1I SOMOL e non ngog.
2Ni ga’ar, “Fak e girdi’, mog ko en ni be tay murung’agen yu Tyre, e n’en ni gu be yog ngak, I Gag, SOMOL ni Th’abi Tolang: Kam langlang ngalang ko ufanthin, ga be yog ni gur reb e got. Ga be yog ni gab got ni ka mu par nga tagl’im ni tagil’ e pilung, nib liyegem e day. Rayag ni ngu’um dake gab got, machane dangay, ya gab girdi’ gathi bod rogom ba got.
3Leam rom e gab llowan’ ngak Danel, ndariy ban’en nrayag i mithag rom.
4Ni gonop rom nge fanam salap e ke gagiyegnag ka mu fla’ab ko gol nge silber.
5Ni ri gab salap u rogon i tanameg e siyobay nge rogon ni be yib e win ngom riy. Ka ri puw ufam nga fani yo’or ban’en rom!
6“Ma aram e chiney e Gag SOMOL ni Th’abi Tolang e gu be ga’ar: Bochan ni ga be leamnag ni ga bod feni llowan’ ba got,
7ma aram e bay gu pi’ e to’ogor nib buchan’ nge cham ngom. Bay ra gatheyed urngin e pin’en ni fafelel’ ni mu thognag ko salap nge gonop rom.
8Bay ra li’ed gur ngamum’ miyad tharbegem nga maday nike mang low rom.
9Nap’an ni yad ra yib ni ngar li’ed gur, ma kag ra yog ni gur reb e got? Nap’an ni ga ra sabliy e pi’in ngar thanged e pogofan rom, ma gab girdi’ gathi gur reb e got.
10Ga ra yim’ ni bod ba pilis u pa’ e milekag ni dar nanged got. I Gag SOMOL ni Th’abi Tolang e kugog.”
11Maki non SOMOL ngog bayay.
12Ni ga’ar, “Fak e girdi’, nge kireban’um ko n’en ni nge buch ni be sonnag e pilung nu Tyre. Mog ngak ni gag SOMOL ni Th’abi Tolang e gu be ga’ar: Immoy bingyal’ ni gur e un guy rom e tin bfel’ ban’en. Ni rogon fanam picho’ay nge fanam gonop!
13Ku’um par u Eden, ni fare gi milay’ rok Got, ni um nunuw ko urngin mit e churwa’ nib totolang puluwon: Rubies nge diamonds; topaz, beryl, carnelian, nge jasper; sapphires, emeralds, nge garnets. Immoy e nunuw rom ni go’ gol. Nni ngongliy ni fanam fa rofen nni sunmiyem.
14Gu tay ba engel nib kandugwen ni nge matanagiyem. Um par u daken e burey rog nib thothup mu’um man u fithik’ e malang nib galgal ra’en nib totolang puluwon.
15Gafarig rom e bfel’ ko ngiyal’ ni ba’aram nni sunmegem nge yan i mus ko ngiyal’ ni mu tababnag e kireb.
16Kam mit ko falchuway’ nge chuway’, ni aram e ren’en ni waliyem ko cham nge denen. Aram mug tharbogem ni ngam chuw ko burey rog nib thothup, ma fare engel ni i matanagiyem e langem ngam chuw u fithik’ fapi malang nib galgal raen.
17U mu ufanthin nga fanam picho’ay, ma fenam gamog e gagiyeg nagem ngam ngongol i balyang. Ni arfan ngay ni kug tharbegem nga but’ kug pagem ni ngam mang ba magin ni nge ginaeng boch e pilung.
18Bochan e pi sasalap ni um rin’ ko falchuway’ nge chuway’, ma aram e yungi tagil’ e meybil rom e ke mogothgoth. Ere nggup’ e nifiy ko fare binaw nge mo’oruf nga but’. Gubin e pi’in yad be yaliyem e yad be guyem ni ga be lul’ i yan nga but’ ni kam ngal’ ni owat.
19Gur e kamchuw, ni dab kumsul bi’id, ma gubin e nam nike nangem e kar digowgad, nrichey miyad un ngom ko gafgow.”
20I SOMOL e ga’ar ngog,
21“Fak e girdi’, mup nga owchen e binaw nu Sidon e kireb rok.
22Mog ko girdi’ u rom ko mang e gu be yog I Gag SOMOL ni Th’abi Tolang u murung’agrad: Sidon, I gag e to’ogor rom; girdi’ e bay roged e sorok ngog ni bochan e tin kug rin’ ngom. Bay ra nanged ni Gag SOMOL, u nap’an ni gu ra dag fanag thothup ko gechig ni gu ra tay ngak e pi’in yad ma par rom.
23Bay gu pag e liliy nga dakenam mu gu gagiyegnag nge yan e racha’ ni lul’ u lan e yupa’ i kanawo’ rom. Bay ni og ngom u gubin raba’, ngan li’ e girdi’ rom ngarm’ad. Ma aram e bay mu nanged ni Gag fare SOMOL.”
24I SOMOL e ga’ar, “Dakriy reb fapi nam nib chugur ni i togopluw nga Israel ni ku rayag ni mang ba rachangal fa makankan ni nge gafgownag yu Israel. Ma aram e bay ra nanged ni Gag fare SOMOL ni Th’abi Tolang.”
25I SOMOL ni Th’abi Tolang e ga’ar, “Bay gu fulweg e girdi’ nu Israel ko pi nam ni gu weregrad ngay. Ma gubin e nam ni yad ra nang ni gub thothup. Girdi’ nu Israel e bay ra pired u daken e but’ rorad, ni fare nam ni gu pi’ ko tapigpig rog i Jakob.
26Bay ra pired u rom ndabi buch ban’en rorad. Ma bay ur toyed e naun ma yad be ngongliy yung i milay’ ni grape. Bay ggechignag urngin e pi’in yad bbuguliyoror ni ur togopluwgad ngorad, me par yu Israel ni yad ba muduwgil. Ma aram e bay ra nanged ni Gag SOMOL ni Got rorad.”
