1Ierusalema taudia e, emui ariara dekenai, do umui heau lao, heau mai! Do umui itaia, bona do umui laloa. Ariara bona hoihoi gabudia dekenai do umui tahua, to tau namona ta do umui davaria diba, a? Kara maoromaoro bona Dirava ia badinaia momokani tauna ta, be umui davaria, a? Bema unai bamona tauna ta umui davaria diba, Lohiabada ese Ierusalema ena dika do ia gwauatao.
2Momokani umui gwau umui ese, Lohiabada umui tomadiho henia noho, to umui be momokani lasi.
3Lohiabada e, oi ese hereva momokani sibona oi ura kamonai. Vadaeni oi ese oiemu bese taudia oi botaia, to idia hisihisi lasi. Oi ese idia momo oi alaia ore, to idia ese matakani idia ura lasi. Idia ese edia lalodia idia ha-aukaia, bona edia dika idia rakatania lasi.
4Vadaeni inai bamona lau laloa, lau gwau, “Inai be ogogami taudia sibona, edia diba be bada lasi, badina Lohiabada ena dala idia diba lasi, Dirava ena taravatu danu idia diba lasi.
5Lau be edia lohia taudia dekenai do lau lao, do lau hereva henidia, badina idia be Lohiabada ena dala idia diba, bona Dirava ena taravatu danu idia diba.” To lohia ibounai ese danu Lohiabada idia negea vadaeni. Ia dekenai kamonai henia kara idia negea momokani.
6Unai dainai uda dekenai idia noho laiona ese, do idia aladia mase. Tano kaukau dekena amo sisia dagedagedia ese, do idia hadikadia momokani. Bona lepadi ese edia hanua ta ta kahirakahira, do idia naria noho. Bema unai taudia be murimurina dekenai idia raka neganai, unai dagedage gaudia ese do idia hadikadia ore, badina edia kara dika be momo, bona nega momo idia be Dirava ena dala dekena amo, idia raka siri.
7Lohiabada ese ia henanadai, ia gwau, “Egu bese taudia edia kara dika, be badina dahaka do lau gwauatao? Idia ese lau idia rakatania vadaeni, bona dirava koikoidia dekenai idia tomadiho vadaeni. Lau ese egu bese taudia lau ubudia, idia boga kunu, to idia ese heudahanai idia karaia, bona ariara hahine edia ruma dekenai idia haboua lao.
8Idia ese hosi tau edia kara bamona idia karaia. Edia bogadia idia kunu neganai, mai ura dika danu sihari idia tahua noho. Idia ta ta ese edia badibadinai noho taudia edia adavadia, idia ura dikadika henia noho.”
9Lohiabada ma ia gwau, “Unai kara dikadia dainai, edia davana do lau henia lasi, a? Unai bamona idia karaia noho besena dekenai, davana do lau atoa lasi, a?
10“Lau ese tuari taudia do lau siaia, egu bese taudia edia vain umadia do idia utua diho, to do idia hadikadia ore lasi. Do lau oda henidia, idia ese vain rigidia do idia veria diho, badina idia be lau, Lohiabada, egu rigina lasi.
11Israela bona Iuda taudia ese, lau dekenai idia koikoi karaia momokani. Lau Lohiabada lau hereva vadaeni inai.”
12Iena bese taudia ese, Lohiabada idia herevalaia koikoi. Idia gwau, “Ia ese gau ta do ia karaia lasi. Dika ta be ita dekenai do ia vara lasi. Tuari o hitolo, be ita dekenai do idia ginidae lasi.
13Peroveta taudia edia hereva be lai sibona. Edia hereva be Lohiabada dekena amo lasi. Edia hereva gauna, be idia sibona dekenai do ia vara be namo.”
14Unai dainai, Lohiabada, Siahu Ibounai Dirava ia gwau, “Ieremia e, inai hereva idia gwauraia vadaeni dainai, lau ese egu hereva be lahi do lau halaoa, oiemu uduna dekenai. Bona unai lahi ese unai taudia do ia gabudia ore, au do ia gabua ore bamona.”
15Israela besena e, Lohiabada ese idau bese orea ta, be daudau dekena amo ia mailaia noho, unai taudia ese umui do idia tuari henia. Unai bese be goada, bona ia be gunaguna ia noho besena. Unai bese taudia edia gado umui diba lasi. Edia hereva do umui kamonai diba lasi.
