1Me yog SOMOL ngak Moses
2ni nge yog ngak Aron nge pumo’on ni pifak ni nge ga’ar, “Thingar dab mmanged tapgin min dariyfannag fithingag, ere mu ted u wun’med nib tabgul e pi maligach ni be pi’ e pi girdi’ nu Israel ngog. I Gag SOMOL.
3Demturug e re mfen nra taw ngay ma ra ba ta’ay reb e pi’in owchemed, me yib nga to’oben fapi maligach nib tabgul nike pi’ e girdi’ nu Israel ngog, ma aram e dakuriy bangiyal’ ni ku ra pigpig ngog ko fare altar. I Gag SOMOL.
4“Dariy reb e pi’in owchen Aron nrayag ni nge kay boch ko fapi maligach nib tabgul ni fa’anra ke yib bm’ar ko dowef ngak, fa be yib logwen dow ni rogon e pumo’on nge taw ko ngiyal’ nike be’ech. Ma ku ra par nib ta’ay ni fa’anra math nga ban’en nib ta’ay ni bod e yam’ ara be’ nib mo’on ni be yib logwen downgin,
5ara ke math nga ba gamanman ara be’ nib ta’ay.
6Demturug e re prist nra ta’ay me par nib ta’ay nge mada’ ko blayal’, ma aram e ku dabi kay boch ko fapi maligach nib tabgul nge mada’ ko ngiyal’ nike maluk.
7Nap’an nra ling e yal’ ma aram e ke be’ech bayay, ma aram e fin rayag ni nge kay boch fapi maligach nib tabgul ni ggan rok.
8Dabi kay e ufin u ba gamanman ni yigi yim’ rok ara ke li’ e gamanman ni malboch; ya ra ta’ay facha’. I Gag SOMOL.
9“Gubin fapi prist ma ngar folgad ko pi gafal ni kug pi’. Ya fa’anra danga’, ma yad ra par nib buch e rorad miyad ra yim’, ni bochan e dar folgad ko fapi gafal nib thothup. I Gag SOMOL e kug thothup nagrad.
10“Kemus ni be’ nreb i girdi’en e tabnaw ko prist e ra kay boch fare maligach nib tabgul; ma dariy yug be’ nra kay boch — ku ra be’ nma par rok e prist ara ma maruwel rok e prist ma dabi kay.
11Tapigpig rok reb e prist ni chuw’iy nga salpiyen ara ba tapigpig nni gargeleg u tabnaw rok, e rayag nra kay boch fapi ggan ni kan pi’ ngak fare prist.
12Fa’anra be’ ni bpin ni fak re be prist ni figirngiy be’ ni gathi reb e prist, ma dabi kay boch fapi maligach nib tabgul.
13Ma fa’anra be’ ni bpin ni fak e prist nike yim’ figirngin ara ke chuw ko pumo’on rok ma dariy e bitir rok, ke sul ke yan i par nga tabnaw ko chitamngin nike mang reb i chonggin fare tabnaw e rayag ni kay boch fapi ggan ko chitamngin nib prist; kemus ni reb i chonggin e tabnaw rok fare prist e ra kay boch fare ggan.
14“Fa’anra kal be’ riy ni gathi ir reb i chon e tabnaw rok ba prist, nge kay boch ko fapi maligach nib tabgul, ma thangri pi’ puluwon ni ga’ngin ngak fare prist ma kura puthuy rliw’ e pasent ngay.
15Fapi prist e dab u ra dariyfan naged fapi maligach nib tabgul
16dab ra paged e yug girdi’ ndariy mat’awrad ni ngar uned i kay fapi ggan; ren’ey e ra girengiy e kireb nge gechig nga daken e cha’ nike kay boch fapi maligach. I Gag SOMOL, e ku gu thothupnag e pi maligach nem.”
17Me yog SOMOL ngak Moses
18ni nge pi’ ngak Aron nge pifak ni pumo’on nge urngin e girdi’ nu Israel e pi gafal ni ba’aray. Nap’an nra pi’ be’ nu Israel ara be’ nu reb e nam ni be par u Israel ba maligach ni mo’oruf, ndemturug ko ba maligach ni ir e ognag nra pi’ fa ba maligach ni ir rok e leamnag ni nge pi’,
19rogon ni yira fanay, e dabisiy ni ba gamanman ndariy bang u downgin nib kireb.
20Fa’anra ga ra pi’ ba gamanman ni bay bang u downgin nib kireb, ma dabi fel’ u wan’ SOMOL.
21Nap’an nra pi’ be’ ba maligach ngak SOMOL ni nge gapaseg thilin Got nge girdi’, ni demturug ko nge lebguy e tin ni micheg ara ba maligach ni ir e leamnag ni nge pi’, ma thangri pi’ ba gamanman dariy bang u downgin nib kireb ni fa’anra nge fel’ u wan’ SOMOL.
22Dab ni pi’ ni maligach ngak SOMOL ba gamanman nib malmit ara ba mugutgut ara ke maad’ad dow, fa bay e malad u dow ni be yib logwen ara ke math’ downgin ara ke for ba m’ar u downgin, fa ke yib e gachal nga dow, ara be fath e biyach u downgin. Dab mu pi’ed ba gamanman ni arrogon u daken e altar ni nge mang ba ggan ni maligach.
23Rayag ni ngam pi’ed ba gamanman ni gathi rib ga’ ma de falfel’ rogon nga ba maligach ni gimed e leam romed ni ngam pi’ed, machane dabi fel’ ni ngan pi’ ni maligach ni labgen ban’en nni micheg ni ngan rin’.
24Dab mu pi’ed ni maligach ngak SOMOL u lan binaw romed ba gamanman nike parde’ gurchen, ara ke math’, ara ke magur, fa ke mogchod bang riy.
25Dab mu pi’ed e maligach ni ggan ni yug ba gamanman ni kan fek rok be’ u reb e nam. Ba gamanman ni aray rogon e ba kireb ma dab ni fanay ni maligach ya dabi fel’uwan’ SOMOL.”
26Nap’an ni yira gargeleg ba fak e garbaw ni pumo’on ara ba fak e saf ni pumo’on ara ba fak e kaming, ma thingar dab ni fek rok e chitiningin ni medlip e rran, ma tomuren medlip e rran mra fel’ ni nge mang ba maligach ni ggan.
28Dab ni pi’ ni maligach ba garbaw nge fak ara ba saf nge fak ara ba kaming nge fak u lan ta’reb e rran.
29Nap’an ni ga ra pi’ ba maligach ni fen e ogmagaer ngak SOMOL, mag fol ko pi gam’ing ney, ya nge fel’ u wan’ e maligach rom;
30mi ni kay ni krofen nem ma dab kum tay bang riy nge mun nga reb e rran ni kadbul.
31Me ga’ar SOMOL, “Mu folgad ko tin kugog ni ngan rin’; I Gag SOMOL.
32Dab mmanged tapgin min dariyfannag fithingag nib thothup; gubin e girdi’ nu Israel ni nge gagyelnag ni gu ba thothup. I Gag SOMOL e kug thothup nagmed;
33me Gag e gu chuwegmed u Egypt ni nggu mang Got romed. I Gag SOMOL.”
