Joni 13

1

2

3

4

5

6

7

8

9

10

11

12

13

14

15

16

17

18

19

20

21

¹Menina kinafinti zamare'nea knagu antahimiza (Pasova) ne'za nekna atupa higeno, Jisasi'a antahi'ne, ama mopa atreno Nefantega vnia kna egeno, amage nentaza disaipol nagara, Agrama zamesi nezmantea zamo'a atupare ehnati'ne.

²Jisasi'a amage' nentaza disaipol naga'ane ne'za nenegeno, Hankromo (Sata) Judas Iskariot, Saimon nemofo rimpafi ha' vahe zamazampi komoru huno avrentesia antahi'zana eme ante'ne.

³Jisasi'a antahi'ne, Nefa'a maka'zana Agri azampi ante'ne, Anumzamofonteti e'neankino, ete Anumzamofonte vugahie.

⁴Ne'za nenafinti otino, anakre ku'a zafi nenteno, tauri erino afafafi rugagino anakine.

⁵Anante Jisasi'a zompafi ti taginteno, amage nentaza disaipol naga zamaga agafa huno sese huteno, afafafi rugagi'nea taurinu zamagia eriho'mu huzmante'ne.

⁶Anante Saimon Pitante aga sese hunte'naku egeno, agra Jisasinku anage hu'ne, Ramoka nagia sese hugahano?

⁷Jisasi'a kenona anage huno asmi'ne, menima ama nehuazana kagra ontahi'nane, hianagi henka'a antahi ama hugahane.

⁸Pita'a anage huno Jisasina asmi'ne, Kagra nagia sese osu'tfa hugahane! Jisasi anage huno kenona'a hu'ne, Nagra kagiama sese osnugenka, Nagranena omnigahane.

⁹Saimon Pita'a anage huno Jisasina asmi'ne, Ramoka nagiarfana sesera osuo, hianagi anazanke hunka nazane, nanune sese huo!

¹⁰Jisasi'a anage huno asmi'ne, iza'o ko'ma tima fre'nemo'a, agiage sese hugahie, e'ina nehuno avu sese huno mani'gahie. Hanki kagra ko avu sese hu'nane, hianagi ana maka'mota avu sese osu'naze.

¹¹Na'ankure mago'mo komoru huno ha' vahe zamazampima avrentesimofona, Agra ko antahi'ne, e'ina hu'nea agafare, tamagra maka'mota avu sese osu'naze hu'ne.

¹²Anage huteno Jisasi'a zamagia sese huvga rezmantete'no, Nakre ku'a erino mani'neno hu'nere umniteno, Jisasi'a anage huno zamsmi'ne, amazama tmagri'ma hunermantoana antahi'nazo?

¹³Tamagra Nagrikura rempi hurami Ne'ene, Rantie nehazana, tamagra tamage nehaze, Nagra ana nere.

¹⁴Nagrama Rantimi manina, hurmasmi Ne'mona tmagia sese hunermantesugeta, tamagra nena anazanke huta rumokizmi zamagia, sese ohunte ahunte hiho.

¹⁵Nagra hurmeri nehuanki, tamagranena anahu kna hutma rumokizmi'a zamagia sese huzmantegahaze.

¹⁶Tamage hu'na Nagra nermasmue, kazokzo eri'za vahe'mo'a kva'amofona agateoregahie. Kema erino vnimo'a, katogema huntegeno vu'nemofona agateore'ne.

¹⁷Tamagrama amazama keta antahita nehuta, anazama hanutma asomu erigahaze.

¹⁸Makamotagura nosue, Nagra huhampri'noa vahera antahi'noe. Hianagi Anumzamofo avontafepi kre'nea nanekea eri knare hugahie. Nagrane breti nenemo ha' renantegahie huno kre'neana, hago avufga'a fore hugahie. (Sam-Zga 41:9)

¹⁹Meninena Nagra anazana efore osu'nege'na neramasmue, anazama efore'ma hanigeta, tamagra tamentinti nehuta, ana nere hutma Nagrikura hugahaze.

