APOSETOLO EDIA KARA 25:12-27

¹²Vadaeni, Festo be iena sisiba henia taudia danu idia herevahereva, gabeai Paulo dekenai ia haere, ia gwau, “Oi be Kaisara dekenai oi noinoi. Vadaeni, Kaisara dekenai do oi lao.”

¹³Dina haida murinai, King Agripa mai Berenike danu idia diho mai Kaisarea, Festo hanamoa totona.

¹⁴Dina momo unuseni idia noho murinai, Festo ese Paulo ena hereva king dekenai ia hamaoroa, ia gwau, “Tau ta iniseni ia noho, Feliki ese dibura ruma lalonai ia rakatania.

¹⁵Ierusalema lau lao neganai, Iuda edia dubu biagudia bona tau badadia ese inai tau idia samania, bona idia ura lau kota henia.

¹⁶To idia dekenai lau haere, lau gwau, ‘Ai Roma taudia aiemai kara be, tau ta do ai kota kava lasi. Kerere tauna be iena samania taudia edia vairanai do ia gini guna, bona ia be mai ena nega edia samani hereva dekenai do ia haere.’

¹⁷“Vadaeni, idia ibounai iniseni idia mai neganai, lau naria lasi, to kerukeru dina kota gabuna dekenai lau helai, bona lau oda inai tau do idia hakaua mai.

¹⁸Iena samania taudia idia toreisi neganai, lau laloa kara kerere haida do idia gwauraia iena latanai, to idia gwauraia lasi.

¹⁹Idia be edia guriguri kara sibona dekenai idia hepapahuahu. Bona tau ta, ladana Iesu idia herevalaia, ia mase vadaeni, to Paulo ia hereva goada, ia gwau inai Iesu be ia mauri noho.

²⁰Inai hereva tahua dalana dekenai lau daradara. Inai dainai Paulo lau henanadaia, ia ura Ierusalema dekenai ia lao, inai gau kotalaia totona, o lasi.

²¹To Paulo ese ia noinoi lau dekenai, do ita gimaia noho ela bona Augusto ese do ia kota henia. Unai dainai lau oda idia gimaia noho, ela bona Kaisara dekenai do lau siaia lao.”

²²Agripa ese Festo dekenai ia hereva, ia gwau, “Lau danu lau ura inai tau ena hereva lau kamonai.” Festo ia gwau, “Kerukeru do oi kamonai.”

²³Kerukeru dina dekenai, Agripa bona Berenike idia mai, king ena toana gaudia momo danu, hebou ruma lalonai idia raka vareai. Idia danu be tuari biagudia bona hanua tau badadia. Vadaeni, Festo ia oda, Paulo idia hakaua vareai.

²⁴Festo ia gwau, “King Agripa e, bona ai danu umui hebou noho taudia e. Inai tau, Paulo, mani umui itaia. Ia totona Iuda taudia ibounai Ierusalema dekenai bona iniseni danu lau dekenai idia noinoi. Idia boiboi goada, namo lasi inai Paulo ia mauri.

²⁵Lau tahua, to ena davana be mase kara ta lau davaria lasi ia dekenai. Ma Paulo ese ia noinoi, Augusto ena vairana dekenai do ia kota. Inai dainai lau laloa do lau siaia lao.

²⁶To Paulo totona lau be hereva maoromaoro ta lau torea diba lasi lauegu biaguna dekenai. Unai dainai lau hakaua mai vadaeni umui emui vairanai, bona oi vairanai danu, King Agripa e. Bona iena kara ita tahua nega lalonai, lau be Paulo totona hereva ta do lau davaria, vadaeni do lau torea.

²⁷Badina lau laloa be ia maoro lasi, bema dibura tauna lau siaia lao kava, iena samani hereva be lasi neganai.”