1Diyesuwa Isalaela Sulu mahudoꞌidi ya faꞌoigogodi, Sekem Nuꞌuna yai, be edi tanutanuwaga, baꞌibaꞌisa, yo tau fakasa mahudoꞌidi sa laoma Yaubada matana yai.
2Na ya falibadi, iyen, Itete somo Yaubada eda Guyau ya libaen, Hiti bwaꞌibwaꞌi edi fuya yai, Ifeleti Hoꞌowana tefana yai sa miya, yo yaubada haisa sa fadebasaedi. Amainiya, ami ulu tubu hesa hesana Tela mate Abelaham yo Nahola tamadi.
3Amainiya Ifeleti yai, Abelaham E foyahi lawen, Kanana Nuꞌuna mahudoꞌina yai, yo ana hiti mulita boludi E fatadadadi, yo natuna E felen, hesana Isako.
4Na Isako nanatuna E felen, hesadi Iyakobo yo Isowa, yo tuꞌadi haisa Idom nuꞌuna yai Isowa E felen, enehena. Na Iyakobo maꞌana hiti mulita sa lau Idipi.
5Fuya lofalofa mulina yai, Mose yo Elon E faꞌobiyodi tau saguhigu. Habahim, heyaheyaya laꞌilaꞌi E leyama Idipi yai.
6Na afa wahamiu E lawe hudoꞌiyedi. Fuyanna Idipi sa lau afulen, Idipi maꞌedi hosi tau awaidi yo hosi edi saliyoti, amainiya sa lau weꞌaidi. Na fuyanna sa mahanoma Gabogabo Balebalelemna sadaina yai,
7sa anꞌeta laoma, itiye, “Aee–, u saguhimai!” Na kamumu E tole, iti yo Idipi dodogadi atiꞌatipudi yai. Na gabogabo E fasiu fuyoi, be sa kapulolo. Ami siba somo E ginauli Idipi lisidi yai.
8Nuꞌu pitapitalina yai ami miya ee–, fuya lofalofa, habahim, E lawemiu Amoli Nuꞌuna yai, Diyodan tefa saisaina yai. Sa hiyalaimiu, na E galatatamiu. Edi tanohi ami abi, enehemiu, na E lau funuhidi umi debamiu yai.
9Na dodoga luwaga, hesa hesana mate Balaki. Tamana hesana Sipoli. In mate Mowabi edi baꞌisa laꞌilaꞌi. Na hesa hesana Balam, tamana mate Beyoli. Mowabi dodogadi, maꞌedi baꞌisa sa hiyalaimiu. Yo fede, Balaki liba ya fatamali lawen, Balam lebena. Ya faliba bena ya kaumananaemiu.
10In moho, ibege ya ataꞌatahi lau Balam lisina, be ya liba fasunumaimiu. Itete sidohana E faloholohomiu Balaki lisina yai.
11Fuyanna, Diyodan hoꞌowana ami lau tefa, be ami mahano laoma Diyeliko Nuꞌuna yai, dodogadi sa hiyalaimiu, doha Amoli, Pelisi, Kanana, Hiti, Giligasi, Hiwi yo Debusi sa hiyalaimiu. In moho, egu sagu yai, ami lei hafihafitidi.
12Bumo hinaga E fatamali bwaꞌiyedi, be Amoli yo edi babaꞌisa luwaga sa weꞌaidi. Hige bena emi kepata yai, e emi pidu yai au faꞌwasabudi.
13Na umaꞌuma tanohidi, yo duhu laꞌi ginaginauli nonohadi E felemiu, mate hige au ginaulidi. Na aho, umaꞌuma uludi nonohadi ami anꞌannidi, wain yo oliwe gabudi, umi hige laꞌi au umahidi.
14Diyesuwa iyen, Yaubada au faꞌatitiyen, yo ma nuwa ofimiu au famuli watan. Ami mumuga edi yaubada doha oitau au peidi yo au nuwa fuiyedi, yaubadadi beyabeyana Idipi, yo Ifeleti Nuꞌudi yai sa famuli watanidi. Na Yaubada Wananaha moho au famuli watan.
15Ibe yena Yaubada Wananaha hige au fanuha, mate, lahai te, nuwamiu au hinelidi. Haba yaubada tausomo ami lau watanidi? Ami mumuga, Ifeleti yai edi yaubada haisa? E Amoli edi yaubada haisa iti edi tanohi yai te, aho te miyamiya? In moho, maꞌagu boga haba Yaubada eda Guyau ꞌe lau watan.
