Mumutara Ŋic 6:36-40

³⁶Eme Gideoŋzi Anutu kecʒiŋuc âzâcnewec: “Gahac mumeŋ irec sâcko Israe ŋic nore mezi batarac‐jopacmurâ mukicko

³⁷ine no lama kanʒaŋ bâtâcnekicne ʒi padi qaqa tomao râekopac. Eme titikuczi lama kanʒaŋko foocmu â rârec rârec mâreŋ kereŋne fome ine gahac mumeŋ irec sâcko ʒiŋuc manapemu: Go jâmbomac nore mezi Israe ŋic batarac‐jopacmu.”

³⁸Eme iŋuc hâcne fuawec. Hae fureme Gideoŋ e faharerâ lama kanʒaŋ bâpisickerâ qâʒâkiriŋkeme titikuc opâne i râqâc moc fufusenere sâc ewec.

³⁹Iŋuc fuame Gideoŋzi Anutu âzâcnerâ muwec: “Kimbeŋgezi boc mi imacnuzejec. Ʒi sawa mac mupe taraoc. Lama kanʒaŋzi buc kereŋne fozejec â rârec rârec mâreŋ i ine titikuczi hefârezejec.”

⁴⁰Eme ŋafe ira Anutuzi mume iŋuc hâcne fuawec. Lama kanʒaŋ sawa kereŋne fowec â rârec rârec mâreŋ i ine titikuczi hefârewec.