Iosua 21:3-12

³Ma ra tarai Israel dia ga tul tar go ra umana pia na pal ta ra tarai Levi varurung ma kadia pia na vura, ta kadia tiniba, varogop ma ra vartuluai kai ra Luluai.

⁴Ma di ga padapadailam pa ra tiniba kai ra lavur apik na tarai ta ra tarai Koat; ma ra umana natu i Aron ra tena tinabar, ta ra tarai Levi, dia ga vatur vake a vinun ma a utul a pia na pal ta ra vuna tarai Iuda, ma ra vuna tarai Simeon, ma ra vuna tarai Beniamin, ta ra padapadailam.

⁵Ma ra ibaiba ta ra tarai Koat dia ga vatur vake a vinun na pia na pal ta ra umana apik na tarai ta ra vuna tarai Epraim, ma ra vuna tarai Dan, ma ra ngungu vuna tarai Manase, ta ra padapadailam.

⁶Ma ra umana natu i Gerson dia ga vatur vake a vinun ma a utul a pia na pal ta ra umana apik na tarai ta ra vuna tarai Isakar, ma ra vuna tarai Aser, ma ra vuna tarai Naptali, ma ra ngungu vuna tarai Manase aro Basan, ta ra padapadailam.

⁷A umana natu i Merari, varogop ma kadia lavur apik na tarai, dia ga vatur vake a vinun ma a ura pia na pal ta ra vuna tarai Ruben, ma ra vuna tarai Gad, ma ra vuna tarai Sebulun.

⁸Ma ra tarai Israel dia ga padapadailam tar go ra umana pia na pal ma kadia pia na vura ta ra tarai Levi, da ra Luluai i ga vartuluai tai Moses.

⁹Ma dia ga tul tar go ra umana pia na pal kai ra vuna tarai Iuda ma kai ra vuna tarai Simeon, nina di tumu ra iang i diat,

¹⁰upi kai ra umana natu i Aron, ta ra apik na tarai Koat ta ra vuna tarai Levi; tago di ga padapadailam pa ra luaina tiniba ba kadiat.

¹¹Ma dia ga tul tar Kiriat-Arba ta diat, Arba nina tama i Anak, (Kebron nam), ta ra gunan i lualuana Iuda, ma ra umana pia na vura kikil ia.

¹²Ma ra lavur pia na uma kai ra pia na pal, ma kana umana gunan ik, dia ga tul tar ia tai Kaleb natu i Iepune upi kana tiniba.