16Dodoga ena liba sa bui, itiyen, Ibege Yaubada Wananaha ai nuwa fuiyen, na yaubada haisa ai famuli watanidi.
17Edi aba lau fayofayoida Idipi yai, Yaubada eda Guyau ya foyafoyahida, yo ena gigibwali ya famahatadi, be te itadi, yo ya ita wata loholohoꞌida nuꞌu haisa somo yai eda aba lau yai.
18Eda fuya mahanoma tanohi yai te, Amoli dodogadi, tanohi tau miyaina, Yaubada ya lau weꞌaidi. Haba ai hinaga Guyau ꞌe famuli watan, In eda Yaubada.
19Na Diyesuwa ya libalau lisidi yai, iyen, Nuwana, hige gonowamiu, Guyau au famuli watan. Ibege emi heyaheyaya i nuwa afuledi. Paꞌana In mate Yaubada Esega. Haba ya fawaiyunuꞌemiu yena yaubada haisa ami famuli watanidi, yo haba ya faheyayamiu yena nuꞌu haisa yaubadadi ami famuli watanidi. Beyabeyana ya loholoho lisimiu yai. In moho, haba ya faheyayamiu, yena ami ginauli doha.
21Diyesuwa alinana sa bui, itiyen, Ii–, haba Guyau ꞌe famuli watan.
22Diyesuwa edi liba ya bui, iyen, Au fawananaha fuyoimiu, haba nuwamiu ami hinelidi, be Yaubada ami famuli watan. Sa liba, tiyen, Ii–, ꞌE liba dudulai!
23Ya liba adidili lebedi yai, iyen, Yena wananaha, nuꞌu haisa yaubadadi au abi afuledi, Guyau, Isalaela eda Yaubada, au tauꞌului.
24Habahim, Diyesuwa sa faliba, itiyen, Haba Guyau eda Yaubada ꞌe lau watan, na ena laugagayo hinaga ꞌe lau watan.
25Lahaina yai, Diyesuwa yo dodoga edi yali sa ginauli Yaubada matana yai. Sekem Nuꞌuna yai ni, laugagayo haisa ya feledi bena sa lau watanidi.
26Yo fede, Yaubada ena laugagayo bukana yai ya ulidi, habahim, Yaubada ena tanohi fafagabina yai ni, umeꞌehu laꞌilaꞌi ya bono, oyagi hesa hesana oki paꞌana yai.
27Ya libalau ouꞌoulidi lisidi, iyen, Umeꞌehu te eda yali fafaꞌilalana, paꞌana Yaubada ena liba mahudoꞌidi lisida yai, umeꞌehu te ya atahiyedi. Yo fede, in haba tau fawananahana lisimiu yai. Haba eda Yaubada ami kawawananahaꞌen, na tabu au lau afulen!
28Mulina yai, Diyesuwa dodoga mahudoꞌidi ya fatamalidi sa lau hesa - hesa ena nuꞌu yai.
29Mulina yai, Yaubada tau saguhina, Diyesuwa, Nun natuna, ya peꞌi. Ena boliman mate 110.
30Ena nuꞌu hesana Timnata Sala, Efalaim Tuꞌadi ganahewadi yai, mate tuꞌa hesa hesana Gaꞌasi tefa lidilidina yai amainiya sa boꞌusai.
31Diyesuwa ma miyamiyana, Isalaela Yaubada sa lau watan, ya lau ee–, ya peꞌi. Mulina yai, Diyesuwa ena babaꞌisa sadaina yai ma miyamiyadi, Yaubada sa lau watan hinaga, paꞌana ginauli mahudoꞌidi Yaubada ya famahatadi lisidi yai, matadi yai sa itadi.
32Beyabeyana, Idipi yai, Diyosepa silanna sa lawen, be adi ulutubu, Iyakobo, adi bwana tanohina haꞌa ya une, maisana mate siluba ouꞌoulidi 100, Hamoli nanatudi lebedi yai, amainiya Sekem nuꞌuna yai sa boꞌusai.
33Yo Eliyesa, Elon natuna ya peꞌi hinaga, be sa boꞌusai, Gibiya Nuꞌuna yai. Nuꞌuna mate Efalaim Tuꞌadi ganahewadi yai, haꞌa sa felen, Eliyesa natuna Fineyasi, enehena.
