JOSUA 21:3-12

³Irec Israe ŋic jaŋe Wofuŋzi mutâcnewec irec sâcko Lewire guru jaŋe hae â hae rârec sopâc kecɋaŋ mâreŋ forawec i lama bulimakaofâc‐jeŋic râec‐jopaniŋte jaŋacne mâreŋkonec dâkâne jarembiŋ.

⁴Eme ɋâsâi qapie Kohatire guru garikiŋ‐jeŋic sâc jaŋere ʒâŋe i bâbâni fuawec. Izi Lewire guru jaŋeraonec taha bapa Aroŋte ɋâricfâc jaŋe Juda, Simeoŋ â Benjamiŋ guru jaŋeraonec hae 13 jarembiŋ.

⁵Iŋuc erâ Kohati guru nâfocne jaŋere mocwâc qapie ine Eferaim, Daŋ â Manase guru dâkâne garikiŋ‐jeŋic sâc jaŋeraonec hae 10 jarembiŋ.

⁶Eme Isasa, Ase â Naftali guru garikiŋ‐jeŋic sâc, erâ Manase guru dâkâne Basaŋ mâreŋko jumbiŋ jaŋeraonec hae 13 i Geresoŋte guru jarembiŋ.

⁷Eme Merarire guru garikiŋ sâc jaŋe Rubeŋ, Gade â Sebuloŋ guru jaŋeraonec hae 12 jarembiŋ.

⁸Wofuŋzi Mose mutâcnecneme mufua‐jarewec irec sâcko Israe ŋic jaŋe ɋâsâi qahuc hae rârec lama bulimakaofâc‐jeŋic râec‐jopaniŋte Lewi guru hae â mâreŋ i jarembiŋ hâcne.

⁹Juda â Simeoŋ guru jaŋeraonec hae ʒiŋuc

¹⁰i Lewire guruonec Kohatire ɋâricfâc Aroŋte guru jarembiŋ. I ɋâsâi qapie jaŋere ʒâŋezi bâbâni fuawec hâcne.

¹¹Juda tiki mâreŋko Anaka mamac‐ticne Araba ere hae ŋewec, Heboroŋ hâcne, hae i â râreckerâ mâreŋ forawec i lama bulimakaofâc‐jeŋic râec‐jopaniŋte mâmâc jarembiŋ.

¹²Â hae irec hesarac mâreŋ â hae piticne gâcne ine Jefune ŋokâ‐ticne Kalebezi ro rauc eocte râcnembiŋ.