Ose 4

1

2

3

4

5

6

7

8

9

10

11

12

13

14

¹Yeen bànni Israyil, dégluleen kàddug Aji Sax ji, Aji Sax ji kat moo séq ab layoo ak waa réew mi: «Du kóllëre, du ngor, du gennug ràññee Yàlla ci réew mi.

²Xanaa ay móolu aki wor, bóome, càcc ak njaaloo. Dañoo ràkkaaju, di tuur deret ci kaw deret.

³Moo tax réew mi wowal, mboolem lu fi dëkke ràgg, ba ci rabi àll yi, ak njanaaw yi, jëni géej itam day réer.

⁴«Waaye bu ci kenn layoo, bu ci kenn sikke, ndax sa bokk yee mel ni ñuy layook sarxalkat yi.

⁵Dingeen tërëf bëccëg, yonent yi ànd ak yeen tërëf guddi, te maay sànk seen ndey.

⁶Sama ñoñ a sànku ndax ñàkka xam; yeen, xam-xam ngeen gàntal, ma gàntal seenug carxal. Yeena fàtte seen yoonu Yàlla, man it maay fàtte seeni doom.

⁷sarxalkat yi ñu gëna baree, gën ma nee moye, seenub sag, gàcce laa koy soppi.

⁸Sama saraxi póotum bàkkaari ñoñ lañuy dunde, tey yàkkamti ñu def njubadi.

⁹Waaye niki askan wi, niki sarxalkat yi, maa leen di dikke seen añu jikko, maa leen di fey seeni jëf.

¹⁰Ñooy lekk te duñu regg, di gànctu te duñu giir, nde Aji Sax ji lañu noppee topp.

¹¹Ngànctu ak biiñ bu yàgg ak bu bees, moo yóbbu seenum xel.

¹²Sama ñoñ, seen bant lañuy seeteey, seenu yet di leen waxaleey. Xelum ngànctu moo leen wacc, ñooy gànctu, lajje fa seen Yàlla.

¹³Ca kaw tund yu mag ya lañuy rendee ay sarax, cuuraay, ñu taale ca tund yu ndaw ya, ak ca taatu gii garab gu mag, ba ca gee, fa ker ga neexe. Moo tax seeni doom di gànctu, seen séeti doom di jaaloo.

¹⁴Duma mbugal seeni doom ndax li ñuy gànctu mbaa seen séeti doom ndax li ñuy jaaloo, ndax ñoom sarxalkat yi ci seen bopp, ay gànc lañuy teggeendool te gànc yi ci jaamookaayi xërëm yi, ñoom lañuy indeendool jooxe. Askan wu amul ug dégg, sànku.

¹⁵«Yeena ngi gànctu, yeen bànni Israyil, waaye na Yuda mucc ci googu tooñ. Buleen dugg Gilgal, buleen yéegi Bet Awen di giñ ci Aji Sax jiy dund.

¹⁶Ndegam ni aw nag tëwe ni la Israyil tëwe, ndax léegi Aji Sax jee leen di foral nim xar ci parlu mu ne màww?

¹⁷Efrayim googu laa ne, moo lëngook jëmmi tuur! Seetaan leen.

¹⁸Seenu ñoll giiful sax, ñuy gànctoo gànctu, te gàccee gënal seeni kilifa.

¹⁹Callweer a leen di wal, ñu kersawoo seen jooxey tuur.