1Gimed e girdi’ nu Israel, mmotoyil gad ko thin rok SOMOL ngomed.
2Be ga’ar, “Dab mu leked kanawo’en boch e nam; ma dabi wagagey lanin’med nga boch e pow ni be m’ug u lane lang, ni yug aram rogon ni be rus boch e nam ngay.
3Raba’ i taliw ko pi girdi’ ney e bm’ay fan. Bake gek’iy e kan th’ab nga but’ u lan e loway; ke ker e en nma ker e ren,
4ka ni nunuwnag ko silber nge gol. Mi ni rrichbiy ko richib u downgin i yib nga but’ ya nge dabi thig.
5Mitney e liyos e bod e liyos ni yima tay u milay’ ko mayis; ni dabyag ni nge non; thingar unchibiy ngu’un fek ni bochan e dabyag ni nge yan. Dab mu rus gad ngay: dabyag ni nge maad’ad ngomed, ma dariy ban’en ni bfel’ nrayag ni nge rin’ ngomed.
6SOMOL, dariy be’ ni bod gur; I gur e th’abi gel gelngim, ma fithingam e ba mathangeluwol ma ba gel gelngin.
7Gur, mini’ e dabi liyor ngom, pilung ko urngin e nam? Bay tapgin ni ngan liyor ngom. Dariy be’ ni bod gur u fithik’ gubin e pumo’on nib gonop ko pi nam fa fithik’ e pi pilung rorad.
8Yad gubin ni yad ba pinat ma yad bbalyang. Mang e yad ra fil rok e liyos ni ren?
9Liyos rorad e kan ing ko silber nu Spain nge gol nu Ufaz, nni ngongliy u gubin e salap rok e pi’in ni bfel’ salpen i ngongliy ban’en; ma kanon’ e mad nga daken e pi liyos nem nib violet nge purple ra’en ni lifith e pi’in tha’bi salap i lifith e mad.
10Machane gur SOMOL, e gur e bin rriyul’ e Got, ni gur fare Got nib fos ni pilung ni manechibog ko pi chibog. Gur e nap’an ni ga ra damumuw, me rur e fayleng; ni dabiyag ni nge lubeg e pi nam e damumuw rom. (
11Gimed e girdi’ e nga moged ngorad ni pi got nde sunmeg e fayleng nge lanelang e ran kirebnag. Nge par ndakriy bang u roy u fayleng ni yad bay riy.)
12I SOMOL e ngongliy e fayleng nga gelngin; ni gonop rok e sunmeg e fayleng ngay me fil’ath lanelang.
13Ra pag SOMOL lungun me chub lingan e ran u lanelang; me girengiy e manileng u tungun e fayleng. Me mat ra’en e uluch u fithik’ e n’uw me pi’ e nifeng nge yan ko gin ma chubgiliy riy.
14Ra m’ug e ran’ey, ma ra man lanyan’ e girdi’ ni dakrir nanged e n’en ni ngar rin’ed; pi’in nma ngongliy e liyos e ka ra aliliy gad, ni bochan e fapi got ni yad be ngongliy e go’ bogi ban’en ndariy e yafos rorad.
15Yad bogi m’ay fan ni bay ni tharbegrad; bay ni gathayrad ko ngiyal’ ni ngeb SOMOL nike sap’ayrad.
16Fare Got rok Jakob e de bodrad; ya ir e sunmiy urngin ban’en, me ir e mel’eg yu Israel ni nge mang tirok e girdi’. I SOMOL ni Gubin ma Rayag Rok e ireram fithingan.
17Gimed e girdi’ nu Jerusalem, kanin’med nga langob! Ere mukunyed e chugom romed.
18I SOMOL e nge yon’med nga wuru e re binaw ney; ni nge parsiymed nge taw ko ngiyal’ ndakriy be’ nra magey. I SOMOL e be non.
19Girdi’ nu Jerusalem e yad be yor ngalang ni yad be ga’ar, “Kaygi almarin e maad’ad ni kadted! Ma’ad’ad u dowdad e dabi fos. Ya ud leam niged ni irera’ ban’en nrayag nda athamgiliyed!
20Pi tent rodad e ke mogothgoth; pi gaf ni i kol e ke math’. Pifakdad e go’ karanod; dakriy be’ ni magay ni ku ra n’uf e tent rodad ngalang bayay; dakriy be’ nra tining e kateng ko fapi tent.”
21Mu gu fulweg ni lungug, “Pi tayugang’ rodad e yad ba pinat; darir fithed lanyan’ SOMOL. Aramfan ni dariy ban’en ni be fel’ u puluwrad, ma girdi’ rodad e ke wearwear i yan.
22Mmotoyil! Ke taw e thin! Ke chub lingan’ ba nam i er ko lel’och; salthaw riy e bayi pingeg e pi binaw nu Judah nge ngal’ ni bang i ted ni desert, ni aram e gin ma par e jackal riy.”
23SOMOL, gu manang ni dariy bagmad ni ir e ga’ ko gin nge sor e yafos rok ngay; dariy be’ ni bay gafan e yafos rok u pa’.
24SOMOL, mu t’ar e girdi’ rom, machane dab yugu mu almarin ngomad fa mu gechig nagmad u nap’an ni ga ba damumuw; ya ra math owchamad.
25Mu sapeg e damumuw rom ko pi nam ndarir liyor gad ngom nge nga daken e pi’in ni ka ra furyed gur. Kar li’ed e girdi’ rom; ma karted gamad ko bin but’ e fol ka ra paged e nam romad ni dakriy woton u but’.
