Juece 6:36-40

³⁶Maʌ̃ne Gedeoʌ̃ba Ãcõrẽa nãwã jarasia: –Bʌa jarasia mʌ̃neba dai israelerãra ẽdrʌ b̶ʌida.

³⁷Mʌ̃a cawa quĩrĩã b̶ʌa bʌa jarad̶ara wãrãda. Daiba trigo cʌradʌgabadama mʌ̃a oveja cara mõda b̶ʌda egode b̶ʌya. Nurẽma maʌ̃ oveja carada b̶eguea b̶aibʌrʌ maʌ̃ne egorora põãsa b̶aibʌrʌ, mʌ̃a cawaya wãrãda mʌ̃neba dai israelerãra ẽdrʌ b̶ʌida, bʌa jarad̶a quĩrãca.–

³⁸Gedeoʌ̃ba jarad̶a quĩrãca mãwãsia. Nurẽma piradrʌped̶a oveja carara tapuyabʌrʌd̶e baidoda taza ab̶a piasia.

³⁹Baribʌrʌ Gedeoʌ̃ba Ãcõrẽa jarasia: –Mʌ̃a jãwã mĩã sẽ b̶ʌmĩna mʌ̃ djuburia quĩrũrãdua. Waya cawabidua bʌa jarad̶ara wãrãda. Naʌ̃ diamasi ẽjũãra b̶egueabidua baribʌrʌ oveja carara põãsa b̶ʌdua.–

⁴⁰Maʌ̃ diamasi Ãcõrẽba mãwã osia. Nurẽma ẽjũãra jũma b̶eguea b̶asia, maʌ̃ne oveja carara põãsa b̶asia.