Labidakas 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

¹Wal YAWEI det trubala God bin dalim Mosis blanga tok langa ola Isreil pipul. Imbin tok, “Mi na YAWEI det trubala God blanga yumob.

³Yumob nomo bulurrumbat en dumbat nogudbala ting laik ol detlot pipul deya langa Ijip weya yumob bin jidan bifo o detlot pipul hubin jidan langa det kantri gulum Keinan weya ai garra deigim yumob bambai.

⁴Wal yumob garra duwit langa main lowa en dum wanim ai dalim yumob. Mi na YAWEI det trubala God blanga yumob.

⁵Wal yumob garra kipgon bulurrumbat det lowa weya aibin gibit yumob en if yumob dumbat lagijat oldei, im meigim yumob laif jidan gudwei. Mi na YAWEI det trubala God.

⁶Yumob nomo lau silipsilipbat garram yumob ronwan femilimob.

⁷Nomo meigim yu dedi sheim miselp dumaji yubin silipsilipbat garram yu mami. En nomo meigim yu ronwan mami sheim.

⁸En nomo meigim yu dedi sheim dumaji yubin silipsilipbat garram eni waif blanga im.

⁹En nomo silipsilipbat garram yu ronwan sista o sista brom najawan mami o najawan dedi, nomeda imbin growap langa najawan kemp o bin growap garram yu langa det seimwan kemp.

¹⁰Wal nomo silipsilipbat garram yu grendoda. Wal tharran im brabli sheim blanga yu if yu dumbat lagijat.

¹¹En nomo silipsilipbat garram haf fulblad sista. Wal im jis laik yu ronwan sista du.

¹²En nomo silipsilipbat garram yu dedi, fulblad sista o blanga yu ronwan mami sista.

¹⁴En yu kaan silipsilipbat garram det waif blanga yu anggul.

¹⁵En yu kaan silipsilipbat garram det waif blanga yu san,

¹⁶o garram yu braja waif.

¹⁷En yu kaan silipsilipbat garram eni doda o grendoda if yubin silipsilipbat garram im mami basdam. Wal im maitbi yu ronwan femili, en tharran na im brabli nogud.

¹⁸En yu kaan gajim det sista blanga yu waif en meigim im yu waif. Yu garra abum yu ron waif olataim wen im jidan laibala.

¹⁹“En yu kaan silipsilipbat garram det gel weya im jidan wumanwei ebri nyumanth taim, dumaji im nomo klinbala blanga serramoni.

²⁰Nomo silipsilipbat garram naja men waif. Tharran meigim yu nomo klinbala blanga serramoni.

²¹Nomo gibit yumob biginini blanga sekrifais ofring langa det drimin gulum Molek, dumaji tharran meigim mi brabli nogudbinji.

²²Nomo eni men nomo lau silipsilipbat garram najawan men du. Mi nomo laigim lagijat.

²³Nomo eni men o gel nomo lau silipsilipbat garram eni enimul. Im det brabli nogudbalawei en tharran meigim im nomo klinbala blanga serramoni.

²⁴“Yumob nomo meigim miselp nogudbala brom dumbat ol dislot ting. Detlot pipul hubin jidan deya bifo bin dum ol detkain ting en ai garra andimwei olabat. Wal yumob garra go langa det kantri en jidan deya.

²⁵Ol detlot pipul bin meigim nogudbala det kantri. Wal aibin panishim det kantri en meigim det kantri nogud blanga ol detlot pipul hubin jidan deya.

²⁶Deibin dum ol dislot brabli nogudbala ting, en deibin meigim det kantri brabli nogudwan. Bat yumob kaan dum ol detkain ting. Ol yumob Isreil pipul en najalot pipul hu jidan garram yumob, ol yumob garra kipum dislot lowa weya aibin dalim yumob

²⁸en det kantri kaan jidan nogudwan blanga yumob, laik imbin dum langa detlot pipul hubin jidan deya bifo.

²⁹Yumob sabi na, yumob kaan dumbat detlot nogudbala ting, dumaji yumob kaan jidan blanga main pipul olabat if yumob dum lagijat.

³⁰“Wal yumob garra duwit langa mi wanim ai dalim yumob, en nomo bulurrumbat detlot pipul hubin jidan langa dijan kantri bifo. Nomo dumbat dislot nogudbala ting dumaji yumob garra meigim miselp nomo klinbala blanga serramoni. Mi na YAWEI det trubala God blanga yumob.” Lagijat na YAWEI bin tok.