Josua 21:3-12

³Iei mine ekewe aramasen Israel ra ngeni chon ewe ainangen Lefi ekei telinimw pwal ekewe fanü ünükür fän iten nöür man seni lon fanüer fän än ewe Samol mi Lapalap allük.

⁴Iwe, ekewe familien lon ewe eterekesin Kohat seni ewe ainangen Lefi ra akomwen angei inetir telinimw ren üttüt. Ekewe famili ir mwirimwirin ewe souasor Aaron, ra angei ren pwüngün üttüt ükükün engol me ülüngat telinimw seni chon ekewe ainangen Juta, Simeon me Peniamin.

⁵Nge ekewe lusun me lon ewe eterekesin Kohat ra angei ren pwüngün üttüt ükükün engol telinimw seni chon ekewe ainangen Efraim, Tan me esopun ewe ainangen Manasa.

⁶Iwe, ekewe famili lon ewe eterekesin Kerson ra angei ren pwüngün üttüt ükükün engol me ülüngat telinimw seni chon ekewe ainangen Isakar, Aser me Naftali, pwal seni esopun ewe ainangen Manasa me lon Pasan.

⁷Nge ekewe famili lon ewe eterekesin Merari ra angei ükükün engol me ruu telinimw seni chon ekewe ainangen Rupen, Kat me Sepulon.

⁸Iwe, ekewe aramasen Israel ra ngeni chon ewe ainangen Lefi ekei telinimw, pwal ekewe fanü ünükür fän iten nöür man ren pwüngün üttüt, usun ewe Samol mi Lapalap a fen allük ngeni Moses.

⁹Ikkei iten ekewe telinimw chon ekewe ainangen Juta me Simeon

¹⁰ra ngeni ekewe mwirimwirin Aaron, ir seni ewe eterekesin Kohat seni ewe ainangen Lefi, pun ewe üttüt a toriir akom.

¹¹Iwe, ra ngeniir ewe telinimw än Arpa. (Ewe mwän Arpa semen Anak.) Iei ewe telinimw a iteni Hepron, a nom won chukuchukutän ewe fanü Juta. Ra pwal ngeniir ewe fanü ünükün fän iten nöür man.

¹²Nge ekewe tanipi ünükün ewe telinimw me wisoposopun kewe ra fen ngeni Kalep nöün Jefune we mwän pwe fanüan.