1Zioŋko qeŋ qaniŋ, tiri tiki‐naneo owacke sâqorehuc fânâŋkeniŋ! Wofuŋte dameŋ sâkozi biac maickekacte Juda mâreŋte ŋecjucfâc jaŋe ɋarac ɋarac qafâreniŋ!
2Ʒoaŋ ira hae mâreŋ gâpâreme dapâc fuaocmu, karorac ɋâfoŋne â dapâc qisiric fuaocmu hâcne. Dudubi karoraczi mâreŋ sâckeekac, irec sâc râsi guru sâko â tâpirihec jaŋe tiki botâŋ sâc fuarâ qaratieŋgopieŋ. Wiac iŋucne mârâc jaha moc mi fuawec, erâ mimiŋzi ɋâric jufeniŋmu sâc mi fuazokac wâc.
3Ʒoczi wiac ʒâseŋkeekac irec sâc wiac nâmizieŋgopieŋ, eme râpefuŋ‐jeŋicko wiac tiwâne moc mi fokac. Mai‐jeŋicko mâreŋ fokac i Edeŋ jufu gie iŋucne, â râpefuŋ‐jeŋicko niniŋ siarereŋ fuarâ fokac, jaŋe wiac moc mi akickeŋgopieŋ.
4Hawari‐jeŋic i becâsic jaŋere hawari iŋucne, â gagasac‐jeŋic i becâsic jaŋe ʒikao gasackeeŋgopieŋ irec sâc.
5Jaŋe ʒika keretaczi fânâŋkeekac irec sâc fânâŋkehuc tiki botâŋ sâc fuahuc raŋgopieŋ, â ʒoczi sopâc ʒahuc fânâŋkeekac, me ʒikaŋic guru sâko jaŋe ʒikao raniŋte ʒawierâ semuja hehuc fânâŋkeeŋgopieŋ irec sâc fânâŋkeŋgopieŋ.
6Fisipie ŋicne ŋicne bipic‐jeŋic tarame weaŋke‐fâreŋgopieŋ.
7Momori ŋic jaŋe ʒika qaniŋte tararâ raeŋgopieŋ irec sâc raŋgopieŋ, ʒikaŋic iŋucne qânâsacko ferâ qambaraŋkeŋgopieŋ. Jaŋe moc mi qâsoriehuc hata‐jeŋickoa dândâŋne raŋgopieŋ.
8Jaŋe hatao hehetuŋ mi ehuc ru sâc hata‐jeŋickoa raŋgopieŋ, râsi jaŋere tepe wiac hone‐bipiehuc fotâcnerâ raŋgopieŋ hâcne.
9Jaŋe hae sâko rauckeniŋte ʒoɋac sâko eŋgopieŋ, erâ qânâsacko fe qambaraŋkerâ fic sâc babarâ feŋgopieŋ, ehuc fiuc roro iŋucne qâqâtâc kataŋko raʒiŋgopieŋ hâcne.
10Jaŋe fisipie mâreŋzi qiriŋ qakac, â sambâŋzi ɋiɋiteckekac; mosa â ʒoaŋ jahe gâpârekopirec, â bâpiŋ tatamaczi gâkowakac.
11Wofuŋ e momorifâc‐ticne bânie‐jarehuc dâŋeme ɋuŋ hawari ekac; momorifâc‐ticne jaŋe guru dindiŋ, â dâŋ rereŋfâcne jaŋe tâpiri sâkohec. Jei, Wofuŋte dameŋ i dameŋ sâko erâ dameŋ hâhâwicne, irec mozi sanaŋkerâ domaocmu?
12Wofuŋ e ʒiŋuc mukac: “Ajoc, ŋoŋe ʒiŋuczia nânâ sowa juhuc ki busâqoc erâ maŋŋeŋic bârisie‐jâmbâŋkerâ norao risieniŋ!
13Ŋoŋe busâqoc fârine manahuc maŋŋeŋic bârisieniŋ, ŋaqi sawa mi bâsuckeniŋ.” Wofuŋ Anutu‐ŋeŋic erao risie‐jâmbâŋkeniŋ! E hâcne aki anonoc‐ticnehec â buuruc‐ticnehec, e kimbeŋ‐ticne uneŋne â miriŋ‐ticne ɋârâŋne, e okac babazure mâcne, kiŋ bebehere manasuhuc juekac.
14Wofuŋ Anutu‐nâŋec e busâqoc manahuc maŋne moc risieocmu mecne, erâ ehâmo‐nârehuc mume padi â jacgoŋ fuaocmu. Iŋuc fuame nâŋâc taha bâzi â waiŋzi taha sâcne râcnenaŋmu.
15Zioŋ tikio qeŋ qaniŋ, ehuc nânâ sowa jujure dâŋ mupaŋkeniŋ, erâ tutumaŋ moc fuaocte ʒâfo baniŋ.
16Ŋic ŋokac hetumaŋ‐jopahuc baʒawiec‐jopaniŋ; ehuc ŋic ŋokac qizecne erâ naru motec kâcɋene â susuonec jaŋe mâmâc ejarepie fisi‐fârenʒepieŋ. Â socɋâri jaŋe wâc tutumaŋko fuarâ junʒepieŋ.
