1Sairasi ia Parasa ena king lagani namba 3 neganai hereva ta Dirava ese ia hedinaraia Daniela dekenai, iena ladana ta be Belitisasa. Inai hereva be momokani, bona ia be tuari bona nega dika herevana. Inai hereva ena anina be Daniela ese ia abia, badina mata hanai dekenai iena anina ia davaria.
2Unai neganai lau, Daniela, pura toi lalonai lau lalohisihisi bada noho.
3Aniani namona o vamu be lau ania lasi, bona uaina lau inua lasi, bona egu huina lau iduari karaia lasi, ela bona unai pura toi idia ore.
4Unai lagani ena hua ginigunana bona ena dina namba 24 dekenai, Taigarisi Sinavai ena badinai lau gini noho.
5Lauegu matana lau negea daekau neganai, tau ta lau itaia, dabua aukana ia karaia, bona iena gaba gauna be golo.
6Iena tauanina be nadi kakakaka namo herea bamona ia hururu, bona iena vairana be kevaru bamona ia diari, bona iena matana be lahi bamona idia hururu. Iena aena bona imana be idia diaridiari, auri labora idia polisi neganai ia diaridiari bamona. Iena gadona be taunimanima momo idia boiboi edia regena bamona.
7Lau sibona ese inai mata hanai lau itaia. Lau dekenai idia noho taudia be gau ta idia itaia lasi, to idia gari dikadika, bona idia hunia.
8Vadaeni lau sibona lau gini noho, ma inai mata hanai hoa gauna lau itaia neganai egu goada ia ore. Lauegu vairana ena toana be ia idau momokani, tau ta ia diba lasi inai be lau, bona egu goada ia ore momokani.
9Unai tau ena gadona lau kamonai neganai, tano dekenai lau moru diho, lau mase bamona, bona lauegu vairana be tano dekenai ia kamokau.
10Vadaeni unai tau ese lauegu imana ia abia, ia abia isi lau, vadaeni lau gini lasi, to egu imana bona egu tuina dekenai lau noho, bona lau heudeheude noho.
11Ia hereva lau dekenai, ia gwau, “Daniela, Dirava ia lalokau henia bada oi. Oi toreisi, bona lauegu hereva oi kamonai namonamo. Dirava ese lau ia siaia inai, lau mai oi dekenai.”
12Vadaeni, ma ia gwau, “Daniela, oi gari lasi. Oi sibona oi hamanaua, bona hereva ena anina oi tahua dina ginigunana neganai, Dirava ese oiemu guriguri ia kamonai henia. Unai guriguri lau haere henia totona lau mai inai.
13“Parasa basileia ena aneru lohia badana ese dina 21 lalonai lauegu dala ia koua. Unai neganai Mikaela, aneru badana ta, ia mai, lau do ia durua totona, badina lau sibona idia rakatania, lau sibona be Parasa ena king dekenai lau noho.
14Hari lau mai badina korikori be, dokona neganai oiemu bese taudia dekenai do idia vara gaudia do lau hedinaraia totona. Badina inai mata hanai ena anina be vaira nega daudau do ia vara.”
15Unai hereva ia gwauraia neganai, lau be tano lau itaia noho, bona lau hereva diba lasi.
16Vadaeni unai tau, iena toana be taunimanima edia toana bamona ese iena imana ia atoa egu uduna bibina dekenai. Vadaeni lauegu uduna lau kehoa, bona lau hereva. Lauegu vairana dekenai ia gini tauna dekenai lau hereva, lau gwau, “Lohiabada e, inai mata hanai lau itaia dainai lau manoka momokani, bona lau gari dikadika noho.
17Lau be hesiai tauna, iena biaguna vairanai ia gini bamona. Edena bamona lau hereva diba oi dekenai? Lauegu goada ia ore momokani, bona lauegu laga ia doko danu.”
18Vadaeni inai tau ese iena imana lau dekenai ma ia atoa lou, vadaeni goada lau abia.
19Ia gwau, “Dirava ia lalokau henia bada oi, oi gari lasi, to maino bona lalo namo oi abia, do oi goada!” Inai hereva ia gwauraia neganai goada ena mamina lau abia, bona lau hereva, “Lohiabada e, mani oi hereva noho, badina be oiemu hereva dekena amo goada lau abia vadaeni.”
20Bona ia gwau, “Lau mai ena badina oi diba, a? To hari do lau giroa lou, Parasa ena lohia dekenai do lau heatu henia, do lau halusia. Inai murinai Helene ena lohia danu do ia mai.
21Lau mai ena badina be, Hereva Momokani Bukana dekenai ia torea gauna ena anina do lau hamaoroa oi dekenai. To inai gaudia karaia totona lau ia durua tauna ta be lasi, Mikaela sibona ese lau ia durua, ia be oiemu lohia.”
