1Ipokaki Tajorentsi jempe nojeeki naaka, ikantakina:
2“Shirampari, eeroka noñaanatzi, piyaate pikamanteri iroka ñaantsi pinkatharitatsiri nampitsiki Tiro: ‘Iroka ikantaki Tajorentsi: Owanaana piñaaperowaetaka pishireki, pipinkathatashitakari tajorentsiniro riitaki jeekaentsiri iwinkatharimentoki tajorentsiniro othonka otapotakimi inkaare. Tema eeroka tee pitajorentsitzi, atziri pini, eeroka kenkithashiretashitacha apaniroeni ijeekitantakimi riyomento tajorentsiniro.
3¿Poshiyakaatzi pawijakiri okaatzi riyotanitari Daniel? ¿Tzimatsima nomanimotzimiri kaari piyotzi?
4Tema roori piyotani, okaatzi paawiiri eeroka pimatakiro otzimimotzimi osheki koetyiimotzimiri, piyeekitakiro powantariri ooro eejatzi koriki.
5Osheki pashiminthatawo eeroka pipimantawaetzi poshekyaakiro pashaahawo, rootaki pashaahawo ñaaperotakayimiri pishireki.
6Rootaki ikantantari Tajorentsi: Pantzirorika riitaki yotanitakayimiri tajorentsiniro,
7nokantakahaeyaawo ipoke paashinijatzi atziri rowayiritemi, mataperori iyatsimate atziripaeni, riitaki ameroni rojataamento rowamayemi, eeroka rompoje, owanaana pikameethatzi, yotaniri, aritaki papaawaeteeya pookawenteeyaawo powaneenkawo.
8Rookaetemi inthomoyaaki, eerowa pikamita niyankyaaki inkaare.
9¿Eekiroma pikenkithashiretatziiri tajorentsiniro, arika piñaawakiri ikaate maemanetemini? ¡Arika rotaeyemi ompojemini tekatsira piitya eeroka atzirimacheeni pini!
10Rowamayemi paashinijatzi atziri, poshiyeeyaari rompojeetziri kaariperoshireri. Naaka Tajorentsi, kenkithawaetatsiri, aritaki nokamantakimi.’”
11Ikantakina eejatzi Tajorentsi:
12“Atziri pini eeroka, iroka omampahaantsi pomampaakotyaari pinkatharitatsiri nampitsiki Tiro, pikanteri: Iroka iñaane Tajorentsi, ikantzi: Owanaana pikameethawitaka eeroka, yotani pikanta, owaneenkaki pikanta.
13Pinampiwitakawo pankirentsimashiki Edén-ki, rashitakaawitakimiri Tajorentsi, Osheki owaneenkataka okantakaawo kantawaeyitachari mapiki poreryaari. Pithatanitari ooro rowetsikaetakimiri owakira pañaanaki.
14eenitatsi aayitatsiri, paamaawentyaari, pijeekaki ochempiki itajorentsitakaakiri Tajorentsi. Panashiwaetzi jempe ipiyotapaa ompokiro.
15Tekatsi pikinakaashitya, kameethari pikanta owakira rowetsikaetakimi Roojatzi pikaariperotantanakari.
16Tzimanaki osheki pashaahawo, osheki pikoshekawaetanaka, owanaana pikaariperotanaki. Rootaki nookantakimiri, tee nokowe pijeekimotena. Nomishitowakimi pijeekawitaha ochempiki rashitari Tajorentsi. Riitaki omishitowakimiri aayitatsiri, pitsipawitari pinampitawo ompokiromashiki.
17Piñaakiro powaneenkata, owanaana piñaaperotanaka pishireki. Osheki omajontyaanakimi pishipakiryaanakira. Nookakimi jaawi, osheki pikaanitaki piñaakirira raminaminthatakimi pinkatharipaeni nomishitowakimira.
18Owanaana pikaariperotaki, maperori okoweenkatakaakimi pashaahawo, Iwinkani rowaeta pitajorentsipankote. Rootaki nowantakari paamari jempe pijeeke eeroka, riitaki thonkaemini itaayimi. Iñahaemi pisamampotee jaawi.
19Maawoeni atziri ikaate ñahaemini, osheki ithaawakaemi. Koweenkaki pikanteeya. Ashi powaero eero pitzimae.”
