Lampahnah 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Egypt kho lamloh a coe phoeikah a kum bae, a hla bae hnin khat vaengah, Sinai khosoek kah tingtunnah dap ah BOEIPA loh Moses te a voek tih,

²“Israel ca rhaengpuei boeih hlangmi te amah huiko neh, a napa imkhui ah tongpa boeih kah ming tarhing neh a hlangmi te lo laeh.

³Kum kul ca lamloh a so, Israel khuikah caempuei la aka cet boeih te namah neh Aaron loh amah caempuei dong lamloh amih te cawh rhoi laeh.

⁴Amah a napa imkhui kah a lu hlang te koca pakhat lamloh hlang pakhat tah nangmih rhoi taengah om saeh.

⁵Te dongah he kah hlang ming aka om rhoek nangmih rhoi te m'pai puei saeh. Reuben ham Shedeur capa Elizur,

⁶Simeon ham te Zurishaddai capa Shelumiel,

⁷Judah ah Amminadab capa Nahshon,

⁸Issakhar ah Zuar capa Nethanel,

⁹Zebulun ah Helon capa Eliab,

¹⁰Joseph koca ah Ephraim kah Ammihud capa Elishama neh Manasseh kah Pedahzur capa Gamaliel,

¹¹Benjamin ah Gideoni capa Abidan,

¹²Dan ah Ammishaddai capa Ahiezer,

¹³Asher ah Okran capa Pagiel,

¹⁴Gad ah Deuel capa Eliasaph,

¹⁵Naphtali ah Enan capa Ahira Enan saeh,” a ti nah.

¹⁶He mingthang rhoek he rhaengpuei loh a napa rhoek koca kah khoboei neh Israel thawngkhat kah a lu la a khue uh.

¹⁷Te phoeiah ming a phoei hlang rhoek te Moses neh Aaron loh a loh.

¹⁸A hla bae kah hnin at ah tah rhaengpuei boeih te a tingtun sak. Te vaengah kum kul ca neh a so hang tah a hlangmi la amah huiko neh a napa rhoek imko tarhing la ming a khueh uh.

¹⁹BOEIPA loh Moses a uen bangla amih te Sinai khosoek ah a soep.

²⁰Te vaengah Israel caming, Reuben koca kah a rhuirhong tah, a napa imkhui kah a huiko khaw, a hlangmi ming tarhing ah tongpa ca kum kul lamloh a so hang boeih neh caempuei la aka cet boeih te a tae uh.

²¹Amih Reuben koca te thawng sawmli thawng rhuk neh ya nga la a soep.

²²Simeon koca kah a rhuirhong tah, a napa imkhui kah a huiko khaw, a hlangmi ming tarhing ah tongpa ca kum kul lamloh a so hang boeih neh caempuei la aka cet boeih te a soep uh.

²³Amih Simeon koca te thawng sawmnga thawng ko neh ya thum la a soep.

²⁴Gad koca kah a rhuirhong tah, a napa imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih te a tae uh.

²⁵Amih Gad koca te thawng sawmli thawng nga neh ya rhuk sawmnga la a soep uh.

²⁶Judah koca kah a rhuirhong te, a napa imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih te a tae uh.

²⁷Amih Judah koca te thawng sawmrhih thawng li neh ya rhuk la a soep uh.

²⁸Issakhar koca kah a rhuirhong te, a napa imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih khaw,

²⁹Amih Issakhar koca te thawng sawmnga thawng li neh ya li la a soep uh.

³⁰Zebulun koca kah a rhuirhong te, a napa imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih khaw,

³¹Amih Zebulun koca te thawng sawmnga thawng rhih neh ya li la a soep uh.

³²Joseph koca ah Ephraim koca kah a rhuirhong te, a napa imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih khaw,

³³Amih Ephraim koca te thawng sawmli neh ya nga a soep uh.

³⁴Manasseh koca kah a rhuirhong te, a napa imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih khaw,

³⁵Amih Manasseh koca te thawng sawmthum thawng hnih yahnih la a soep uh.

³⁶Benjamin koca kah a rhuirhong te, a napa imkhui kah a huiko dongkah, a ming tarhing ah kum kul ca lamloh a so hang neh caempuei la aka cet boeih khaw,

³⁷amih Benjamin koca te thawng sawmthum thawng nga ya li la a soep uh.

³⁸Dan koca kah a rhuirhong te, a napa imkhui kah a huiko dongkah, a ming tarhing ah kum kul ca lamloh a so hang neh caempuei la aka cet boeih khaw,

³⁹amih Dan koca te thawng sawmrhuk thawng hnih neh ya rhih la a soep uh.

⁴⁰Asher koca kah a rhuirhong te, a napa imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih khaw,

⁴¹amih Asher koca te thawng sawmli thawng khat neh ya nga la a soep uh.

⁴²Naphtali koca kah a rhuirhong te, a napa rhoek imkhui kah a huiko khaw, a ming tarhing ah kum kul ca lamloh a so hang neh caempuei la aka cet boeih khaw,

⁴³amih Naphtali koca te thawng sawmnga thawng thum neh ya li la a soep uh.

⁴⁴He he aka soep rhoek loh a soep vaengah Moses neh Aaron khaw, Israel khoboei hlang hlai nit neh a napa rhoek imkhui pakhat lamkah hlang pakhat rhip om uh.

⁴⁵Te dongah ni Israel ca rhoek loh a napa rhoek kah imkhui pakhat ah kum kul ca lamloh a so hang, Israel khuiah caempuei la aka cet boeih tah a soep la boeih om uh.

⁴⁶Te vaengkah a soep boeih te thawng ya rhuk neh thawng thum neh ya nga neh sawmnga lo uh.

⁴⁷Tedae Levi te tah a napa koca lamloh amih lakli ah ana soep uh thil pawh.

⁴⁸BOEIPA loh Moses te a voek tih,

⁴⁹“Levi koca bueng tah soep thil boel lamtah amih khuikah a lu te Israel ca khui la khuen boeh.

⁵⁰Tedae namah loh Levi te laipainah dungtlungim so neh a hnopai cungkuem so neh a taengkah a cungkuem soah khueh. Amih loh dungtlungim neh a hnopai boeih te kawt uh saeh. Amih te thotat uh saeh lamtah dungtlungim taengah pin rhaeh uh saeh.

⁵¹Dungtlungim te khuen ham vaengah te te Levi rhoek loh suntlak puei saeh. Dungtlungim a rhaeh ham vaengah khaw te te Levi rhoek loh thoh uh saeh. Tedae hlangthawt loh a paan atah duek saeh.

⁵²Israel ca khuikah hlang he amah kah rhaehhmuen ah rhaeh saeh lamtah hlang he amah caempuei kah a hnitai neh om saeh.

⁵³Te vaengah Levi rhoek tah laipainah dungtlungim kaepah rhaeh uh saeh. Te daengah ni thinhulnah loh Israel ca rhaengpuei soah a tlak pawt eh. Te dongah laipainah dungtlungim kah tuemkoi te Levi rhoek loh ngaithuen uh saeh.

⁵⁴Israel ca rhoek loh a saii uh vaengah BOEIPA loh Moses a uen bangla a cungkuem te a saii uh.