1Nekezineg si Shefatia he anak ni Matan, si Gedalia he anak ni Pashur, si Jehucal he anak ni Shelemia, wey si Pashur he anak ni Malkia te migkaǥi ni Jeremias diyà te menge etew te, “Migkaǥi is Nengazen te
2is minsan hentei he kenà ed-awà kayi te inged ebpatey te tebek, bitil, wey zaru. Piru is minsan hentei he edsurindir ziyà te menge tig-Babilonia ne kenà ebpatey. Egkelibri sikandin ne egkeuyag-uyag.
3Migkaǥi zaan is Nengazen te siguradu he egkaaǥew heini he inged te menge tig-Babilonia ne edsekupen dan heini.”
4Umbe, migkeǥiyan dutun te menge upisyal sikan is hadì te, “Kinahanglan he edhimetayan heini he etew. Su id-awè din is kezasig te menge sundaru he nesamà kayi te inged, ragkes en is langun he menge etew kayi, tenged te mibpengaǥi zin diyà te kandan. Wazà sikandin medtinguhà te keupiyaanan te menge etew, kekenà, kezeetan dan.”
5Midtavak si Hadì Zedekia te, “Idsarig ku en sikandin keniyu. Iyan kew en metau kandin.”
6Umbe, migkuwa zan si Jeremias ne midteyuntun dan diyà te vudsi he punduwà te wahig diyà te ubpeey te menge vantey. Heini he vudsi he punduwà te wahig ne iyan teǥiǥaked si Malkia he anak te hadì. Wazè en kayi wahig piru zuen kayi vasak he ebpekerevur ki Jeremias.
7Piru hein nezineg ni Ebed Melec he tig-Etiopia he sevaha zuen te menge upisyal ziyà te turuǥan, he in-ahuk si Jeremias duen te vudsi he punduwà te wahig, midhendiyà sikandin te hadì he ziyà te turuǥan. Dutun he timpu ebpimpinuu sikan is hadì diyà te Pultahan he Benjamin. Migkeǥiyan din haazà is hadì te,
9“Mahal he Hadì, mezaat is mibeelan kayi he menge etew ziyà te ki Jeremias. Midteyuntun dan sikandin diyà te vudsi, ne ebpatey sikandin te kegkevitil, su hapit en egkaamin is keenen kayi te inged.”
10Ne zutun midsuǥù duen te hadì si Ebed Melec te, “Dumaha nu is 30 he menge etew puun dini ne vetuna niw si Jeremias puun dutun te teheb su wey kenà mebpatey.”
11Umbe, miduma ni Ebed Melec haazà he menge etew ne midhendiyè dan te budiga zuen te turuǥan. Ne nenguwa si Ebed Melec dutun te menge tuǥak ne inteyuntun dan heini duma te pisì diyà te ki Jeremias dutun te vudsi.
12Migkeǥiyan ni Ebed Melec si Jeremias te, “Ihanig nu te irek nu heeyan is menge tuǥak su para kenè ka mesekiti keniyan te pisì.” Ne mibeelan ni Jeremias haazà,
13ne miguyud dan sikandin su wey mekeǥawas dutun te vudsi. Ne hein nepasad haazà mibpedayun is kegkepirisuwa ki Jeremias diyà te ubpeey te menge vantey te turuǥan.
14Dutun impetawag ni Hadì Zedekia si Jeremias diyà te iketelu he ǥemawan te valey te Nengazen. Migkaǥi si Zedekia ziyà te ki Jeremias te, “Duen ku id-insà kenikew, ne iyan suat ku he keǥiya nu kayi te kediey is tutuu.”
15Migkaǥi si Jeremias diyà te ki Zedekia te, “Emun egkeǥiyen ku ziyà te kenikew is tutuu, ne ibpehimetayan a gihapun kenikew. Minsan edsembaǥan ku sikew, kenè ka ǥihapun ebpemineg kedì.”
16Piru meeles he nenangdù si Hadì Zedekia ziyà te ki Jeremias. Ke sikandin te, “Ebpenangdù a pinaaǥi te Nengazen he uuyag, he iyan mibeǥey kenitew te untung, he kenè ku sikew edhimetayan wey kenè ku sikew ibeǥey ziyà te menge etew he egkesuat he edhimatey kenikew.”
17Migkaǥi si Jeremias diyà te ki Zedekia te, “Iyan heini migkaǥi te Nengazen he Megbevayà he Mekeǥeǥehem, he Megbevayà te Israel: Emun edsurindir ka ziyà te menge upisyal te hadì te Babilonia, egkelibri nu is untung nu ne kenà heini ebinsulan is inged. Ne sikew wey is pemilya nu ne egkeuyag-uyag.
18Iyan, emun kenè ka edsurindir, ne ibeǥey heini he inged diyà te menge tig-Babilonia, ne ebinsulan dan heini ne kenè ka ebpekelikey.”
19Migkaǥi si Hadì Zedekia te, “Egkahandek a te menge Judio he nekidsevaha te menge tig-Babilonia. Kela ke iveǥey a te menge tig-Babilonia ziyà te kandan ne edresayen e zan.”
20Midtavak si Jeremias te, “Kenè ka ibeǥey ziyà te kandan emun ebpezumdumahan nu is Nengazen. Egkelibri is untung nu ne wazà egkehitavù kenikew.
21Iyan, emun kenè ka edsurindir ne iyan heini impezayag te Nengazen kayi te kedì he egkehitavù kenikew:
22Is langun he menge vahi he nesamà diyà te turuǥan nu ed-uwiten te menge upisyal te hadì te Babilonia. Heini he menge vahi, egkaǥi sikandan diyà te kenikew te, ‘Midtuntu ke zà te utew nu menge emiǥu. Guntaan te nekeleveng en diyà te basak is menge paa nu, ne mid-ewaan ke zan.’
23“Is langun he menge esawa nu wey menge anak nu ebihaǥen te menge tig-Babilonia. Sikew mismu ne kenè ka ebpekelikey kandan; ebihaǥen ka te hadì te Babilonia, ne ebinsulan dan heini he inged.”
24Ne zutun migkaǥi si Zedekia ziyà te ki Jeremias te, “Kenè nu tudtula is nevitiyeraan ta su wey ka kenà mebpatey.
25Kela ke metudtuli is menge upisyal he mibitiyara ki ne ed-insà sikandan diyà te kenikew te, ‘Hengkey is midhisgutan niw te hadì? Ne emun kenè nu idtug-an ne edhimetayan dey sikew!’
26Kegiyi nu sikandan te, ‘Mibpehizuhizu a te hadì he kenà ad ilikù diyà te valey ni Jonatan su ebpatey a zutun.’ ”
27Ne midhendiyà iyan is menge upisyal te ki Jeremias ne mid-insaan dan sikandin. Ne midtavak din sikandan duen te ibpetavak te hadì kandin. Umbe wazè dan en medsigudu medsusi. Wazà nekezineg te nevitiyeraan ni Jeremias wey haazà is hadì.
28Mibpedayun is kegkepirisuwa ki Jeremias diyà te ubpeey te menge vantey te turuǥan taman te andew te kegkeeǥawa te Jerusalem.
