1Kiru e Perisia ŋicwofuŋ jume jara 3 eha Danie, ʒâŋe‐ticne moc Beletesaza mukicne, erao bararuŋ dâŋ moc fuawec. Eme dâŋ i fârine jâmbâŋ erâ wâc wiac hâhâwicnere mukicne. Danie eki ine dâŋ i manarâ irec fuŋne mana tarawec.
2Danie no dameŋ ira ki mamakuc ehuc juhape sonda 3 tarawec.
3No wiac aaŋacne moc mi nâpo â qowi me waiŋ opâzi micnaneo moc mi huwec, erâ wokemaŋ moc ni rurua juhape sonda 3 tarawec hâcne.
4Eme no mosa namba 1 irec ʒoaŋ gie bapa 24 ira opâ sâko moc ʒâŋene Tigirisi irec mecnao domapo.
5Ehuc fipe rame ŋic moc qoruc ʒoranehec domaha honepo, ŋic e gâjoŋnao umbika moc Ufaʒi mâreŋkonec golzi bakicne i rodomawec.
6Sahac hawari‐ticne i qânâ furi sâko weweaŋne iŋucne, ʒâŋe mai‐ticne i bâbâric iŋucne, ʒâŋe jahec‐ticne i waha tamaeekac irec sâc, me kike‐ticne i aeŋ bâbâroŋzi bâricneekac irec sâc, â dâŋ marac fânâŋ‐ticne i ŋic guru sâko jaŋere dâŋ marac fânâŋ iŋucne.
7Eme Danie no wiac fuawec i bucnane hone manac epo, ŋic nohec jumbiŋ jaŋe ine hone manac mi ehuc mâc ɋarac ɋarac boc qambiŋ, ehuc soŋkezo wisembiŋ.
8Wisepie wiac bipic tatarane keci fuawec i buc juhuc hone manac epo; eme sasanaŋ‐nane omaeha ʒâŋe mai‐nane weaŋkeme betaŋke‐jâmbâŋkepo.
9Iŋuc fuame no ŋic dâŋ marac fânâŋ‐ticne manapo, ehuc mâreŋko hetutuckerâ hâmocne hawari fopo.
10Ehame meticnezi rocnurâ bafaharecnume ɋarac ɋarac qahuc menanezi bâsiŋnehuc dieŋzi herâ ŋepo.
11Eme ŋic eki ʒiŋuc nazawec: “O Danie, maŋjauŋ egarekicne, no dâŋ gazakopac i hazec hâric jaha manarâ faharec, no ʒi gorao sorecnukicne hâcne.” Dâŋ iŋuc nazahame manarâ ɋarac ɋarac qahuc faharepo.
12Faharepe ʒiŋuc nazawec: “Danie, go mi hâwicguoc, go wiac hone manac emeŋ irec fuŋne mana taracmurâ Anutugere maio maŋhuhuŋ jumeŋte dâŋge fuŋnaonecteaŋ manakicne. Eme no irec hâcne warepo.
13Perisia mâreŋte ŋic fekicne eki ʒoaŋ gie bapa 21 râsi enarehuc aka henarewec. Eme Mikae, aŋelo fekicne jaŋeraonec moc hâcne, eki ine baficnuocte fisime behepe Perisia mâreŋte ŋic fekicne ehec juju gie bapic.
14No ine ŋicfâcge jaŋe ʒâhec dameŋko wemo wiac fua‐jarezokac irec dâŋ gazape mana taracmurâ warekopac; wiac fuame hone manac emeŋ i ʒâhec dameŋte biŋe hâcne.”
15Dâŋ iŋuc nazahame no ʒâŋe mai‐nane mâreŋko hetutuckerâ mumutucne enareme fopo.
16Ehame moczi mi ŋic hawari iŋucne fuarâ micbipic‐nane bâuazejec i! Bâuame micnane aŋkerâ mai‐naneo domawec e dâŋ ʒiŋuc âzâcnepo: “O bomboŋ‐nane, no wiac fuame hone manac epo, irec me kike‐nane ɋarac ɋarac qame tâpiri‐nane omaewec.
17Eme ʒi bomboŋ‐nanere kiŋaŋŋic no tâpiri â nokafe basahuc bomboŋ‐nane gohec wemocko dâŋ muc manac enacmu?”
18Eme ŋic hawari iŋucne fuawec e mocwâc bâuacnuhuc basanaŋnuwec.
19Ehuc muwec: “O ŋic maŋjauŋ sâko egarekicne, go mi hâwicguoc; go wamao hâbi hâro juzemec.” E iŋuc nazahame sanaŋkerâ ʒiŋuc mupo: “O bomboŋ‐nane, go basanaŋnumecte dâŋ nazazemec.”
20Eme muwec: “No fuŋne weniŋucte gorao warekopac i moc manakic me? Ʒi ine risiepe Perisia mâreŋte fekicne ehec qaqac enacmu; eme e bawaha‐fârepe Grik mâreŋte fekicnezi ware fisiocmu.
21No jahe bawahac‐jofazore ŋic moczi moc mi baficnuocmu, aricne, aŋelo fekicne Mikae e mocjahazi baficnuocmu. Qanaŋ ine dâŋ fâri qizecnere papiao dâŋ qâreŋkekicne fokac i gazape manazemec.
