Acts 25:12-27

¹²Paul renh awek-penh, Festus artwa ingwer-rnem-then angkerrenh. Artwa rernem Rome-areny-rnem-angkwarr renh iterl-arenhan. Ikwer-penhan ra Paul renh ilek, “Ngarl ilkelheyel-angkwarr-antey, Atyetyart Caesar rant court-itwek ayernetyek.”

¹³Ingwer-ingeran, King Agrippa Caesarea-warl apetyek anew ikwerenh-then-antey Bernice-then. Ratherr ilkwatherr apetyek Festus-warl, renh aretyek.

¹⁴Ratherr kel arlta irrpety ikwer-itwek anek-penh, Festus-el King renh Paul-ek ilek. Ra renh ilek, “Felix-el artwa anyent tyayl-itwek iwerl-alhek.

¹⁵Ayeng Jerusalem-itwek anenh-antey, tyaty-areny atyetyart-rnem-then Jew-rnem atyetyart-rnem-then rernem atyeng-warl apetyek. Rernem ayenh ayernek, atha anyent renh ipmek atwetyek.

¹⁶Atha renh-rnem ilek, ‘Anwekantherrenh-angkwarr angka ingweran aynteyel arrpemarl. Anwantherr nthakenh ingwer ipmek atwey-angenh. Arrantherr renh anngetherr court-itwek ayernetyek. Ikwer-penhan ra ilelhenty, renh ipmek-anem atwetyek.’

¹⁷Jew-rnem-anem nhenh-warl apetyek atyeng-warl. Arlta ingwerelan ayeng Paul-ek yangkelhek, atha renh ayernetyek, rernem renh anngetherr ayntarrp-iletyek.

¹⁸Rernem-anem ayntarrp-ilek, athanem iterl-arek rernemarl apalel renh ayntarrp-ilek, atha renh nthakenh ipmek atwey-angenh.

¹⁹Rernem ilterrek, Akngey ikwer-rnem-kenh-they. Rernem ilterrek Jesus-they, rarl arrewaly ayntek. Paul ra ilek, ‘Jesus ra iteth aneyel.’

²⁰Ayeng-anem ywarn iterrek athanem Paul renh ayernek, ‘Nga Jerusalem-warl alhetyek? Atha ngenh court-emileyek.’

²¹Paul ilelhek, ‘Ayeng ilkelheyel, Caesar-itwek ayenh court-emiletyek.’ Alakenh-anyem atha renh tyayl-itwek atnyeneyel, Rome-warlant renh thwenetyek.”

²²Ikwer-penhan Agrippa-el-anem Festus renh ilek, “Ayeng ilkelheyel atha artwa renh awetyek.” Festus-el renh ilek, “Ntwa kel ingwepenhan renh awetyek.”

²³Kel arlta ingwerel Agrippa Bernice-atherr Festus-kenh warl-warl apetyek, arnkwa mwerr-angkerel aylpemel. Ahelengkw Atyetyart ingwer-rnem-then, artwa ingwer-rnem-then warl ikwer-itwek anyentirrek. Ikwer-they Festus Paul-ek yangkelhek.

²⁴Festus-anem angkek, “King Agrippa-ay, atyetyart-rnemay, arrantherr artwa nhenh arenherr-arey! Jew nhenh-arenyel-rnem-then Jerusalem-areny-rnem-then rernem artwa renh ayntarrp-ilek. Rernem-antey ilanthek, atha renh ipmek atwetyek.

²⁵Ran artwa mwerrarl, arlarl. Atha renh-rnem arternpel awek, nthakenh atha renh ipmek atwey-angenh, menty-anem. Ikwer-penhan Paul rantey angkek, Caesar-el renh court-emiletyek. Alakenh-anyem atha renh Caesar-warl thwenetyek.

²⁶Nthakenh atha renh arwa thweney-angenh, renh court-emiletyek. Alakenh-anyem ayeng ikwer yangkelhek, arrantherr King Agrippa-el akngerr ayernetyek. Anantherr-anem pip thwenetyek atyetyart Caesar-warl.

²⁷Arrantherr mwerrant-arey angkerrenty, atha renh thwenemarl.”