Acts 25:12-27

¹²Festus Caesar ana dogadogara ai nota i vaia ma i paribelana i pa, “Tam u vibaḡa Caesar awarina, Anina Caesar awarina ma nae.”

¹³Aupom biaḡa au murina gulau Agrippa novuna Benisi maiteni i nei au Caesarea da gavena vouna Festus i raugenari da ita viegualauei.

¹⁴Ma i mae aupom vomaḡauna ma Festus Paul i rarauetara gulau i pariverei i pa, “Felix panipani tagogi weka i voterei.

¹⁵Ma maranai a nae au Jerusalem mai Jew ai pirisi babadai ma dogadogara ai viwavu i neiai awariu ma i vibaḡaiu da Paul ata viraḡeni.

¹⁶—Ma a riwei da tauai mai Rome ai tarawatu e ririwa da eḡa rava ana kovoḡa labalababai da au naona ana rauetarei. Taui ina ḡetai da ai viwavu taurauetara au naona ina mairi da ina gagaloana-melei.

¹⁷Maranai tauviwavu maiteni weka a ḡetai. Tau eḡa ata vipaipai ma maratomna a egara da ravana i neiai da ita etara.

¹⁸Tauviwavu i vomairi ma a notai da aiwai apoapoena aubaina ita viwavui wate eḡa.

¹⁹Anina kaua biaḡa ava ai taparoro kauaii, ma rava tagogi irairaḡena wavana Iesu i vitarapiriei. Wate Paul e ririwa da Iesu lawalawaina.

²⁰Tau nuanuau i raḡaraḡa menanare riwa kaua ana vainei ma Paul a paridadanei da i vianina da maiteni ata ḡae au Jerusalem da kampa ata etarei.

²¹Wate Paul i vibaḡa da Caesar ana viwavu ina rautaniḡanei. Ma sorodia a egari da au numa panipani ina paini da ana paritawanei Caesar awarina.”

²²Ma Agrippa Festus i riwei, “A ḡoei da ravana ana babani ana rautaniḡanei.” Ma Festus i paribelei, “Anina, au maratom ma rautaniḡanei.”

²³Au maratomna gulau Agrippa ma Benisi gulau garai i oteni ma ana gabemani babadai ḡaeḡae maiteni, i arana-ruiei au boru numana. Festus ana sorodia i egari da Paul i ruieiai.

²⁴Festus i riwa, “Gulau Agrippa ma anatapumi o rieiai weka, wei ravana o inainanai! Tauna mai Jew au Jerusalem ma weka au Caesarea e ḡoeḡoei da ina iraḡe.

²⁵Wate tau a nelaḡai da tauna eḡa aiwai ita kauana-boai da ina iraḡe. Wate i vibaḡa da Caesar tauna ina rauetarei. Lamna aubaina a pariparitawanei Caesar awarina.

²⁶Wate Caesar aiwai ana riwei, eḡa ata aramanei aiwai ana girumi? Lamna aubaina a neiai awarimi ma tam gulau Agrippa maiteni da tana babaniei da nota ona vereu da aiwai ana girumi.

²⁷Aubaina eḡa ita ai da panipani ana paritawanei Caesar awarina ma ana viwavuna eḡa!”