16Edia diba bona peva taudia, be mai goadadia momokani. Idia ese umui do idia alaia mase, bogahisihisi lasi momokani.
17Emui tano ena anina ibounai do idia ania ore, emui aniani ibounai danu. Emui natudia tau bona hahine do idia alaia haorea, emui mamoe oreadia bona boromakau oreadia danu. Emui vain ibounai do idia haorea, emui fig audia ibounai danu. Emui hanua mai magudia, umui abidadama henia hanuadia, be tuari dekena amo do idia hadikaia ore momokani.”
18Lohiabada ese ma ia hereva, ia gwau, “To unai dinadia lalonai lau ese umui do lau haorea momokani lasi.
19Ieremia e, oiemu bese taudia ese do idia nanadaia, do idia gwau, ‘Badina dahaka Lohiabada iseda Dirava ese inai kara ibounai ita dekenai ia karaia vadaeni?’ Unai neganai idia do oi hamaoroa, do oi gwau, ‘Umui ese lau Lohiabada umui rakatania, bona emui tano lalonai dirava idaudia edia hesiai gaukara umui karaia. Vadaeni unai bamona danu, umui ese idau tano, emui tano lasi lalonai, idau bese taudia edia hesiai gaukara do umui karaia.’ ”
20“Ieremia e, Israela bona Iuda taudia dekenai, inai hereva do oi gwauraia:
21Umui kavakava bona mai emui laloa lasi taudia e, umui kamonai! Umui be mai emui matadia, to umui itaia lasi, bona mai emui taiadia, to umui kamonai lasi.”
22Lohiabada ese inai bamona ia hereva noho: “Lau dekenai umui gari lasi, a? Egu vairana dekenai umui heudeheude lasi, a? Lau ese kone lau atoa, davara ena hetoana. Kone ese davara do ia koua noho nega hanaihanai. Davara ese kone ia hanaia diba lasi. Hurehure be do idia bada daekau lao, to idia kwalimu diba lasi. Idia ese kone idia botaia auka noho, to idia hanaia diba lasi.
23To umui, egu bese taudia, emui lalodia be auka, bona mai emui dagedage danu. Umui be lau dekena amo umui raka siri, lau umui rakatania momokani.
24Nega ta umui laloa lasi inai bamona: ‘Lohiabada, iseda Dirava do ita gari henia. Ia ese medu ita dekenai ia siaia, medu ena nega korikori dekenai, lahara ena medu, bona laurabada ena medu danu. Bona ia ese tano anina utua bona haboua negana danu, be ita dekenai ia henia.’
25Inai gau namodia be emui kara dika ese, umui dekena amo idia abia siri, bona emui kara dika ese, namo be umui dekena amo ia koua vadaeni.
26“Badina be kara dika taudia, be egu bese taudia edia huanai idia noho. Idia be idia hunia noho, manu alaia gwauraia taudia idia hunia bamona. Idia ese tarapu idia atoa noho, taunimanima do idia abia totona.
27Edia ruma be koikoi dekenai idia abia kohu, dekena amo idia hahonua vadaeni, labana tauna ese, iena bosea be manu dekena amo ia hahonua bamona. Unai dainai idia be lohia taudia, bona idia be kohu momo taudia.
28Bona unai dainai idia be tauanina bada, bona edia toana be namo. To edia kara dika be idia karaia noho, doko lasi. Idia ese tamana sinana lasi natudia, bona ogogami taudia dekenai idia durua lasi, bona kota maoromaoro idia henidia lasi.”
29Lohiabada ma ia gwau, “Inai karadia umui karaia dainai, lau ese matakani umui dekenai do lau henia lasi, a? Inai bamona ia karaia besena edia latanai, edia kerere davana do lau atoa lasi, a?
30Hoa bada bona gari bada gauna ta, be emui tano dekenai ia vara vadaeni, gauna be inai:
31Peroveta taudia be idia peroveta koikoi noho, bona hahelagaia taudia ese, sibodia edia laloa hegeregerena taunimanima idia naria noho, bona egu bese taudia be inai bamona dala idia ura henia noho. To nega ena dokona do ia ginidae neganai, dahaka do umui karaia?”
