Levitikus 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

¹Ra nge pi’ bigimed ba maligach ni grain ngak SOMOL, ma sam’on e thangri bilig nge yib ni flour. Me tay e gapgep ni olive nge incense nga daken

²me fek i yib ngak fapi prist ni pifak Aron. Ma re prist ni be pigpig e ngiyal’nem e nge suguy lan barba’ i pa’ ko fapi flour nge oil nge gubin e incense, me urfiy e uw i flowa ney u daken fare altar ni aram e ba pow ni kan ognag ni gubin ngak SOMOL. Ma bon e re maligach ni ggan ney e rib fel’ u wan’ SOMOL.

³Ma tin ke magey ko fapi grain e nge par rok fapi prist; pi ggan ney e rib tabgul ya kanfek ko fare ggan nni pi’ ngak SOMOL.

⁴Fa’anra flowa nni lith u lan e ba oven e ngam pi’, ma thangar mu ngongliy ni dariy e is riy. Rayag ni nge par ni bogi lof nni ngongliy ko flour ni kan bilig min aruy ko gapgep ni olive ara bogi kek nib gilgith ni kan liyef ko gapgep ni olive.

⁵Fa’anra ngam pi’ e grain ni kan ngongliy u daken e griddle, ma dabisiy ni tin th’abi fel’ flour ni kan athkuy e gapgep ni olive ngay, ma dariy e is riy.

⁶Ma nge bilbilig nge yochyang me pu’og e gapgep nga daken ko ngiyal’ ni nge pi’, ni aram e ke ognag.

⁷Ma fa’anra flowa e nge pi’ ni nge lith u lan barba’ i ban’en, ma thangri ngongliy ko flour nge gapgep ni olive.

⁸Ma nge fek i yan ni aram e nge ognag ngak SOMOL nge pi’ ngak fare prist, ni ir e bay i fek ko fare altar.

⁹Me fek fare prist boch riy nge urfiy u daken e altar ni aram e pow riy ni kan pi’ ni gubin ngak SOMOL. Ma bon e re maligach ni ggan ney e rib fel’ u wan’ SOMOL.

¹⁰Ma tin ke aw riy e nge par rok fapi prist; pi ggan ney e rib tabgul ya kanfek ko fare ggan nni pi’ ngak SOMOL.

¹¹Dariy e grain ni ngan pi’ ngak SOMOL ni ngan ngongliy ko is; ma thingar dab mu fanayed e is ara honey nga ggan ni ngan ognag ngak SOMOL.

¹²Tin ngan ognag ko tin som’on e grain ni ngan t’ar u reb e duw e ngan fek i yib ngak SOMOL, machane dab ni orfeg u daken e altar.

¹³Mu ted e sol nga daken urngin e grain ni ngan ognag, ya sol e be gagyelnag fare m’ag u thilmed nge Got. (Thingar um ted e sol nga daken gubin e pin’en ni ngu’um og niged.)

¹⁴Nap’an ni yira fek i yib ngak SOMOL e tin som’on ko grain ni kan t’ar ni ngan ognag ngak, ma ngan pi’ e grain ni mo’ oruf ara grain ni kan bilig.

¹⁵Min tay e gapgep ni olive ngay nge incense nga daken.

¹⁶Ma fare prist e nge urfiy e tin kan pirdi’iy nge boch e gapgep ni aram e bpow, ma ku aram rogon gubin e incense, ko ggan ni maligach ngak SOMOL.