Jadjis 6:36-40

³⁶Afta na Gidiyan bin dalim God, “Yubin dalim mi yu garra yusum mi blanga seibum ola Isreil pipul brom detlot Midiyan pipul.

³⁷Wal ai garra testimat yu. Ai garra pudum sambala wul atsaid langa graun deya langa det pleis weya melabat oldei klinimbat ola sid daga, en ailibala if det wul im jidan wetwan brom det dyu en if det graun im jidan draiwan, wal ai sabi trubala yu garra yusum mi blanga seibum ola Isreil pipul.”

³⁸Lagijat na Gidiyan bin tok langa God. Wal imbin hepin seimwei laik Gidiyan bin tok. Ailibala imbin gidap, en imbin faindim det wul bin jidan wetwan, en wen imbin skwisim det wul, detmatj woda bin randan en bilimap det dish raitful. Bat det graun bin stap draiwan.

³⁹Afta na Gidiyan bin dalim God, “Ai garra askim yu samting. Bat yu kaan gitwail langa mi. Ai garra testimat yu garram det wul wanmotaim. Distaim det wul garra stap draiwan en det graun garra jidan wetwan.”

⁴⁰Wal God bin lisin langa Gidiyan, en ailibala Gidiyan bin faindim det wul bin stap draiwan en det graun bin jidan wetwan.