Luk 1:54-72

⁵⁴Ivëh, keꞌ soe ke voh a kën sipuura pan, ‘Eöꞌ se ururuan e Abraham me ro vuteꞌ peꞌ varih se tavus amot maꞌ, keꞌ nö ko tavus amot na manuh. Pareꞌ nat avoeꞌ e non po ururuan voh peꞌ. Eꞌ to nat e non pa soe vaman neꞌ to soe ke voh a kën sipuura, Ko vaꞌaus en pa napan peꞌ Israël.’” O vaëhëh pe Mariaꞌ to hik en.

⁵⁶Keꞌ teꞌ vaꞌpeh me Lisabet pa kukön sivö, pareꞌ hah en Nasarët.

⁵⁷Ko poen vahuh pe Lisabet öök en, keꞌ vahuh en pa koaꞌ oeteꞌ.

⁵⁸Ka ta vöön peꞌ me o vuteꞌ peꞌ tënan a ö ne Sunön to ururuan va in e Lisabet, ko heꞌ poan e koaꞌ, ivëh, kee pët vaeö me ee peꞌ.

⁵⁹E Jon to onöt non o pöh nënkikiu, kee pe ee pa ö kokoaan peꞌ, pare iu vëhnan ne poë e Sëkaraëaꞌ, pa ëhnan e tamaneah.

⁶⁰Ivëhkëk, e Lisabet to soe pan, “Ahik, ea se vëhnan eah e Jon.”

⁶¹Ivëhkëk, a kën poan e Lisabet to soe ke poë pan, “Ahik voh ta pah teꞌ va po vuteꞌ pën to vëhnan voh non e Jon.”

⁶²Ivëh, kee vauhioꞌ koren me e Sëkaraëaꞌ pan, “O ëhnan poanheh nën se vëhnan e sumuiꞌah?”

⁶³Ke Sëkaraëaꞌ hin poꞌ a tah neꞌ se kiun, pareꞌ kiun vamanih pan, “A ëhnaneah e Jon.” Kee pah kokoman vörep rakah e ne.

⁶⁴Ka varuꞌ rakah vakomanih e Sëkaraëaꞌ to vaato vavih hah en, pareꞌ taneo en pa kë a ëhnan e Sosoenën.

⁶⁵Ka kën poaneah pah vananaöp ee, ko vahutët va pa tah pamëh vatvi vëvëhöꞌ vavah en pa ma vöön kurus to teꞌ ne pa moeh totope va Jiutiaꞌ.

⁶⁶A napan kurus to pënton o vahutët pamëh pah kokoman tamoaan e ne, pare vaiihi e ne pan, “Amot ne koaꞌ vaꞌih se teꞌ non a koaꞌ taeah?” Ee to nat e ne po kikis pe Sunön to teꞌ vaꞌpeh me non poan.

⁶⁷E taman e Jon, e Sëkaraëaꞌ to puh rakah non pa Tuvuh Vasioꞌ ko soe vanënën pan,

⁶⁸“Ea se kë a ëhnan e Sunön Sosoenën va Israël, suk eꞌ to nö maꞌ pa vaꞌaus a ra a napan peꞌ, pareꞌ voen hah a ra.

⁶⁹Eꞌ to vanö maꞌ a pah teꞌ to öt non a tasun apuh va po vuteꞌ va pa teꞌ kikiu peꞌ, Devit, marën a voen hah a ra.

⁷⁰Vamanih pa ö neꞌ to soe vaman vavoh, manih pa rivoeero ro teꞌ vanënën soe voh peꞌ.

⁷¹Eꞌ to soe vaman voh en pan, eꞌ se kon taneꞌ hah a ra manih po teꞌ to vakihat me a rora, me manih po kikis po teꞌ varih to rës ka rora sih.

⁷²Eꞌ to ururuan a kën sipuura, pareꞌ vaꞌaus raoe, ko nat avoeꞌ e non po vatom poan vivihan, neꞌ to nok me voh e sipuura, Abraham.