1I Pashur nib prist ni be’ nib mo’on ni fak Immer me ir e en nib tolang u lan fare Tempel e rung’ag e pin’ey ni gu weliy,
2me yog ni ngan toyeg mi ni m’ageg ko chen u charen e bin talang e Garog ni Benjamin fithingan.
3Me reb e rran riy ni kadbul u tomuren nike chuweg Pashur e chen rog, mu gga’ar ngak, “I SOMOL e de tunguy fithingam ni Pashur. Re ngachal nike pi’ ngom e ‘Marus u Gubin Yang.’
4I SOMOL e ke ga’ar, ‘Bay gu gagiyeg nigem ngam mang tapgin e marus ni nge yib ngom nge ngak e pi tafager rom, ma bay mu guyrad ni yad gubin ni karm’ad ko pi saydon rok e pi to’ogor rorad. Bay gu tay urngin e girdi’ nu Judah nga tan gelngin e pilung nu Babylon; bayi fek boch i yad nga Babylon ngar kalbusgad, ma boch i yad e bayi thang e pogofan rorad.
5Bay ku gu pag e pi to’ogor rorad ngar giliw niged urngin e tin be fel’ rogon e re binaw ney riy, miyad fek urngin e chugom, ni mus ko machaf ni fen e pilung nu Judah miyad fek nga Babylon.
6Mi gur, Pashur, nge gubin e girdi’ ko tabinaw rom e bay ni kolmed ngan fekmed nga Babylon. Bay mum’ nga ni k’eygem u rom, ma ku er rogon urngin e pi tafager rom ni yad e kamog ngorad fapi thin nde riyul’.’”
7SOMOL, ka mu ban nigeg ku gu aw ko ban. Gur e ga ba gel ngog, are ka rim gel ngog. Urngin e girdi’ ni yad be moning nigeg; polo’ e rran ni yad be minmin ngog.
8Ra gu welthin ma gu be non ni ba ga’ lamag ni gu be tolul ni gu be ga’ar, “Modyargal! Riya!” SOMOL, yibe minmin ngog ma yibe moning ngog ni gubin ngiyal’, ni bochan e gu be yog e thin rom.
9Machane fa’anra lungug u wun’ug, “Dab kug leamnag SOMOL ma dab kug weliy ban’en u fithingan,” ma aram e thin rom e ke bod ba nifiy ni be yik u fithik’ i lanin’ug nib to’ar. Mu gguy rogon ni nggu par nga daken, machane dabiyag ni nggu tay rog.
10Gu ma rung’ag laman e girdi’ ni pire’ ni yad ma kathkath, ni be lungurad, “Gafgow nib gel e bay u gubin yang! Ere ngad eg niged e cha’nir ko pilung!” Mus ngak e pi’in nri gamad ba pach ni yad be sonnag ni yiggu thor. Be lungurad, “Sana rayag ni ngan bannag, me yag nda koled ngad fulweged taban ngak e tin ni be yog.”
11Machane gur SOMOL e ga bay u ba’ rog ni gab gel ma gubin mrayag rom, ma pi’in yad be gafgow nigeg e bay ra parawgad. Bay ra pir’ed nike m’ayfarad ni manemus, ya dabiyag ni nge yan i aw nga rogon e tin yad be leamnag. Tamra’ ni yad ra tay e dariy n’umngin nap’an ma dab ni pag talin.
12Machane gur fare SOMOL ni Gubin ma Rayag Rok e mmat’aw e sikeng ni ga ma pi’ ngak e girdi’; ya ga manang e tin bay u lanin’rad. Ere mu gagiyeg ngug guy ni ka mu falbiy ko pi to’ogor rog, ya tin yibe rin’ ngog e kug pag fan nga pa’am.
13Ngan tangnag SOMOL! Ngan pining e sorok ngak SOMOL! Ya ir e chuweg e pi’in yibe gafgow nagrad u pa’ e girdi’ ni kireb.
14Ngan bucheg wa’athan e rofen nni gargel nigeg riy! Ngan pag talin e rofen ni gargel nigeg e chitinag!
15Ngan bucheg wa’athan e en ni yib i yog e thin ni felan’ e chitamag ngay ni fa’ani ga’ar ngak, “Bochi pagel! Ke yag ba pagel ngom!”
16Mang e yigi par ni bod fapi binaw ni kirebnag SOMOL nde runguy e girdi’ riy. Manga yigi rung’ag laman e gel’gel’ u fithik’ e amith ni kakadbul, nge laman e yabul ni be thow ni be yog e mael nike yib ko misiw’,
17ni bochan e de thang e pogofan rog u m’on ndawor nni gargel nigeg. Ya fa’an mang e yodorom ma yin e chitinag e ke par nike mang malang rog, me yan i aw nda ni gargel nigeg.
18Mangfan ni kan gargel nigeg? Gur kemus ni fan e ngi i yib e gafgow ngog mu gu par ni be kireban’ug, mu gu par ni yibe darifan nigeg nge mada’ ko ngiyal’ ni kugum’?
