kaifijaf uruvana bu ire mukor iji E Bomana fu bara Erisabeton renma iji faime buka fuon bomana oimaren.

⁵⁹Ijegreare fun naki eit (8) barekoga bun am iji abe vajai fuon ijia anf abedeme abe asoifuon Zekaraia nabui kuai vierafen.

⁶⁰Bu ijeg vierafen gavo asiefuon ijar uzame kia, Na if fuon iji na Jon kuakro vierafenvano kiain.

⁶¹Fu ijeg kuardiamga bu una kua, E uifarifon ijia if iji fu bano kuain.

⁶²Ijegreare bu uri asoifuon imut ijia nijaime kua, A vierafega no am igi no era kuakno kuain.

⁶³Bu ijeg kuardavga Zekaraia fu uri imut ijia nijaidiame fefafuo kiamga bu abe mavga fu ijia isoime kia, If fuon Jon no kiama e uruvana buka oiserdiain.

⁶⁴Areme tavan ijia Zekaraia fu una vuak kuaime uri Godon if abe ajieme fu oimardain.

⁶⁵Ijegrekoga e ar samaij ijia karioinva iji buka oiserdiamga bu uri vuak iji abe Judia guf ijia kuardiame vain.

⁶⁶Rega e uruvana bu vuak iji faime dab karine vierafeknum kuai, Am iji kafu rad irerag abek? Ijefuon maiji no samakaf gaga Godon daro iji fun fusikno kuain.

⁶⁷Jonon asoi Zekaraia fu Godon Kaven ijar oifuon ijia arimga fu uri Godon vuak ma igi kuai.

⁶⁸No E Bomana ga e Isrerkobuon God ijefuon oimare vo ifuon abe ajiek! Fur efuon bu ise ijar kuniaim girenma ijia ifejdiaknum karauniakafa ruain.

⁶⁹Godri nuvuifuon e darokin iji fur no karaunuokfuon iji kuamga fu ruain gavo fuiji fu e Devid e Godon ikreno ijefuon uifarif.

⁷⁰Regavo usuibe e akai Godon vuak vierafene kuaivo iji bu ijeg kuain.

⁷¹Fur e ani iji bu nuvuon isemareknum ziegafuovo iji fur karaunuokno kuain.

⁷²Regavo Godri sai nuvuon Eburam ujuime kua, Nar unam akai iviamkor ja nana besum rekfuon iji vierafene kuainvado na uifarif on iji oijmiame ifejdiakno kuain.