1Iwe, wesin ewe fitikoko, Paulus a körifengeni ekewe chon lükü Jesus, a kapong ngeniir o eäni kapasen amwirimwir ngeniir mi apöchöküla letiper. Mürin a feil seniir o feila Masetonia.
2A saifeil lemenen ewe fanü o apöchöküla letipen ekewe aramas ren chomong an afalafal. Mürin a tori Akaia
3o a nonom ikenan lon ükükün ülüngat maram. Lupwen Paulus a amolätä an epwe sai ngeni Siria, a rongorong pwe ekewe chon Juta ra rawangauei. Iei mine a filätä an epwe liwinsefäliti lemenen ewe fanü Masetonia.
4Sopater nöün Pirrus seni Perea a eti, pwal Aristarkus me Sekuntus seni Tesalonika, Kaius seni Terpe, Tikikus me Trofimus seni ewe fanü Asia me Timoty.
5Ra akomwola mwem o witiwitikem lon Troas.
6Iwe, äm aia sai seni Filipi mürin ewe Chulapen mongö pilawa esap wor iis lon, nge limu rän mürin aia chufengen me ir lon Troas. Iwe, aia nonom ikenan lon ükükün eu wiik.
7Iwe, lekuniolun räninamol äm aia chufengen o mongöfengen ewe mongön ach Samol. Iwe, Paulus a afalafala ekewe aramas, nge a chök sopwela le afalafaleer tori lukenipwin, pun a ekiekin feil seniir sorotän ewe rän.
8Mi wor chomong lamp lon ewe ruum asan ia ra chufengen ie.
9Eman alüal itan Oitikus a mot lon eu asammwacho. Nge lupwen Paulus a sopwela chök le afalafal, Oitikus a echikichikila o möürüla tori a möürüchoula. Iwe, a turutiu lepwül me won aülüngatin sässärin ewe imw. Nge lupwen ra ekietä, a fen mäla.
10Nge Paulus a feitiu rer, a chapela won ewe alüal o romi. Iwe, a apasa, “Ousap lolilen, a chüen manau!”
11Mürin a liwinsefälitä won ewe sässärin asan, a utu pilawa o ra mongöfengen me ekewe chon lükü Jesus. Iwe, Paulus a kapas ngeniir tori akkar a tötä, mürin a feil seniir.
12Iwe, ra emwenala ewe alüal ngeni lenian, nge a manau. Iwe, ekewe aramas ra fokun chipila.
13Iwe, äm aia akomwola won sip o saila tori Assos, ikenan äm aia angei Paulus me ie. Pun Paulus a ürenikem pwe aipwe föri iei usun, pokiten i a mochen fetal won fanü tori Assos.
14Lupwen a churikem me lon Assos, a tötä rem won ewe wa, o äm aia sai ngeni Mitilene.
15Äm aia sai seni ikenan o sorotän ewe rän äm aia tori wenewenen Kios. Eu rän mürin aia tori Samos, nge sorotän ewe rän aia tori Miletus.
16Iwe, Paulus a filätä pwe esap tori Efisos, pwe esap mochen alusala an fansoun lon ewe fanü Asia. Pun a atapwal ngeni an epwe tori Jerusalem lon ewe ränin Pentikost are epwe tufich.
17Iwe, seni Miletus Paulus a tinala echö toropwe Efisos o tüngor ngeni ekewe souakomwen mwichefel pwe repwe feito o chufengen.
18Lupwen ra feito ren, Paulus a üreniir, “Ämi oua silei usun manauei me ewe angang üa föri lon unusen ewe fansoun üa nonom remi, seni ewe aeuin rän üa tori ewe fanü Asia.
19Fän unusen tipetekison pwal fän watten chönün mesei üa föri ai angang usun eman nöün ewe Samol chon angang lon ekewe fansoun weires mi toriei pokiten än ekewe chon Juta rawangauaei.
20Oua silei pwe üsap amwöchü och mine epwe alisikemi lupwen üa afalafalakemi o aiti ngenikemi ewe pworaus usun ewe Samol Jesus lon mwichen aramas pwal lon en me imwan.
21Üa apöchöküla ai fön ngeni ekewe chon Juta me ekewe chon lükün Israel, pwe repwe kul seni ar tipis kana o kul ngeni Kot, repwe pwal lükü ach Samol Jesus.
22Nge iei, pokiten ai aleasochisi ewe Ngünmifel, ngang üpwe feila Jerusalem. Nge üsap silei mine epwe fis ngeniei me ikenan.
23Üa chök silei pwe lon ekewe telinimw meinisin Ngünmifel a amefi ngeniei pwe üpwe tolong lon fötek me riaföü.
24Nge manauei esap aüchea ngeniei. Üa chök mochen awesala ai kitir o awesöchüela ewe angang ach Samol Jesus a ngeniei pwe üpwe föri. Iei ewe angang ai üpwe pwärätä ewe Pworausen Manau usun ewe ümöümöchün Kot.
25Ngang üa nomfeil leimi o afalafal usun ewe Mwün Kot. Nge iei üa silei, pwe üsap chüen künasefälikemi.
26Iei mine üpwe fokun pwäri ngenikemi ikenai: Are eman leimi epwe pöütmwälila, esap tipisi.
27Pun ngang üa apworausa ngenikemi unusen ekiekin Kot, nge üsap amwöchü och senikemi.
28Iei mine oupwe mamasakemi me unusen chon ewe mwichefel ewe Ngünmifel a atolongeer fän ämi tümwün. Oupwe chon masen ewe mwichefelin Kot, i a möni ren chaan püsin Nöün we.
29Ngang üa silei pwe mürin ai üpwe feila senikemi, aramas mi wewe ngeni wolif mwacho repwe feito leimi o repwe fokun afeiengaua ämi we mwich.
30Epwe war ewe fansoun, lupwen ekoch me lon ämi we mwich repwe eäni kapas chofona ar repwe atokala ekewe chon lükü Jesus pwe repwe etiir.
31Iei mine oupwe mamasa. Oupwe chechemeni pwe lon ükükün ülüngat ier, üsap ükütiu le fönöü eman me eman leimi lerän me lepwin fän chönün mesei.
32Nge iei üa anomukemi fän tümwünüen Kot me an kapasen ümöümöch. I a tongeni apöchökülakemiitä o ngenikemi ekewe feiöch a iseis fän iten nöün aramas meinisin.
33Ngang üsap mocheniaiti än eman silifer ika kolt ika mangaku.
34Ämi oua püsin silei, pwe ngang üa püsin angang ren pei pwe epwe wor ekewe mettoch meinisin ngang me chiechiei kewe aia osupwang ren.
35Ngang üa aiti ngenikemi lon ai föför meinisin, pwe ren ach angang weires lon ei sokun lapalap sipwe fokun alisi ekewe chon apwangapwang o chechemeni ekewe kapas ach Samol Jesus a püsin apasa, ‘Sia feiöch ren ach fang lap seni ach angei mettoch.’”
36Lupwen än Paulus wes le apasatä ekei kapas, a fotopwäsuketiu fiti ir meinisin o iotek.
37Iwe, ir meinisin ra kechü lupwen ra kapong ngeni fän ar tong.
38Ra fokun lolilen ren an apasa, pwe resap chüen künasefäli. Mürin ra etala tori ewe sip epwe eti.
