LLUKU 1:54-72

⁵⁴Yuni olionga pulu pulu anda kolepalimendo “Tembo.” nimbe, nimbe panjirimu ungumu komu naa sipe pilipe molopalie, ⸤anda kolepa⸥ Eporayamo kinie, Eporayamo yuni yandopa yandopa kalopa lirimu yamboma kinie, enendo “Tembo.” nimbe, nimbe panjirimu mele tembando olio Pulu Yemo yunge kendemande Isirele yambo molemolo akuma yuni kondo kolopa lipe taponjimbe tepa molemo.” nirimu.

⁵⁶Maria Illisapete kinie pea molangili oli yepoko omba purumu kinie pe Maria yu yunge ulke koleando kelepa purumu.

⁵⁷Illisapete ambolango memba walemo wendo orumu kinie yuni kango te kanopa lirimu.

⁵⁸Yunge ulke kere pongolo yamboma kinie yunge pulu lerimu yamboma kinie Ailimuni yu kondo aili tepa kolorumu mele pilkulie ene yu pea konopu siku moloringi.

⁵⁹Wale yepoko pakara kangomo kanopa lipe nosipe molorumu kinie wale engaki sipemonga yamboma sukundu sukundu ongo maku tokolie yunge kangi te kopisiku makaye teko wendo liku ele tekolie niringimuni,* yunge imbimu yunge lapanga imbi manda lelko “‘Sekaraya’ niemili.” niringi

⁶⁰nakolo kangomonga anumuni “Molo.” nimbelie “Yunge imbi ‘Jono’ nimulú.” nirimu.

⁶¹Enene yundu ningindu: “Eltenga pulu lemo yambo tenga imbi aku sipe naa molemo.” niringi.

⁶²Kanu kinie enene “Lapane nambolka konopu lekemone, yunge imbi lepa nae nimbéne, walsipu piliemili.” ningu lapando kimuni manda leringi kinie

⁶³yuni pundu topa kimuni manda lepalie “Boku siei.” nimbelie, yuni bokuna topalie nimbendo: “Yunge imbi Jono.” nirimu. Akumu kanokolie yambomane paa konopu aisili leringi.

⁶⁴Kanu kinie walsikale Sekaraya yunge kerena kelepa ungu nimbelie Pulu Yemo kapi nirimu.

⁶⁵Aku terimuna kanokolie yunge ulke kere pongolo yambomane pipili paa koloringi. Kolea Judia disiriki ma pangima polorumu koleamanga pali aku temanemo mindi toliku puringi.

⁶⁶Aku ulumu piliringi kinie yambomane pali konopu liku mundukulie ningindu: “Ulu akumu we naa telemo. Ailimu i kangomo kinie molombamonga aku tekemo lemo.” ningu pilkulie “I kangomo pe nambe tepa molombanje?” niringi.

⁶⁷Mini Kake Telimu Jono lapa Sekarayanga konopuna omba molopa kapola terimu kinie Sekaraya yuni Pulu Yemone ungu umbu tonjirimu ungu te pilipe, pe wendo ombá mele yamboma nimbe sipelie nimbendo:

⁶⁸“Ailimu, Isirele yambomanga Pulu Yemo, yu kapi nimbu imbi ambolopo ola linjemili. Yu omba yunge yamboma lipe taponjipe umbuni tene ene ambolorumuna mindili nongo moloringi kanu umbunimunge wendo limuna* pilipulie aku teamili.

⁶⁹Pulu Yemo yuni yunge kendemande ⸤olionga ye nomi kingi⸥ Depisini kalopa lirimu yambomanga ye tondolo peli te olio ‘Lipe taponjipe mindili nombo molopo kenjilimolo aulkena wendo lipe, kapola molopo konjimulú aulkena lipe monjipili.’ nimbe simu.

⁷⁰(Yuni ungu umbu tonjirimuma pilku yando ningu siringi yemane pe tembamondo koronga ou ningindu:)

⁷¹“Yuni olio lipe taponjipe olionga opa touma topa mundunjipe,* olio kanoko keri kanoko mindili silimele yamboma ‘Aku siku naa teangi. Wendo ongo kapola molangi.’ nimbe aku siku telemele aulkena wendo limbe.”* niringi mele kinié aku temba tekemo.

⁷²Olionga anda kolepalime kondo kolopa, olionga pulu pulu anda kolepa Eporayamo kinie “Tembo.” nimbe, nimbe panjipe mi lerimu mele* “komu naa sipu, nirindu mele teambo.” nimbelie aku temba tekemo.