1King Nebukanesa ese golo kaivakuku badana ta ia haginia, iena lata be 27 mita bona ena lababa be 3 mita. Unai be Dura ena tano palaka dekenai ia haginia, Babulonia ena tano lalonai.
2Vadaeni Nebukanesa ese hereva ia siaia, lohia taudia, bona gavana taudia, bona tuari biaguna taudia, bona kota biaguna taudia, bona moni naria taudia, bona provinsol komisina taudia ibounai ia boiria, do idia mai, Nebukanesa ia haginia kaivakuku idia hahelagaia karana karaia totona do idia hebou.
3Vadaeni inai tau badadia ibounai be idia haboua mai, bona kaivakuku ena vairana dekenai idia gini.
4Unai neganai hereva harorolaia tauna ese mai gado badana danu ia boiboi, ia gwau, “Bese bona gado idauidau taudia ibounai e, umui kamonai.
5Kibi, bona bibo badana, bona bibo maragina, bona gita badana, bona gita maragina, bona ivilikou ibounai idia gadaralaia ena regena umui kamonai neganai, umui ibounai do umui tomadiho, bona inai kaivakuku, Nebukanesa ese ia haginia gauna, do umui guriguri henia.
6“Do idia tomadiho henia lasi taudia ibounai be unai dina gauna ena nega lalonai, lahi siahu herea momokani lalonai do idia negea vareai.”
7Vadaeni unai taudia ibounai ese unai miusiki gadaralaia gaudia ibounai edia regena idia kamonai neganai, unai taudia ibounai, bese idauidau, bona gado idauidau taudia ibounai idia tomadiho, Nebukanesa ia haginia kaivakukuna dekenai idia guriguri henia.
8Unai neganai Babulonia taudia haida idia lao, Iuda taudia idia samania karaia.
9Nebukanesa dekenai idia hereva, idia gwau, “King badana e, oi noho hanaihanai.
10King badana e, hereva be oi gwauraia vadaeni, taunimanima ibounai kibi, bona bibo badana, bona bibo maragina, bona gita badana, bona gita maragina, bona ivilikou ibounai idia gadaralaia regena idia kamonai neganai, be do idia tui diho, bona inai golo kaivakuku do idia tomadiho henia.
11Bema tau ta ia tomadiho bona guriguri lasi, unai tauna be lahi siahu herea lalonai do idia negea vareai.
12“Iuda taudia haida oi atoa inai Babulonia provins dekenai lohia gaukara oi henia taudia, Sataraka bona Misaka bona Abetenigo, inai taudia be oiemu hereva idia badinaia lasi, bona oiemu dirava idia badinaia lasi, bona inai oi haginia golo kaivakuku be idia tomadiho henia lasi.”
13Nebukanesa ia badu dikadika, bona oda hereva ia atoa, Sataraka bona Misaka bona Abetenigo do idia mailaia. Vadaeni unai tau toi idia mailaia Nebukanesa dekenai.
14Nebukanesa ia hereva henidia, ia gwau, “Sataraka bona Misaka bona Abetenigo e, momokani lau kamonai, lauegu dirava umui badinaia lasi, bona inai lau haginia kaivakuku umui tomadiho henia lasi, a?
15“Inai, bema hari kibi, bona bibo badana, bona bibo maragina, bona gita badana, bona gita maragina, bona ivilikou ibounai regena umui kamonai neganai, bema umui tui diho, bona inai lau haginia kaivakukuna umui tomadiho henia be namo, to bema umui tomadiho henia lasi, be inai dina gauna lalonai, umui do idia negea inai lahi siahu herea lalonai. Edena dirava ese lauegu imana dekena amo ia hamauria diba umui?”
16Sataraka bona Misaka bona Abetenigo ese king idia haere henia, idia gwau, “Nebukanesa e, inai hereva dekenai aiemai haere be lasi.
17“Bema unai bamona oi karaia neganai, aiemai Dirava ese inai lahi siahu herea dekena amo ia hamauria diba ai, bona king e, oiemu imana dekena amo do ia hamauria ai.
18“To bema lasi, king e, inai do oi diba namo, oiemu dirava bona inai golo kaivakukuna oi haginia gauna, be do ai tomadiho henia lasi.”
19Unai hereva dekenai Nebukanesa ia badu dikadika momokani, bona iena vairana toana ia idau Sataraka bona Misaka bona Abetenigo dekenai, vadaeni lahi naria taudia ia hamaoroa, unai lahi ena siahu ma do idia habadaia nega 7, guna idia hasiahua bamona lasi.
20Vadaeni iena tuari orea lalonai idia noho goada herea taudia dekenai oda ia henia Sataraka bona Misaka bona Abetenigo do idia guia, bona lahi siahu herea lalonai do idia negea vareai.
21Unai dainai inai taudia, mai edia dabua badana, bona edia aena dabua, bona edia kwara gauna, bona edia dabua ibounai nega tamona idia guia, bona unai lahi siahu herea lalonai idia negea vareai.
22Unai king ena hereva be auka dainai, unai lahi ena siahu ese Sataraka bona Misaka bona Abetenigo idia huaia lao taudia ia hamasedia.
23To Sataraka bona Misaka bona Abetenigo, mai guia varodia danu, unai lahi siahu herea lalonai idia moru diho.
24Unai neganai Nebukanesa ia hoa dikadika, bona karaharaga ia toreisi, iena aonega taudia dekenai ia hereva, ia gwau, “Unai be tau toi ita guia, lahi lalonai ita negea vareai, ani?” Idia haere, idia gwau, “King e, unai be momokani.”
25Vadaeni Nebukanesa ia haere, “Inai, hari lau itaia tau 4, edia guia gauna be lasi, lahi lalonai idia raka loaloa, bona idia be dika idia davaria lasi, to tau namba 4 ena toana be dirava ena natuna ta bamona.”
26Unai neganai Nebukanesa ia lao lahi kahirakahira, ia boiboi, ia gwau, “Sataraka, Misaka, Abetenigo e, Ataiai Momokani Dirava ena hesiai taudia e, lahi umui rakatania, umui mai.” Vadaeni Sataraka bona Misaka bona Abetenigo be unai lahi siahu herea dekena amo idia raka murimuri dekenai.
27Vadaeni unai lohia taudia bona gavana taudia bona tuari biaguna bona kaunsolo taudia ibounai idia haboua mai, inai taudia toiosi idia itaia. Lahi ia siahu lasi edia tauanina dekenai, edia kwarana huina danu sisina ia gabua lasi. Edia dabua danu sisina idia idau lasi, bona lahi ena bonana be sisina ia noho lasi idia dekenai.
28Nebukanesa ia hereva, ia gwau, “Sataraka, Misaka bona Abetenigo edia Dirava do ita hanamoa, badina iena aneru ia siaia, iena hesiai taudia ia hamauria. Taudia unai, edia Dirava idia abidadama henia, bona king ena hereva idia utua, bona idau dirava ta idia tomadiho henia lasi, edia Dirava tamona sibona.
29“Unai dainai oda hereva lau atoa inai: Bema bese ta, o basileia ta, o gado ta taudia ese hereva ta idia gwauraia kerere Sataraka, Misaka bona Abetenigo edia Dirava dekenai, edia tauanina do idia utua, bona edia ruma be momoru do idia halaoa, badina idau dirava ta ese inai bamona ia hamauria diba lasi.”
30Unai neganai king ese dagi bada ia henia Sataraka, Misaka bona Abetenigo dekenai Babulonia tano lalonai.
