Hosea 4

1

2

3

4

5

6

7

8

9

10

11

12

13

14

¹O Israe kikefuŋ, ŋoŋe Wofuŋte dâŋ mananiŋ! Maŋjauŋ â siocmâc juju â Anutu mamana tara i mâreŋko mi fokacte Wofuŋzi mâreŋte ŋecjucfâc jaŋe dâŋgieo râec‐jopakac.

²Jaŋe sâwecdâŋ mueŋgopieŋ, burec eeŋgopieŋ, ŋic qâhâmoc‐jopaeŋgopieŋ, fiuc roeŋgopieŋ, boe sau eeŋgopieŋ, wiac i ɋârâŋkeha soc ruruac ehuc kiŋ hotâckeeŋgopieŋ.

³Irec hâcne mâreŋzi makuc bakac, â fainao ŋec juc eeŋgopieŋzi hâmo betaŋ efâreeŋgopieŋ; erâ kâte qowi mecne, sawa wipe mecne, erâ wâc hâwec qowi jaŋe mâmâc sipirickeeŋgopieŋ.

⁴Iŋuc fuahame ŋic moczi âgo‐ticne dâŋgieo mi râezejec, â moczi âgone dâŋ mi mucnezejec; o taha bapa, gore dâŋ ine noni mutarapemu.

⁵Go ʒoaŋko fâfâcguzejec, ehame porofete e ŋafeo gohec mâmâc fâfâc‐ŋofazejec; eme neŋgoc egarekac e imackepemu.

⁶Ŋicfâc‐nane jaŋe mamana tara mi fojarewecte sipiric‐jopakicne, go ine mamana tara qikiŋnemeŋte no behecgupe taha bapa mi junarezemec. Go Anutugere mumutâc dâŋ irec nikecguwecte no ŋokâfâcge jaŋere wâc nikecnuocmu.

⁷Taha bapa jaŋe fehuc fua sawec embiŋ, irec sâc jaha hehesic bocjaha ehuc bunaneo bambiŋ, irec no ʒâŋe biŋe‐jeŋic bârisiepe mimi qaqanehec ezejec.

⁸Ŋicfâc‐nane jaŋe kiŋte taha bâzi râepie ro nâc eeŋgopieŋ, ehuc ŋic jaŋe kiŋ bâfuahuc taha bocjaha bafisiniŋte ejareekac.

⁹Irec ŋic jaŋe wiac fua‐jareocmu sâc ijaha taha bapa fua‐jarezejec; no juju‐jeŋic bâtiŋnehuc eebapa‐jeŋicte okacne bazu‐jarepemu.

¹⁰Jaŋe nânâ nâpie mi gapec‐jopazejec, â sasec gie bahuc mi sawenʒepieŋ, i sasec gie baniŋte Wofuŋ no râpecnumbiŋ hâcne.

¹¹Waiŋ raŋɋane me ɋâricne nâpie maŋsifuc ejareekac.

¹²Ŋicfâc‐nane jaŋe wiac jâczi bakicne i mu indiŋ ecneeŋgopieŋ, ehame gunu‐jeŋiczi mufua‐jareekac. Sasec giere mamanasuzi maŋsifuc bâfua‐jarewec, eme sâqocne baniŋte Anutu‐jeŋic râpeckembiŋ.

¹³Tiki botâŋko taha bâzi, â mâreŋ facnao hosâc âsu biaŋ rikeeŋgopieŋ; ine boriŋ, jâmiŋ â niwijâczi mumuc biaŋne qaha jâc jaŋere fuŋnao iŋuc eeŋgopieŋ. Irec otâfâc‐ŋeŋic jaŋe sasec gie baniŋmu, â joŋaofâc‐ŋeŋic jaŋe sau gie baniŋmu.

¹⁴Eme otâfâc‐ŋeŋic sasec gie baniŋmu, me joŋaofâc‐ŋeŋic sau gie baniŋmu no mi bâtiŋ‐jopapemu; i jaŋe jaŋac wâc qâsorierâ sasec ŋokac jaŋehec juhuc sasec ŋokac mucjopakicne jaŋehec taha bâzi rikeeŋgopieŋte. Iŋuc fuame ŋic ŋokac jaŋe mutuc ehuc sipirickeeŋgopieŋ.

¹⁵Israe, go sasec gie bahaŋtecne Judaŋiczi kiŋ bahac mi bâfuazejec. Ŋoŋe Giligali haeo mi ranʒepieŋ, me Betaweŋ nemu ufuŋko wâc mi fenʒepieŋ, ehuc Wofuŋ jujune erao ɋetickehuc dâŋ i me i mi mupaŋkenʒepieŋ.

¹⁶Israe e bulimakao râŋgeŋne iŋucne râŋgeŋkewec, iŋuc eme Wofuŋzi wemocko manacneme lama iŋucne mâreŋ qaratiekicnao nânâ nâhuc juocmu.

¹⁷Eferaim e nemu jabane jaŋerao ʒuhuckewec, irec e behepie juoc!

¹⁸Jaŋe opâ sanaŋ nâpie maŋjeŋic sifuckeme sasec gie baeŋgopieŋ, ehuc wiac miminehec irec manapie feha ʒâŋe biŋe‐jeŋic bawahaeŋgopieŋ.

¹⁹Maŋsifucte mâŋâŋzi foŋjoparâ ficne suec‐jopawec, irec alatafâc‐jeŋic jaŋere erâ qurutuaniŋmu.