²⁰Tamage hu'na neramasmue, Nagrama huntesugeno vnia vahe, avreno azeri so'e huntesimo'a, Nagri navreno nazeri so'e hunantegahie. Iza'o Nagri'ma nazeri so'e hanimo'a, Agra hunantege'na e'nomofo azeri so'e hugahie.

²¹Jisasima anage huvgama reteno, agu'amo kna nehigeno anage hu'ne, Tamage hu'na nermasmue, tamagripinti mago'mo ha' vahe azampina navre antegahie.

²²Amage nentaza disaipol naga'mo'za zamagra zamagra oge age nehu'za, inamo anara hunaku higeno nehie hu'za hu'naze.

²³Amage' nentaza disaipol nagapinti, Jisasi'ma avesi nentemo, azantmaga kaziga tvaonte mani'ne.

²⁴Ana higeno Saimon Pita'a avesima nentea disaipol ne'ra avame'name huno, izanku Jisasi'a nehifi antahigenka ko huno asmni'ne.

²⁵Anante avesima nentea ne'mo, Jisasi asumpi mase kantiteno, anage huno Agrira antahige'ne, Ramoka ana nera iza'e?

²⁶Jisasi'a kenona anage hu'ne, bretima sosifima rete'na amisuana e'i ana nere, nehuno bretia sosifi reteno, Saimon Iskarioti nemofo Judasina ami'ne.

²⁷Ana bretima netegeno, Sata'a havi avamumofo kvamo agu'afi ufre'ne. E'ina nehigeno Jisasi anage huno asmi'ne, ina knazama hunaku'ma hnunka, kvune antenka huo.

²⁸Mani'ne'za ne'za ne'naza vahe'mo'za, anama Judasinku'ma hia kea na'a agafare hu'nefi, antahi amara osu'naze.

²⁹Judasi zgo taferote (bogisi) kva nehia neki'za, mago'amo'za antahizana mago'a upama hunona ne'za ome miza sege, amunte omne vahe, zgo ome zaminogu Jisasi'a hunente hu'za zamagesa antahi'naze.

³⁰Ana higeno, Judasi'a bretima nehana nehuno'a, atiramino megi'a vu'ne. (Ko hani hu'negeno ana hu'ne.)

³¹Judasi'ma megi'a vute'geno, Jisasi anage hu'ne, menina Vahemofo Mofavremo ra agi erisigeno, Anumzamo'a ra agi Agriteti eri'nia kna ne-e.

³²Anumzamo ra agi Agriteti eritesuno'a, anazanke huno Anumzamo ra agi Agrira amigahie, nehuno hantaka'a ra agi amigahie.

³³Mofavre zgamota antahiho, Nagra osi'a knafi tamagra nena manigahue. Tamagra Nagrikura hakregahaze, Jiu mono kva vahera anankea ko zamasmi'noe. Meninena ana kege nermasmue, Nagrama inantega vnurega tamagra omegahaze.

³⁴Nagra kasefa kasege tamagrira neramue, Nagrama navesi neramantoa kna huta rumokizmia zmesinezmanteta, anahu kna hutma ovesinte avesinte hiho.

³⁵Tamagrama mago'mofo ovesinte avesinte nehnage'za, maka vahe'mo'za nege'za, tamagra Nagri namage nentaza disaipol naga mani'naze hu'za hugahaze.

³⁶Saimon Pita'a anage huno Jisasinku hu'ne, Ramoka, kagra iga vunaku nehane higeno? Jisasi'a ana kenona'a huno, Nagrama vanurega, menina kagra navaririnka omegahane, hianagi kagra henka egahane.

³⁷Pita'a anage Jisasinku hu'ne, Ramoke, na'a hanige'na nagra menina Kagri kmagera omegahue? Nagra Kagriteku hu'na frinaku menina tro nehue.

³⁸Jisasi'a kenona'a anage huno asmi'ne, Nagriku hunka frigahano? Tamage hu'na negasmue, Nagrikura onke'noe hunka 3'a zupa vahane hutesankeno, henka kokoregea hugahie.