17Taha bapa, Wofuŋte kiŋaŋ qaqafâc, jaŋe hae gâŋgâŋ â alata ŋondeŋ‐jekicko ira kiohuc ʒiŋuc numunʒepieŋ: “O Wofuŋ, go ŋicfâcge nâŋe busâqoc mana‐nârec, ŋicne ŋicne jaŋe biŋefâcge nâŋe qaisoc‐nâporâ gâwie‐nârehuc ʒiŋuc munʒipiŋte: ‘Anutu‐jeŋic weni?’”
18Eme Wofuŋ e mâreŋ‐ticnere mana mezac ehuc ŋicfâc‐ticne jaŋere busâqoc manawec.
19Ehuc ŋicfâc‐ticne dâŋ ʒiŋuc muhuc bâtikie‐jarewec: “Manaŋgopieŋ, no padi, waiŋ â wokemaŋ râe‐ŋarepe nâ gapec enʒepieŋ, erâ ŋicne ŋicne jaŋere ŋondeŋko juhapie mocwâc mana wahac‐ŋopaniŋte mi mana‐jarepemu.
20“No faic mâreŋkonec râsifâc‐ŋeŋic bâsuec‐jopape behec‐ŋoparâ mâreŋ burocnao ranʒepieŋ; bânieŋgopieŋzi ra Hâwec Hâmocnao hunʒepieŋ, â ʒâhec juŋgopieŋ jaŋe ine Mâreŋ Ŋoŋondeŋ Hâwecko hurâ hâmo gârec ehuc âsu finʒepieŋ, jaŋe wiac hâhâwicne eŋarembiŋte iŋuc hâcne ejarepemu.
21“O mâreŋte ŋecjucfâc, ŋoŋe mi hâwic‐ŋopaoc, Wofuŋ e wiac qeŋ bipinehec bâfuawecte bubiaŋ manahuc ʒeri enʒepieŋ.
22Â qowi ŋoŋe wâc mi hâwic‐ŋopaoc, mâreŋ burocnere sopâc kecɋaŋzi fie rurucke‐fârekac hâcne; jâc wiac i hândâŋ fârihec efârekac, erâ jâmbojâc â waiŋ qizecne jaŋe fâri rarauhec efâreŋgopieŋ.
23“Zioŋte ŋic ŋokac, ŋoŋe bubiaŋ mananiŋ, ehuc Wofuŋ Anutu‐ŋeŋic ʒeri bari ecneniŋ! Eki hâcne mume qanaŋ jaha hoe heŋarewec, erâ mârâc jaha ejujec iŋuc jaha miŋecgac mume hoe ʒoaŋ sâckoa fua‐ŋarekac.
24“Irec padi bâbâmârâŋ fic i padizi fusucmaocmu, erâ waiŋ â wokemaŋzi pake wiac i fusucmarâ qâmbâriŋkeocmu.
25Hâpic gurune gurune jaŋe jara sâc wiac‐ŋeŋic nâmiziembiŋ, irec okacne bâfua‐ŋarepemu; Hâpic jaŋe hâcne momorifâc‐nane, i noni sorec‐jopape fisi‐ŋarembiŋ.
26“Ŋoŋe nânâ mâriri fua‐ŋareme nâ gapec enʒepieŋ, ehuc Wofuŋ Anutu‐ŋeŋiczi ŋoŋerao mâsi sâko bawec e hâcne muteŋkenʒepieŋ. Ehame ŋicfâc‐nane ŋoŋerao mimi qaqa mocwâc mi fuazejec.
27Ŋoŋe ʒiŋuc mana taranʒepieŋ: No Israe ŋic ŋoŋere ŋondeŋko juekopac, Wofuŋ no hâcne Anutu‐ŋeŋic, moczi moc mi jukac. Irec ŋicfâc‐nane jaŋerao mimi qaqa mocwâc mi fuazejec.
28“Eme juku Mâro‐nane ŋic ʒeŋgoma sâcke‐jarepemu, ehame otâ ŋokâfâc‐ŋeŋic jaŋe findaŋdâŋ muhuc juniŋmu, erâ ŋicqizecfâc‐ŋeŋic jaŋe guŋ fârine mananiŋmu, â socɋârifâc‐ŋeŋic jaŋe maŋzi wiac ʒâŋe furu honeniŋmu.
29Erâ dameŋ ira kiŋaŋ qaqa ŋic ŋokacfâc‐ŋeŋic Mâro‐nane tahac‐jopapemu wâc.
30“Ehuc mupe faic sambâŋko â juwic mâreŋko wiac ʒâŋe furu fuaocmu, soc â ʒoc â hosâc sâko fuaocmu hâcne.
31Wofuŋte dameŋ i bipic tataranehec maickeme ʒoaŋzi gâpâreocmu â mosazi sosoc eocmu.
32Eme Wofuŋte ʒâŋe riwaseckehuc juniŋmu jaŋe dameŋ ira sisipirickonec batarac‐jopa‐fârezo. Wofuŋzi muwec irec sâcko Zioŋ tikio â Jerusalem haeo ŋeŋezic fuaocmu hâcne; ehame Wofuŋzi hefârec‐jopaocmu jaŋe sisipiriczi riric‐jopaha juniŋmu.
