IOSUA 21:3-12

³Taunabunai, Israel taudia ese idia ahudia amo Levi taudia edia hanua bona edia rei gabudia e henidia, Iehova ena haheḡani heḡeregerena. Gabudia bini:

⁴Mari ese e duanaia guna oreana na Kohat ena. Levi taudia, hahelaḡa tauna Aaron vevena, ese hanua gwauta-toi mari amo e abidia, Iuda bona Simeon bona Beniamina iduhudia edia tano lalodiai;

⁵a Kohat ena orea taudia oredia ese hanua gwauta mari amo e abidia, Efraim bona Dan iduhudia bona Manase iduhuna kahana edia tano lalodiai.

⁶Gereson ena orea taudia ese hanua gwauta-toi mari amo e abidia, Isakara bona Asere bona Napatali iduhudia bona Manase iduhuna kahana edia tano lalodiai, Basan ai.

⁷Merari ena orea taudia ese hanua gwauta-rua e abidia, Ruben bona Gad bona Sebulun iduhudia edia tano lalodiai.

⁸Ini hanua, mai edia rei gabudia ida, Israel taudia ese Levi taudia e henidia, mari amo, Iehova ese Mose e haḡania heḡereḡerena.

⁹Iuda iduhuna bona Simeon iduhuna ahudia amo e henidia hanuadia ladadia bini.

¹⁰Levi taudia hahelaḡa tauna Aaron vevena, Kohat oreana ai, mari ese e duanaidia guna taudia,

¹¹edia hanua ta be Kiriat-araba, Anak tamana Araba ena hanua, Iuda ororodia ai, (ladana ta be Heberon), mai ena rei gabudia ida.

¹²Ḡau tamona, hetabira tanodia bona hanua maraḡidia na Kaleb lefune e henia, ena gabu.