Levitikus 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

¹I SOMOL e yog ngak Moses

²ni nge yog ngak e girdi’ nu Israel ni nge ga’ar, “Gag SOMOL ni Got romed.

³Thingar dab mu’uned ko tin ma rin’ e girdi’ nu Egypt ko gin ni um pired riy kafram, ara tin nma rin’ e girdi’ nu Kanaan ni fare nam ni gu be fekmed i yan ngay.

⁴Mu folgad ko pi motochiyel rog mi gimed rin’ e tin kugog ni ngam rin’ed. I gag e SOMOL ni Got romed.

⁵Mu folwokgad ko tin kug duwgiliy ni ngu’um rin’ed nge pi motochiyel ni kug pi’ ngomed; gimed ra rin’ ni aray rogon migmed par ni dabi buch banen romed. I Gag SOMOL.”

⁶Miki pi’ SOMOL e tin ba’aray e gafal: Dab mu pirew be’ ni gimew tabnaw.

⁷Dab mu pirew e chitnam ngam dariy fannag e chitmam. Thingar dab mu dariy fannag e chitnam.

⁸Dab mu pirew bagyad pi le’engin e chitmam ngam dariy fannag e chitmam.

⁹Dab mu pirew walagem ni bpin, ara be’ ni bpin nta’reb e chitmangmew fa chitningmew, ndemturug ko nchugliymew u ta’bang fa danga’.

¹⁰Dab mu pirew be’ ni bpin ni fak be’ ni fakam; ya ra m’ayfam riy.

¹¹Dab mu pirew be’ ni bpin ni kemus ni chitmangmew fa chitininginmew e ba ta’reb; ya ir be’ ni bpin ni walagem.

¹²Dab mu pirew be’ ni bpin ni walagen e chitnam are chitmam; ya fare bpin e girdi’ rok e chitnam ara chitmam nrib chugur.

¹⁴Dab mu pirew be’ ni bpin ni le’engin be’ nib mo’on ni walagen e chitmam ara chitnam; ya kemang girdi’em.

¹⁵Dab mu pirew be’ ni bpin ni figirngin fakam

¹⁶ara be’ ni bpin ni le’engin walagem.

¹⁷Dab mu pirew be’ ni bpin ni ku’um pirew e chitningin fa titaw rok; ya richey ma girdi’em, ma aram e kam pirew be’ ni gimew tabnaw.

¹⁸Dab mu fek be’ ni bpin ni walagen le’engim ni ngkum le’engiy, n’umngin nap’an ni kabfos le’engim.

¹⁹Dab mu pirew be’ ni bpin ko ngiyal’ nib pal, yab ta’ay.

²⁰Dab mu pirew le’engin yug reb e pumo’on; ya ga ra ta’ay.

²¹Dab mu pi’ fakam ni fan ko tayfan ni yima tay ngak fare got ni Molek, ya ra dariy fannag fithingan Got ni ir e SOMOL.

²²Dariy be’ nib pumo’on ni ngar pirew reb e pumo’on; rib fananikay Got e binem.

²³Dariy be’ nib mo’on ara be’ ni bpin ni ngar pirew ba gamanman; ya gathi aram yalen e girdi’, mra ta’ay riy.

²⁴Dab mu rin’ed reb e pi ngongol ney ngam ta’ay niged gimed, ya er e pin’en ni i rin’ e pi’in dar nanged Got ngar ta’aygad, ni pi’in ur pired u daken fare binaw ni yad ba som’on romed ni yad e tulufrad SOMOL nga wuru’ fare binaw, ya nge yag nim marod nga langgin.

²⁵Pi ngongol rorad nem e ta’aynag fare nam, ma aram me gechignag SOMOL fare nam, me gagiyegnag nge par fare nam ni be tharbog e girdi’ ni be par riy.

²⁶Ra ngongliyed urngin e pin’ey nib sonogor ngar ta’ay niged fare nam, machane gimed e thingar dab mu rin’ed e pin’em. Gimed gubin ndemturug ko gimed piyu Israel ara girdi’ nu bang ni yad be par u fithik’med nthingar mu folgad ko fapi motochiyel rok SOMOL nge tin keyog ni ngan rin’,

²⁸ma aram e dabi therbogmed fare nam, ni bod nike thirif e pi’in ur pired riy ni yad mm’on romed.

²⁹Gimed manang ni en nra rin’ reb e pi ngongol ney nib sonogor e yira n’ag ndabki mang reb e girdi’ rok Got.

³⁰Me ga’ar SOMOL, “Ere mu folgad ko tin kugog ni ngam rin’ed ma dab mu’uned ko ngongol rok e girdi’ ni ur pired ko re nam ney ni yad mm’on romed, ma dab mu ta’ay niged gimed ni fan e kam rin’ed reb e pin’ey. I Gag SOMOL ni Got romed.”