Lukas 1:54-72

⁵⁴Dia tolong Dia pung orang Israꞌel dong, deng salalu tunju Dia pung rasa kasian sang dong.

⁵⁵Dolu Dia ika janji deng kotong pung nene-moyang, andia baꞌi Abraham deng dia pung turunan samua. Sakarang itu janji ada taꞌika tarús-tarús.”

⁵⁶Ais Maria tenga deng Elisabet sampe tiga bulan. Ju dia pulang pi dia pung ruma di Nasaret.

⁵⁷Bagitu dia pung waktu su sampe, ju Elisabet barana ame satu ana laki-laki.

⁵⁸Itu kabar tasiar pi dia pung kelu deng isi kampong dong bilang, Tuhan Allah su kasi tunju Dia pung hati bae deng kasi satu ana sang Elisabet. Ju dong samua iko sanáng.

⁵⁹Waktu itu ana umur dalapan hari, ju dong sunat sang dia, iko orang Yahudi pung atoran. Dong mau kasi nama itu ana, Sakaria, iko dia pung bapa pung nama.

⁶⁰Ma dia pung mama protes bilang, “Sonde bisa bagitu! Dia pung nama, musti Yohanis!”

⁶¹Ma dong balas bilang, “Kanapa pili nama Yohanis? Sonde ada satu orang ju di bosong pung kelu, yang ada pake itu nama!”

⁶²Ju dong kasi sein sang Sakaria, ko mau cari tau dia mau kasi nama sapa sang itu ana.

⁶³Sakaria sein ko minta batu tulis. Dong kasi, ais dia tulis bilang, “Dia pung nama Yohanis!” Ju samua orang taheran-heran.

⁶⁴Takuju sa, ju Sakaria pung lida yang takancing tu, noe memang. Ju dia angka puji sang Tuhan Allah.

⁶⁵Samua orang yang tenga deka-deka di situ dong, taku deng heran. Ju itu carita tasiar dari mulu pi mulu, sampe orang di gunung-gunung di propinsi Yudea dong ju tau abis.

⁶⁶Orang dong yang dengar itu carita, pikir-pikir bilang, “Su jalás, Tuhan pung kuasa ada sama-sama deng itu ana. Nanti dia bésar datang, dia jadi manusia model ke apa, ó?”

⁶⁷Ais ju Tuhan pung Roh yang Barisi datang maso di Sakaria. Andia ko dia omong bilang,

⁶⁸“Puji Tuhan, orang Israꞌel pung Allah! Te Dia su datang ko tabús ame Dia pung orang dong, ko biar dong jang sama ke budak.

⁶⁹Tuhan su angka ame satu Orang yang Dia pung kuasa hebat, ko nanti kasi salamat sang kotong. Dia tu, dari raja Daud pung turunan.

⁷⁰Tuhan su janji memang ini samua dari dolu-dolu, pake Dia pung jubir yang satia dong.

⁷¹Sakarang Dia mau kasi lapás sang kotong dari kotong pung musu-musu, deng dari orang-orang yang saki hati sang kotong.

⁷²Dia kasi tunju Dia pung hati bae sang kotong pung nene-moyang dong, tagal Dia inga tarús Dia pung janji sang dong, yang Dia ika deng baꞌi Abraham.