Joshua 21:3-12

³Ere bod rogon ni yog SOMOL ngak e girdi’ nu Israel, ma aram miyad pi’ ngak e pi Levi boch e binaw rorad nge pi flang riy ni nge tafnay e gamanman rorad.

⁴Pi tabnaw ko fare ke girdi’ rok Kohath u lan e ganong rok Levi e th’abi som’on nni pi’ boch e binaw ngorad. Pi tabnaw ni owchen Aron ni prist e npi’ ragag nge dalip e binaw u daken e gin tafen Judah, Simeon nge Benjamin.

⁵Ma tin kabay ko fare ke girdi’ rok Kohath e npi’ ragag e binaw ngorad u daken e gin tafen pi Efraim, nge Dan nge ba’ ni Ngal e Manasseh.

⁶Fare ke girdi’ rok Gershon e ni pi’ ragag nge dalip e binaw ngorad u daken e gin tafen Issakar, Asher, Naftali, nge ba’ ni Ngek e Manasseh.

⁷Fapi tabnaw rok fare ke girdi’ rok Merari e ni pi’ ragag nge l’agruw e binaw ngorad u daken e gin tafen Ruben, Gad, nge Zebulun.

⁸Girdi’ nu Israel e ra girengiyed e pow ni nge duwgil e pi binaw ney nge yungi flang riy ni fan ko pi Levi, ni bod ni yog SOMOL ngak Moses.

⁹Irera’ fithingan e pi binaw u daken e gin tafen Judah nge Simeon ni fa’an nni pi’

¹⁰ngak e pi’in owchen Aron nrabad ko fare ke girdi’ rok Kohath, ni pi’in owchen Levi. Yad e th’abi som’on nni pi’ taferad.

¹¹Ni pi’ ngorad fare binaw nu Arba (Arba e chitamngin Anak), chiney e yima yog yu Hebron ngay, ni bang ni go’ burey u Judah, nib mu’un e flang riy ngay nib liyeg ni fan ko chugol gamanman.

¹²Machane, yungi flang ko re binaw nem nge yuchi binaw riy, e go’ kan pi’ ngak Kaleb nib mo’on ni fak Jefunneh ni nge tafnay.