LLUKU 1:54-72

⁵⁴Yuni olionga pulu-pulu anda-kolepalimando “Sembó.” nimba, nimba panjerimu ungumu komu naa sipa pilipa molopale anda-kolepa Eporayamo kinia, Eporayamo yuni yandopa yandopa kalopa liltimu yomboma kinia, onondo “Sembó.” nimba, nimba panjerimu mele sembando olio Pulu Yemo yunga kendemande Isirele yombo molemolo akuma yuni kondo kolopa lipa tapondomba sepa molemo.” nirimu.

⁵⁶Maria Ellisapete kinia pea molangili oli yopoko omba purumu kinia pe Maria yu yunga ulka-koleando kelepa purumu.

⁵⁷Ellisapete bolango membá walemo wendo orumu kinia yuni kango se kanopa liltimu.

⁵⁸Yunga ulka kere pongolo yomboma kinia yunga pulu lierimu yomboma kinia Ye-Awilimuni yu kondo awili sepa kolorumu mele pilkuli ono yu pea konopu siku moloringi.

⁵⁹Wale yopoko-pakara kangomo kanopa lipa taltopa molorumu kinia wale engaki-sipamonga yomboma sukundu sukundu ongo maku tokole yunga kangi se kopisiku makaye seko wendo liku eltokole niringimuni, yunga imbimu yunga lapanga imbi manda manjiku “‘Sekaraya’ niemili.” niringi.

⁶⁰Aku-na-kolo kangomonga anumuni “Mólo.” nimbale “Yunga imbi ‘Jono’ nimulú.” nirimu.

⁶¹Onone yundu ninguli: “Olonga pulu lemó yombo senga imbi aku sipa naa molemo.” niringi.

⁶²Kanu-kinia onone “Lapane nambolka konopu lekemone, yunga imbi lepa nawe nimbáne, mangilipu piliamili.” ningu lapando kimuni manda manjeringi kinia

⁶³yuni pundu topa kimuni manda manjipa “Boku se siee.” nimbale, yuni bokuna topa nimbale: “Yunga imbi Jono.” nirimu. Akumu kanokole yombomane paa konopu awisili lieringi.

⁶⁴Kanu-kinia waltikele Sekaraya yunga kerena kelepa ungu nimbale Pulu Yemo kape nirimu.

⁶⁵Aku serimu-na kanokole yunga ulka kere pongolo yombomane pipili paa koloringi. Kolea Judia disiriki ma-pangima polorumu koleamanga pali aku semanemo mindi tolko puringi.

⁶⁶Aku ungumu pilieringi kinia yombomane pali konopu kimbu siku ninguli: “Ungu akumu we naa selemo. Ye-Awilimu i kangomo-kinia molombamonga aku sekemo lémo.” ningu pilkuli “I kangomo pe nambi sepa molombanje?” niringi.

⁶⁷Mini Kake Sélimu Jono lapa Sekarayanga konopuna omba molopa manda serimu kinia Sekaraya yuni Pulu Yemone ungu-umbu tondorumu ungu se pilipa, pe wendo ombá mele yomboma nimba sipa nimbale:

⁶⁸“Ye-Awilimu, Isirele yombomanga Pulu Yemo, yu kape nimbu imbi ambolopo paka tondamili. Yu omba yunga yomboma lipa tapondopa umbuna sene ono ambolorumu-na mindili nongo moloringi kanu umbunamonga wendo límu-na pilipuli yu kape nimbu imbi ambolopo paka tondamili.

⁶⁹Pulu Yemo yuni yunga kendemande-ye ⸤olionga ye nokoli kingi⸥ Depitini kalopa liltimu yombomanga ye tondolo peli se olio ‘Lipa tapondopa mindili nombo molopo kinjilimulu aulkana wendo lipa, manda molopo kondomolo aulkana lipa mondopili.’ nimba simu.

⁷⁰(Yuni ungu-umbu tondorumuma pilku yando ningu siringi yemane pe sembamondo koronga-u ninguli:)

⁷¹“Yuni olio lipa tapondopa olionga opa-touma topa mundundupa, olio kanoko kiri pilku mindili silimili yomboma ‘Aku siku naa sangi. Wendo ongo manda molangi.’ nimba aku siku selemele aulkana wendo limba.” niringi mele kiniá aku sembá sekemo.

⁷²Olionga anda-kolepalima kondo kolopa, olionga pulu-pulu anda-kolepa Eporayamo-kinia “Sembó.” nimba, nimba panjipa mi lierimu mele “komu naa sipu, nirindu mele sambo.” nimbale aku sembá sekemo.