Luk 1:54-72

⁵⁴In i gisesan hel diqmo gibilenim bilam, Ya Abraham teq in ago dauh abeb bol daqayta na tuteqmo ya inad tinegdaiq haqad in bilamta ham. Ad muran in gamuk bilamta na anadin a ta emad in ago on mataw Isrel tigilumsihaq ham. In gamuk bilamta nazaqmo diq in muzinim tiqemaq ham.

⁵⁶Ari Mariya in Elisabet inaq kalam ezeqman nazaqmo osim teq in ago uliqab muleqim ta lah.

⁵⁷Ari Elisabet amun emgo akaman tugwahtiqan in amun matta araq tiqam.

⁵⁸Eman Iyahta in Elisabet anan anad ayahmo meqniysa amun ugta na ago Elisabet asenlul teq in ayogniz tuhuritiy. Huritim in Elisabet inaq ginad tidimniy yaqay.

⁵⁹Sa abeb amun na ago kam 8 nazaq tiqiyan teq mataw in amun ahol abatan asan urotnan tuboliy. Bolim in amun aholnan ugnan haqad in amun amammo anan ugnan bilaqiy.

⁶⁰Bilaqan teq amun anen bilam, Haiqgam ham. In anan Jon-mo usdaqta ham.

⁶¹Haqan mataw na buloniy, Ni nisenlul araq aholnan nazaqta haiq haqiy.

⁶²Haqad in ta amun amam kabiyakibmo susumun ugiy, I amun ka anan doqagta biyam? haqiy.

⁶³Haqan amam kabiyakibmo gibilenan in ay anabun araq teq zamor asor ugan in gamuk kazaq mar ton. In anan Jon ham. An mataw na gamuk na ahol waqad gihol riten lam.

⁶⁴Sa muran diq nawaqmo Sekaraya aqez hiqiyim usta na hulos ugan in aqez inaq iyim gamuk tibilaqad in God abin tiqiluwyaq.

⁶⁵Sa Sekaraya awe Elisabet inaq giyogniz bunmo tirab yaqay. Ad in nagah gwahtimta na abin eman saw Judiya-ib uliq bunmo garah ban usaqta nab tileh bug.

⁶⁶Lehan on mataw bunmo nagah gwahtimta na ago huritim in anadin emad os yaqay. Osad in Iyahta ago zaway Jon aholib ussa ahol waqad bilaq yaqay, Amun ka ayah iyeq teq in mat ezaq diqta iydaq? haq yaqay.

⁶⁷Ari God ago Bugaw Dimunta in amun amam Sekaraya aholib ayahmo bol. Bolan God in Sekaraya anad ugan Sekaraya aqezab gamuk gwahtiqsa in kazaq bilam,

⁶⁸I Iyahta God abin iluwuq ham. In ago on mataw Isrel nob negim in gizayim in gigo bab gibenab tigiwaqaq ham.

⁶⁹In mat araq awaz meqinta eman in ago kabibiy mat Devit asenlulib tugwahtim ham. Gwahtiqim in teq i gilumsiheq giwaqid i dimunmo tuqosam ham.

⁷⁰Kwaziqmo God in ago nantut tawonta nagan giqezab gamuk eman gwahtimta nazaqmo in tiqam ham.

⁷¹In mat awaz meqinta na eman gwahtiqim in i gilumsihsa i gibabun a hi gimeqin ton daqay ham. Sa in mataw gigem meqinta igayta na gibenab i giwaqid i dimunmo osam ham.

⁷²Kwaziqmo God i gisesan hel diqmo gibilenim bilam, Ya ne ginan inad meqniysa tigilumsihdaiq haqad in bilam ham. Ad muran in ago gamuk na anadin emad in nazaqmo tiqemaq ham.